¿Imam yanapasunki bautizakunaykipaq?

1, 2. Hechos 8:27-31 hinaspa 35, 36 chaynataq 38 nisqanman hinaqa, ¿imanasqam Etiopia nacionpi kamachikuq runaqa bautizakururqa?

MANARAQ bautizakuqkuna, ¿imam yanapasunkichikman bautizakunaykichikpaq hinaspa Jesuspa qatiqninña kanaykichikpaq? Jehova Diosta kuyaynikichikmi hinaspa ñuqanchikrayku tukuy ima ruwasqanmanta riqsikuynikichikmi. Kaykunam hukkunatapas yanaparqa. Yanapasunkichikmantaqmi Etiopia nacionpi kamachikuq runamanta yachaynikichikpas.

² Chay kamachikuq runam bibliamanta imam kaqta yacharuspan bautizakunanpaq tantiakururqa (qaway Hechos 8:27-31, 35, 36, 38). Payqa Diospa palabrantam allinpaq hapiq. Chaymi huk kutipipas Jerusalenpi Diosta yupaychasqanmanta hamustinpas Diosmanta willakuq Isaiaspa qillqasqanta ñawinchastin hamurqa. Hinaspanmi Diosmanta willakuq Felipewan tuparurqa. Chaymi Felipe astawan yachaykachirqa ñuqanchikrayku Jesus tukuy ima ruwasqanmanta. Chaymanta uyariykuspanmi chay runaqa anchata kusikullarqa. Payqa Diostaqa ñam kuyarqaña, chaymi Jerusalenmanpas rirqa Jehova Diosta yupaychananpaq. Diosta kuyasqanraykutaqmi punta religionnintapas saqirurqaña. Arí, Jehova Diosta sunqumanta kuyasqanrakum bautizakuruspan Jesuspa qatiqninña karqa (Mat. 28:19).

3. ¿Imanasqataq wakinkuqa mana bautizakunkuchu? (Qawaytaq “¿Imamantaq sunquyki rikchakuchkan?” niqta)

³ Manaraq bautizakuqkuna, Diosta kuyasqaykichikmi qamkunatapas yanapasunkichik bautizakunaykichikpaq. Ichaqa aylluykichikta chaynataq riqsinakusqaykichikta Jehova Diosmanta astawan kuyasqaykichikraykum mana bautizakuwaqchikchu, wakinpiqa nikunkimanpaschá “bautizakuruptiyqa ichapas paykunaqa ñuqamanta karunchakurunqaku” nispa (Mat. 10:37). Chaymantapas bautizakunaykichikpaqqa sasachasunkichikmanmi Diospa chiqnisqan kaqkunata manaraq saqisqaykichikpas, chaykunaqa kanmanmi coca akuy, cigarro pitay, trago tomay utaq hukkunapas (Sal. 97:10). Kanmantaqmi llaqtanchikpi utaq nacionninchikpi mana allin costumbrekunapas. Ichapas puntataqa chay costumbrekunapi llapallan aylluykiwan utaq riqsinakusqaykichikkunawan kusirikuq kankichik. Chaykuna saqiypas sasachasunkichikmantaqmi bautizakunaykichikpaqqa (1 Cor. 10:20, 21). Chaymi sapakama sunquykichikpi tapurikunaykichik: “¿Pitataq utaq imatataq puntapi churayta munani?”, nispa.

¿PITATAQ ASTAWAN KUYANANCHIK?

4. Manaraq bautizakuqkunataqa, ¿imam astawan yanapanqa bautizakunankupaq?

⁴ Yaqapaschá Jehova Diospa testigonkunawan manaraq bibliamanta yachachkaspayki sapaykipi bibliaykitaqa ña ñawincharqankiña. Kunanñataqmi testigokunata riqsisqaykiwan hinaspa bibliamanta yachasqaykiwan kusisqa tarikunki. Ichaqa manam chaykunallachu bautizakunaykipaqqa yanapasunki. Astawanqa yanapasunki Jehova Diosta sunqumanta kuyaynikim. Imamantapas astawan Jehova Diosta kuyaspaykiqa imaña-haykaña kaptinpas paymantaqa manam karunchakunkichu. Arí, Jehova Diosta kuyaynikim yanapasunki bautizakunaykipaq hinaspa kusisqa payta yupaychanaykipaq.

5. ¿Imamantam yachasunchik?

