¿Haykapi Diospa piñakuynin chayamunanmantataq Jesusqa nirqa?

JESUSPA KAYNA NISQANKUNAPI YUYAYMANASUN:

“Qawan-qawanllayá kaychik, manam yachankichikchu imay punchaw nitaq imay hora kanantaqa” (MATEO 25:13).

“Akllasqa tiempo haykapi kananta mana yachasqaykichikraykuyá qawan-qawanlla hinaspa rikchan-rikchanlla kaychik” (MARCOS 13:33).

Chaynaqa, manam pipas yachanchu haykapi Diospa piñakuynin chayamunantaqa. Diosmi ichaqa yachan haykapim kananta (Mateo 24:36). Ichaqa, Jesusmi qatiqninkunata nirqa imakuna pasakusqanta qawaspanku Diospa piñakuynin hichpallapiña kasqanta yachanankumanta.

IMAKUNATAQ PASAKUCHKAN

Jesusmi nirqa Diospa piñakuynin hichpallapiña kaptinqa kaykuna kananmanta, nirqam: “Huk nacionmi peleanqa huk law nacionwan chaynataq huk gobiernopas huk law gobiernowan, kanqam kaypi-chaypi muchuykuna hinaspa terremotokuna”, nispa (Mateo 24:3, 7). Nirqataqmi “unquykuna” kananmantapas (Lucas 21:11). ¿Jesuspa chayna nisqantaqa kunan qawachkanchikchu?

Arí, qawachkanchikmi. Waranqantin runamasinchikkunam guerra kasqanrayku ñakarillachkanku, muchuykuna kaptin, terremotokuna kaptin, unquykuna kaptin. 2004 watapim terremoto karuptin lamar qucha lluqsiramurqa, hinaptinmi nana-nanaq runamasinchikkuna wañurullarqaku. Kimsa watapim coronavirus unquywan yaqa 7 millon runakuna wañurunku. Jesusmi nirqa tukuy kaykunata qawaspaqa Diospa piñakuynin punchaw hichpallapiña kasqanta yachanamanta.

‘TUKUPAY PUNCHAWKUNA’

Bibliapim nin manaraq Diospa piñakuynin punchaw chayamuchkaptin ‘tukupay punchawkunapi’ kawsananchikmanta (2 Pedro 3:3, 4). 2 Timoteo 3:1-5 nisqanman hinam tukupay punchawkunapiqa mana allin runakuna rikurinan karqa (qaway “Diospa piñakuynin manaraq chayamuchkaptin imakuna kananmanta” niqta). Kunan tiempopi runakunaqa kanku kikillanpaq munaqkunam, mana allinlla ruwaqkunam, qullqilla kuyaqkunam, sientichikuqllañam ¿aw? Tukuy kaykunawanmi yachanchik tukupay punchawkunapiña kasqanchikta.

¿Hayka unaytaq kanqa kay tukupay punchawkunaqa? Bibliapim nin pisi tiempolla kananmanta. Chaymantam Diosninchikqa chinkachinqaña kay allpa ‘pachanchikta purmachiqkunata’ (Apocalipsis 11:15-18; 12:12).

KAY ALLPA PACHAQA PISILLAMANTAÑAM SUMA-SUMAQ HUERTAÑA KANQA

Diosqa yachanñam haykapi kay mana allin runakunata chinkachinanmantaqa (Mateo 24:36). Ichaqa, manam munanchu ni huk runallapas chinkanantaqa (2 Pedro 3:9). Aswanmi Diosninchikqa munachkan riqsispa kasukunanchikta. Chaynapi piñakuynin punchawpi mana wañunanchikpaq. Diosninchikqariki munachkan kay allpa pacha sumaq huertaña kaptin chaypi kawsakunanchiktam.

Diosqa llapallan runakunamanmi testigonkunawan yachachichkan imata ruwaspanku chay sumaq huertapi kawsakunankupaq. Jesusmi nirqa kay sumaq willakuyta enterollan allpa pachapi willakunankumanta (Mateo 24:14). Jehova Diospa testigonkunaqa wara-waranqantin horatam Diosmanta willakuspanku runamasinchikkunapa sunqunta tiyaykachinku. Jesusmi nirqa manaraq Diospa piñakuynin chayamuchkaptin chay willakuy enterollan kay allpa pachapi kananmanta.

Chaynaqa, kay allpa pachapi gobiernokunaqa chinkanqañam. Diosta kasukuq runakunam ichaqa kay allpa pachanchik sumaq huerta kaptin chaypi kawsakunqaku. Qatiqnin yachachikuypim yachasun imata ruwaspa chay sumaq huertapi kawsakunamanta.