¿Imaynatam Diosta mañakuyqa yanapawanchik?

Rimarisun Pamela sutiyuq warmimanta. Payqa cancer unquywan unquspanmi doctorkunaman rirqa. Chaymantapas Diostam mañakurqa kallpata quykunanpaq. ¿Yaqachu Diosta mañakuyninqa yanaparqa?

Arí, paymi nin: “Kay unquymanta sanoyanaypaqmi wakinpiqa manchapakuspa hospitalman riq kani. Chayna kaspaymi Jehova Diosta mañakuni. Mañakusqayraykum hawkaña hinaspa kallpayuqña tarikuni. Nanayniyqa manam chinkarunchu, chayna kaptinpas Diosta mañakuyniymi anchata yanapawan. Riqsinakusqaykuna imayna tarikusqaymanta tapuwaptinkum ñuqañataq nini: ‘Manam allinchu kachkani, chayna kaptinpas kusisqam tarikuni’”, nispay.

Arí, Pamela hina mana unquspapas llapallanchikpam sasachakuyninchik kan. Ichaqa manam sasachakuypi tarikuspallanchikchu Diostaqa mañakunanchik, aswanqa tukuy tiempom. Ichaqa, ¿imapaqtaq Diosta mañakuyqa yanapawanchik?

Bibliam nin: ‘Tayta Diosman sasachakuynikikunata saqiykuy, paymi yanapasunki, allin ruwaq runataqa manam wichisqataqa saqinqachu’, nispa (Salmo 55:22). Bibliapa nisqanqa sumaqmi. Diosta munasqanman hina mañakuptinchikqa, payqa ima sasachakuytaña atipananchikpaqmi yanapawasun (qaway “Diosta mañakuyqa allinninchikpaqmi” niqta).

Diosta mañakuyqa allinninchikpaqmi

Hawkayaytam quwanchik

Bibliam nin: “Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik, hinaptinqa Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi”, nispa (Filipenses 4:6, 7). Diosman llakinchikkunata willakuptinchikqa payqa yanapawasunmi hawkalla tarikunanchikpaq. Yanapawasuntaqmi imatapas allinta tantiananchikpaq.

Yachaytam quwanchik

Bibliam nin: “Mayqinnikichikpapas yachaynikichik pisilla kaptinqa Diostayá tukuy tiempo mañakuychik hinaptinqa payqa quykusunkichikmi, payqa mana piñakuspa tukuy sunqunmanta achkanpi llapallanman quykuqmi”, nispa (Santiago 1:5). Sasachakuypi tarikuptinchikmi wakinpiqa mana imatapas allintachu tantianchik. Ichaqa Diospa yanapakuyninta mañakuptinchikqa payqa yanapawasunmi nisqankunata yuyarinanchikpaq, chaynapi imatapas allinta tantiananchikpaq.

Kallpatam quwanchik hinaspapas sunqunchiktam tiyaykachin

Bibliam nin: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:13). Jehova Diosllam tukuy atiyniyuq Diosqa. Payllam ima sasachakuykunata atipanapaqpas yanapawasun (Isaias 40:29). Chaymantapas bibliaqa niwanchikraqmi Jehova Diosqa sunqu tiyaykachiq Dios kasqanta. Arí, paymi tukuy sasachakuyninchikpi sunqunchikta tiyaykachin (2 Corintios 1:3, 4).