¿Yacharqankichu?

Jehova Diospa sutintam rumipi qillqasqata tarirurqaku

JERUSALEN llaqtapim kachkan ñawpaq tiempopi kaqkunata tukuy ima tarisqanku. Chaypitaqmi kachkan Diospa sutinpas rumipi qillqasqa. Yaqachusmi chaytaqa qillqarqaku kay allpa pachapi Jesus nacesqanmanta 600 utaq 700 wata ñawpaqtaraq. Chay rumitam tarirurqaku Hebron llaqtapa hichpanpi wañusqata pampasqanku machaypi. Chay rumipim kaynata nin: “Hagavpa churin Hagafyá Yahweh Sabaotpa ñakasqan kachun”, nispa. “Yahweh” nisqanqa Jehova ninanmi. Chayna nisqanwanmi yachanchik chay tiempopi runakuna Diospa sutinta yachasqankuta hinaspa rimasqankuta. Ñawpaq tiempopi hebreo rimaypim Diospa sutinta qillqaqku YHWH nispa. Wañusqakunata pampasqanku huk machaykunapipas Diospa sutintaqa tarirurqakum qatapi qillqasqata. Yaqachusmi chaytaqa qillqaqku chaypi pakakuqkuna utaq huñunakuqkuna.

Rachel Nabulsi sutiyuq yachayniyuq warmim kaynata nin: “Qillqakunapi hinaspa rumikunapi YHWH rikurisqanmi qawachin ñawpaq tiempopi Juda hinaspa Israel runakuna Diospa sutinta allinta yachasqankuta”, nispa. Chayqa tupanmá bibliapi waranqantin kutikama Diospa sutin rikurisqanwan.

Chaymantapas, tarisqanku rumipi Yahweh Sabaot nisqaqa “tropakuna kamachiq Jehova Dios” ninanmi. Chaywanmi yachanchik ñawpaq tiempopi runakuna Diospa sutinta chaynataq “tropakuna kamachiq Jehova Dios” niqta rimasqankuta. Bibliapiqa “tropakuna kamachiq Jehova Dios” nisqaqa 250 masnintam rikurin, astawanraqmi Isaias, Jeremias hinaspa Zacarias qillqakunapiqa. Kaypi qawamusqanchikwanmi yachanchik bibliaqa imam kaqta willawasqanchikta.