⁵ Jesusmi nirqa: “Jehova Diosnikitam kuyanayki tukuy sunquykiwan, tukuy vidaykiwan, tukuy yuyaynikiwan hinaspa tukuy kallpaykiwan”, nispa (Mar. 12:30). Jesuspa nisqanman hina Jehova Diosta kuyanapaqqa yuyaymanananchikmi kuyawasqanchikrayku ñuqanchikpaq tukuy ima ruwasqanpi (1 Juan 4:19). Chaymi kay yachachikuypi yachasun Jehova Diosta kuyanapaq ima ruwananchikmanta chaynataq Jehova Diosta kuyasqanchikrayku imakunatawanraq astawan ruwananchikmantapas.b

6. Romanos 1:20 nisqanman hinaqa, manaraq bautizakuqkunata, ¿imataq yanapanqa Diosta kuyanankupaq?

⁶ Jehova Diosta astawan kuyanaykipaqyá tukuy ima unanchasqankunapi yuyaymanay (qaway Romanos 1:20; Apoc. 4:11). Yuyaymanawaqmi tukuy rikchaq waytachakuna, sachakuna hinaspa tukuy rikchaq animalkuna kuyayllapaq unanchasqa kasqankupi. Yuyaymanawaqtaqmi ñuqanchikpas sumaq unanchasqa kasqanchikpi (Sal. 139:14). Hanaq pachata qawarispañataqmi yuyaymanawaq akchiwaqninchik inti atiyniyuq kasqanpi chaynataq wara-waranqantin lucerokuna kasqanpipas (Is. 40:26).c Tukuy kaykunapi yuyaymanaynikim yanapasunki Jehova Diosninchikta kuyanaykipaq. Jehova Diosta kuyanaykipaqqa yanapasunkitaqmi paymanta astawan yachaynikipas.

7. Manaraq bautizakuqkunaqa, ¿imamantam mana iskayrayanankuchu?

⁷ Jehova Diosqa sapakamatam qawawachkanchik. Chaymantaqa amayá iskayrayaychu. Wakinpiqa nikunkimanpaschá: “Imaynamá ñuqataqa tukuy atiyniyuq Diosqa qawamuwanman”, nispa. Ichaqa bibliapa nisqanman hinam taytanchik Jehova Diosqa mana “llumpay karupichu ñuqanchikmantaqa kachkan” (Hech. 17:26-28). Kamachiq Davidpas churin Salomontam nirqa: ‘Diosqa llapa runakunapa sunquntam qawachkan’, nispa. Nirqataqmi: “Diosta maskaspaykiqa tarinkim”, nispa (1 Cron. 28:9). Chaymantapas Juan 6:44 nisqanman hinam qamqa bibliamantaqa yachayta qallaykurqanki Jehova Dios akllasusqaykirayku. Arí, taytanchik Jehova Diosmanta astawan yachaspaykiqa astawanraqmi sunqumanta kuyanki.

8. Manaraq bautizakuqkunataqa, ¿imam yanapanqa Jehova Diosta astawan kuyanankupaq?

⁸ Jehova Diosman ima llakikimantapas willakuspaykiqa hinaspa tukuy imapi yanapasusqaykimanta agradecekuspaykiqa astawanmi kuyanki. Payqa uyarisuspaykim yanapasunki (Sal. 116:1). Arí, Jehova Diosta mañakuspaykiqa astawanmi kuyanki. Ichaqa manam chayllachu. Jehova Diosta astawan kuyanaykipaqqa sapa punchawtaqmi palabrantapas ñawinchanayki.

9. Manaraq bautizakuqkunapas, ¿imatam sapa punchaw ruwananku?

⁹ Jehova Diosta astawan kuyanaykipaqyá palabranta sapa punchaw ñawinchay. Diospa palabrallanmi Diosmantaqa imam kaqta yachachisunki, palabranpitaqmi tarinki kusisqa kawsakunaykipaq yachachikuykunatapas. Chaymi sapa punchaw Diospa palabrantaqa ñawinchanayki hinaspapas bibliamanta yachachisuqniki manaraq wasikiman hamuchkaptinmi Diosmanta yachanaykipaq qillqaykita qawanaykiña. Yachasqaykiman hina kawsakunaykipaqtaqmi kallpanchakunayki (Sal. 119:97, 99; Juan 17:17). Chaynaqa sapaykipi tapurikuy: “¿Kallpanchakuchkanichu Diospa palabranta sapa punchaw ñawinchanaypaq icha manachu?”, nispa.

