¿Imanasqataq wakinpiqa Diosqa mañakusqanchiktaqa mana uyarinchu?
Taytanchik Jehova Diosqa uyariwanchikmi sunqumanta mañakuptinchikqa. Chayna kaptinpas wakinpiqa manam mañakusqanchikman hinachu yanapawanchik. ¿Imanasqataq wakinpiqa mana uyariwanchikchu? Uyariwananchikpaqqa, ¿imaynatam mañakunanchik? Bibliapiyá chaymanta yachaykusun.
Mateo 6:7 nin: ‘Mañakuspaykiqa amam kuti-kutirispaqa hina rimasqallaykitaqa rimankichu’, nispa.
Jehova Diosqa manam munanchu kuti-kutirispa hina kaqllata rimananchiktaqa nitaq huk qillqapi qillqasqa kaqta ñawinchananchiktaqa. Payqa munanmi sunqumanta mañakunanchikta. Kaypi yuyaymanay: Amistadniki hina kaqllata sapa punchaw rimapayasunkiman, amiruwaqchá ¿aw? Kuyakuq amistadninchikwanqa tukuy imatam willanakunchik. Chaynam Jehova Dioswanpas. Kuyasqanchik amistadninchikta hina hapispaqa tukuy imatam willasunchik.
Santiago 4:3 nin: “Mañakuspapas manam chaskinkichikchu mana allinta ruwanaykichikpaq mañakusqaykichikrayku”, nispa.
Diospa munasqanman hina mana mañakuptinchikqa payqa manam uyariwasunchu. Kaypi yuyaymanasun. Huk runam qullqita ganakunanpaq Diosta mañakunman. ¿Diosqa uyarinqachu? Manam (Isaias 65:11; Lucas 12:15). Diosqa manam uyarinqachu paypa munasqanman hina mana mañakusqanrayku. Dios uyariwananchikpaqqa paypa munasqanman hina hinaspa bibliapa nisqanman hinam mañakunanchik.
Proverbios 28:9 nin: ‘Sichum pipas, Diospa kamachikuyninta mana kasukuptinqa, tayta Diospas manam mañakuyninta uyarinqachu’, nispa.
Arí, Diosqa manam uyarirqachu ñawpaq tiempopi yupaychaqninkunapa mañakusqankutaqa. Manaqa uyarirqachu paypa kamachikuyninkunata mana kasukusqankuraykum (Isaias 1:15, 16; Malaquias 3:6). Chaymi, mañakusqanchikta Dios uyariwananchikta munaspaqa kamachikuyninkunata kasukunanchik. Ichaqa, pantaruptinchikqa Diosqa, ¿manañachu haykapipas uyariwasun? Manam. Payqa pampachaykuwasunmi sunqumanta wanakuptinchikqa hinaspa paypa munasqanta ruwanapaq kallpanchakuptinchikqa (Hechos 3:19).