Astawan yachay munaqkunapaq

¿Imaynatam entiendenanchik 1 Corintios 15:29 nisqanta?

Achka bibliakunam nin apostol Pablopa tiemponpi wakinninku wañuqkunarayku bautizakusqankuta.

Chuya Qellqa bibliapipas kaynatam nin: “Wakin iñiqkunam bautizakunku wañuqkunarayku. Wañuqkuna mana kawsarimunan kachkaptinqa, ¿imanasqataq chaytaqa ruwanku?”, nispa.

Ichaqa, ¿imatam ninku bibliamanta allinta yachaq runakuna? Gregory Lockwood sutiyuq runapa nisqanman hinaqa wañuqkunarayku bautizakuymantaqa manam ima qillqapipas nitaq bibliapipas rikurinchu. Gordon Fee sutiyuq yachayniyuq runapas kaynatam nirqa: “Manam mayqin iglesiapi kaqkunapas nitaq maylaw llaqtayuq runapas apostolkunapa wañukusqan qipamanqa wañuqkunaraykuqa bautizakurqachu”, nispa.

Jesusmi kaynata nirqa: “Llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik [...]. Yachachimuychikyá tukuy ima kamachisqaykunata kasukunankupaq”, nispa (Mat. 28:19, 20). Chaynaqa, pipas bautizakunanpaqqa Jehova Diosmantawan Jesusmantaraqmi puntataqa yachanan, hinaspapas paykunatam kasukunan. Wañukuspanqa manañamá chay ruwaytaqa atinmanñachu, manataqmi paypa rantinpiqa hukqa bautizakunmanchu (Ecl. 9:5, 10; Juan 4:1; 1 Cor. 1:14-16).

Hinaptinqa, ¿ima niytataq Pabloqa munachkarqa 1 Corintios 15:29 nisqanpi?

Corinto llaqtayuq wakin iñiqkunam iskayrayarqaku wañuqkuna kawsarimunanmanta (1 Cor. 15:12). Pablom ichaqa sapa punchaw wañuypa patanpi kaspanpas mana iskayrayarqachu hanaq pachapaq kawsarimunanmantaqa (1 Cor. 15:30-32, 42-44).

Corinto llaqtayuq iñiqkunaqa hanaq pachapaq kasqankuraykum yachananku karqa sapa punchaw sasachakuypi kanankuta hinaspa hanaq pachapaq kawsarichisqa kanankupaq wañunankuta. Paykunaqa Jesuspa ‘wañukusqanpim bautizakunanku’ karqa (Rom. 6:3). ¿Ima ninantaq chayqa? Jesus hinam tukuy ima sasachakuypi kananku karqa, hinaspapas hanaq pachapi kawsakunankupaqqa wañunankum karqa.

Yakupi bautizakusqanmanta iskay wata qipatam Jesusqa iskay apostolninkunata nirqa: “[Kay] bautizakusqay bautismowanpas bautizakunkichikmi”, nispan (Mar. 10:38, 39). Chaywanqa nichkarqa manam yakupi bautizakusqanmantachu. Aswanqa pay hina Diosman sunqu kaspanku wañunankumantam. Apostol Pablopas nirqataqmi Jesuswan kuska hanaq pachapi hatunchasqa kanankupaqqa ñakarinankumanta (Rom. 8:16, 17; 2 Cor. 4:17). Chaynaqa, wañunankumá karqa hanaq pachapaq kawsarinankupaqqa.

Chayraykum apostol Pabloqa 1 Corintios 15:29 nisqanpiqa kaynata nichkarqa: “Mana chayna kaptinqa, ¿imatataq ruwanqaku wañunankupaq bautizasqa kaqkunaqa? Wañuqkuna manapuni kawsarimunanku kaptinqa, ¿imanasqataq paykunaqa wañunankupaq bautizakunku?”, nispa.