10. ¿Pikunam Jesuspa ruwasqankunatawan nisqankunata qillqarqaku?

¹⁰ Bibliallam willawanchik Diospa churin Jesus qamrayku tukuy ima ruwasqanmanta. Tukuy chay imakuna ruwasqanmantam Jesuspa wakin puriqmasinkuna qillqarqaku. Jesuspa tukuy ima nisqanta chaynataq ruwasqanta bibliapi ñawinchaspaykiqa qampas munankim qatiqnin kayta.

11. Manaraq bautizakuqkunataqa, ¿imam yanapanqa Dios imayna kasqanmanta yachanankupaq hinaspa astawan kuyanankupaq?

¹¹ Jehova Diosta astawan kuyanaykipaqyá Jesusmanta yachay. Jesusqa tukuy imapim taytanta qatipakurqa (Juan 14:9). Chaymi kay allpa pachapi kaspanpas wakchakunata, unquqkunata hinaspa ima llakiyuqkunatapas yanapaykurqa. Kunanpas Diospa palabranpi Jesuspa nisqankuna hinaspa ruwasqankunaqa allintam yanapasunki kusisqa kawsakunaykipaq (Mat. 5:1-11; 7:24-27). Arí, Jesusmanta astawan yachaspaykiqa Jehova Dios imayna kasqanmantam yachanki hinaspapas astawanmi kuyanki.

12. Manaraq bautizakuqkunataqa, ¿imapaqtaq yanapanqa Jesuspa wañukusqanpi yuyaymanayninkuqa?

¹² Yuyaymananaykitaqmi ñuqanchikrayku Jesus ima ruwasqanpi. Payqariki huchanchikmanta pampachasqa kananchikpaqmi wañukullarqa (Mat. 20:28). Chaypi yuyaymanaynikiqa yanapasunki Diospa chiqnisqankunata manaña ruwanaykipaq. Yanapasunkitaqmi Jehova Dioswan kuyachikunaykipaqpas (Hech. 3:19, 20; 1 Juan 1:9). Diosta yupaychaqkunawan hukllawakuynikipas yanapasunkitaqmi astawan Diosta kuyanaykipaqqa.

13. Manaraq bautizakuqkunaqa, ¿imanasqataq mana llakikunankuchu ayllunkunawan riqsinakusqankuna paykunamanta karunchakuruptinku?

¹³ Jehova Diosta kuyanaykipaqqa amayá yupaychaqninkunamanta karunchakuychu. Aylluykikunawan riqsinakusqaykikunaqa manapaschá munanqakuchu bautizakunaykitaqa. Wakin aylluykikunaqa yaqapaschá qanmanta karunchakunqaku. Ichaqa amayá llakikuychu, Jehova Diosta yupaychaqkunam kuyakuywan yanapasunki hinaspapas imaña-haykaña kaptinpas paykunaqa manam saqisunkichu (Mar. 10:29, 30; Heb. 10:24, 25). Chaymantapas aylluykikunaqa yaqapaschá Diosta kasukusqaykita qawaspanku qipa punchawkunata Diosmanta yachayta qallaykunqaku (1 Ped. 2:12).

14. 1 Juan 5:3 nisqanman hinaqa, ¿imanasqataq manaraq bautizakuqkunaqa kallpanchakunanku Diospa nisqanman hina kawsakunankupaq?

¹⁴ Kallpanchakuyyá Jehova Diospa nisqanman hina kawsakunaykipaq. Diosmanta manaraq yachachkaspaykiqa yaqapaschá munasqaykiman hina imatapas ruwaq kanki. Kunanmi ichaqa manaña. ¿Imanasqa? Musyakurqankichá Jehova Diospa nisqanman hina kawsakuyqa aswan allin kasqanmanta (Sal. 1:1-3; qaway 1 Juan 5:3). Jehova Diosqariki palabranwanmi sumaqta yachachisurqanki wasikipi kaqkunawan kusisqa kawsakunaykipaq ima ruwanaykimanta (Efes. 5:22–6:4). Chaykunata kasukuspaykiqa mayna kusisqach tarikunki wasikipi kaqkunawan, ¿aw? Kusisqataqchá tarikunki Diosta mana kasukuqkunawan manaña hukllawakuspaykipas, ¿aw? (Prov. 13:20; 1 Cor. 15:33).

15. Manaraq bautizakuqkunaqa, ¿imatam ruwanmanku bibliapa kamachikuyninkunata imayna kasukuyta yachanankupaq?

¹⁵ Wakinpiqa chayllaraq bibliamanta yachasqaykiraykuchá nikunki: “Kay bibliapi ñawinchasqaytaqa hinaspa huñunakuykunapi yachasqaykunataqa, ¿imaynatataq kasukuyman?”, nispa. Ichaqa amayá llakikuychu, Diospa kamachikuyninkunata kasukunaykipaqqa achka qillqanchikkunam kapuwachkanchik. Chaykunata ñawinchaspaykiqa allintam yachanki Diospa munasqanman hina imayna kawsakunaykipaq (Heb. 5:13, 14). Qillqanchikkunata ñawinchasqaykiqa kallpanchasunkitaqmi imaña-haykaña kaptinpas Jehova Diosta yupaychaqkunawan kuska hinalla Diosninchikta yupaychanaykipaq.

16. Jehova Diosqa, ¿pikunatam akllarun yupaychaqninkunata yanapananpaq?

¹⁶ Diospa akllasqan runakunatam kasukunayki. Jehova Diosqa churin Jesustam akllarun paypa llapallan yupaychaqninkunata hanaq pachamanta yanapamunanpaq (Efes. 1:22; 5:23). Jesusñataqmi aslla iñiqkunata kay allpa pachapi akllarun Diospa runankunata yanapanankupaq. Paykunatam bibliapi sutichan “allin ruwaq yuyayniyuq sirviente” nispa. Paykunaqa tukuytam ruwachkanku Diosmanta imam kaqta yachanaykipaq hinaspa mana allinkunaman mana wichiykunaykipaqpas (Mat. 24:45-47). Chaypaqmi maypi huñunakusqaykipi iñiyninkupi allin takyasqa qarikuna akllasqa karqaku punta apaqkuna kanankupaq. Paykunaqa kuyasusqaykiraykum tukuyta ruwanqaku hinalla Diosman sunqu kanaykipaq. Llakipi utaq ima sasachakuypi tarikuptikipas paykunaqa qanwanmi kanqaku (Is. 32:1, 2; Heb. 13:17; 1 Ped. 5:2, 3). Punta apaqkunaqa yanapasunkitaqmi runamasinchikkunaman Diosmanta allinta yachachinaykipaqpas (Efes. 4:11-13).

17. Romanos 10:10, 13 hinaspa 14 nisqanman hinaqa, ¿imanasqam manaraq bautizakuqkunapas Diosmanta willakunanku?

¹⁷ Jehova Diosta kuyanankupaqyá hukkunatapas yanapay. Kikin Jesusmi qatiqninkunata kamachirqa runamasinkunaman Diosmanta yachachinankupaq (Mat. 28:19, 20). Qallariypiqa hukkunaman Diosmanta willakuyqa sasa hinachá rikchakapusunkiman. Ichaqa Jehova Diosta kuyasqaykiraykum Jesuspa kamachisqantaqa kasukunki. Hinaspaqa qampas yaqapaschá ninki apostol Pedrowan Juan hina. Paykunam nirqaku: ‘Ñuqaykuqa manam upallaymankuchu rikusqaykumantawan uyarisqaykumanta willakuytaqa’, nispa (Hech. 4:20). Arí, kusisqam tarikunki pimanpas Diosmanta willakuspaykiqa. Qallariypi rimamusqanchik Diosmanta willakuq Felipepas kusisqam tarikurqa Etiopia nacionpi kamachikuq runaman Diosmanta yachaykachispan. Anchatataqmi kusikurqa chay runa Diosmanta astawan yacharuspan bautizakuruptinpas. Qampas Felipe hina hukkunaman Diosmanta yachachispaykiqa Jehova Diostam astawan kuyanki (qaway Romanos 10:10, 13, 14). Hinaspaykim Etiopia nacionpi kamachikuq runa hina bautizakunki (Hech. 8:36).

18. ¿Imamantam qatiqnin yachachikuypi yachasun?

¹⁸ Sichum tantiakurunkiña bautizakunaykipaq chayqa ancha allinmi. Ichaqa Diosman qukuynikiqa utaq bautizakuynikiqa manam iskay-kimsa watallapaqchu. Chayraykum qatiqnin yachachikuypi sumaqta yachasunchik bautizakuymanta. Yachasuntaqmi manaraq bautizakuchkaspayki ima ruwanaykimanta, chaynataq bautizakurusqaykimanta qipaman imakunata hinalla ruwanaykimantapas.