“Kunanqa kusisqañam Diosmanta willakuni”

MANAÑAM KUSISQAÑACHU KARQANI

Sipasyasqayman hinam manaña tukuy sunquywanchu Jehova Diostaqa kuyarqani. Ñuqaqa piensarqanim warmamasiykuna munasqankuman hina kawsakuspanku kusisqa kasqankuta, chaymi ñuqapas paykuna hina kayta munarqani. Tayta-mamaypa hinaspa bibliapa nisqanmi sasa hina rikchakapuwarqa. Manañam huñunakuykunamanpas nitaq Diosmanta willakuq riytapas munarqaniñachu. Dios kasqanmanta mana iskayrayaspaypas manañam payman sunquchu karqani.

Diosmanta willakuytaqa manam saqirurqanichu ichaqa hukkuna qawawanallanpaqñam willakuq kani. Chaymi runamasinchikman imamanta willanaypaqpas mana qawayllapas-qawaykuqchu kani. Willayllam willakuq kani manam pimanpas kaqmanta kutispayqa yachachiqchu kani. Manaña kusisqa Diosmanta willakusqayraykum nikuq kani: “Mayñaya semanantin killantin Diosmanta willakuyqa”, nispay.

17 wataypi kachkaspaymi sapallayña yachayta munaspay, Australia nacionman ripukurqani. Tayta-mamayqa llakikuspankupas manam iskayrayarqakuchu Diosta hinalla servinaymantaqa.

Ichaqa manamá chaynachu karqa. Manam lliw huñunakuykunamanchu riq kani, hinaspapas iñiyninkupi mana allin musu-sipaskunawanmi hukllawakuq kani. Paykunaqa huñunakuykunaman rispankupas tusukuq hinaspa tomakuqmi riqku. Chay tiempopiqa Diosta servispaypas payta mana kasukuq runakuna hinam kawsakurqani. Manamá kusisqachu karqani.

KUSISQA SERVINANCHIKTA DIOS MUNASQANTAM YACHARURQANI

Australia nacionpiqa pichqa warmi iñiqmasinchikkunapa yachasqanpim yacharqani. Huk kutipim llaqtan-llaqtan watukuq iñiqmasinchikta warmichantawan nirqaniku yachasqaykupi samakunankupaq. Iñiqmasinchikpa warmichanpa sutinmi karqa Tamara, payqa ñuqaykuwan kuska kananpaqmi tiempochakuq. Paywan rimaspaykuqa anchatam asikuq kaniku. Tamaraqa Diosta servispanmi kusisqa karqa, manam haykapipas paytaqa hukmanyasqataqa utaq llakisqataqa qawarqanikuchu.

Tamaraqa tukuy sunqunwanmi Jehova Diosta kuyarqa, chaymi kusisqallaña paymantapas willakuq. Ñuqam ichaqa atispallay Diosmanta willakusqayrayku mana kusisqachu karqani. Chayna kasqanwanmi yuyarirurqani Jehova Diosqa kusisqa servinanchikta munasqanta (Sal. 100:2).

KAQMANTAM KUSISQAÑA DIOSMANTA WILLAKURQANI

Iñiqmasinchik Tamara hinam ñuqapas kusisqa kayta munarqani chaypaqqa kallpanchakunaymá karqa. Chaymi runamasinchikkunaman manaraq willakuq richkaspay wasillaypiraq sumaqta yachaykuq kani. Hinaspaypas wakin killaqa 50 horatam willakuq kani, chaynata ruwaspaymi manaña manchakuspay willakurqani, bibliatapas allintañam servichikurqani. Chaymantam sapa killa 50 horata willakunaypaq tantiarurqani.

Chaymantapas, Diosman sunqu kaq iñiqmasinchikkunawanmi astawan kuskanchakuyta qallaykurqani. Paykunam yanapawarqa imamantapas puntataqa Diospa kaqkunata ruwanaypaq. Tukuy chaykunam yanapawarqa kusisqaña Diosmanta willakunaypaq, chaymi sapa killa 70 horata willakunaypaq tantiarurqani.

CASARAKUSQAYMANTA

Chaymanta huk wata pasaytam tukuy sunqunwan Diosta serviq Alexta riqsirurqani. Payqa iñiqkunapi punta apaqkunapa yanapaqnin hinaspa suqta wataña precursormi kasqa. Malaui nacionpipas Diosmantam willakusqa, chaypis riqsirusqa tukuy tiemponkuwan Diosmanta willakuq huklaw nacionniyuq iñiqmasinchikkunata. Paykunam Alextaqa kallpancharqaku hinalla tukuy sunqunwan Diosta servinanpaq.

2003 watapim casarakururqaniku, chaymantapacham tukuy tiempoykuwan Diosta servichkaniku. Anchatamá Jehova Diosqa yanapaykuwarqaku.

HUKLAW NACIONMAN RISQAYKUMANTA

2009 watapim Timor sutiyuq nacionpi Diosmanta willakunaykupaq niykuwarqaku, chaywanqa anchatam kusikurqaniku. Pichqa killamantam Timor nacionman rirqaniku.

Timor nacionpiqa manam llaqtaykupi hinachu imapas karqa. Huk rimaytataqmi yachanaykupas karqa. Chaypi runamasinchikkunaqa wakcha hinaspa autoridadkunapa ñakarichisqanmi kasqaku, manataqmi llapankuchu warma kaspanku escuelaman risqaku. Achka runamasinchikkunataqmi guerra karusqanrayku ñakarisqaku.a

Chay nacionpi runamasinchikkunaman Diosmanta willaspaykum anchata kusikurqaniku. Huk kutipim willakuchkaspay riqsirurqani Mariab sutiyuq warmachata. Paypa mamanqa chay watakunallam wañukusqa, papanñataqmi mana paywanchu yacharqa. Huk kutipim waqakuspan willawarqa imayna tarikusqanmanta. Ichaqa rimayninta mana sumaqta yachasqayraykum mana entienderqanichu. Chaymi Jehova Diosta mañakurqani Mariapa sunqunta tiyaykachinaypaq, hinaspaymi bibliapa nisqankunata leepurqani. Tiempopa pasasqanman hinam Mariaqa bautizakururqa. Bibliamanta yachaspanmi kusisqa kawsakurqa. Payqa huk runakunamanñam Diosmanta yachachichkan. Mariaqa anchatam kusikun achka iñiqmasinchikkuna paypa ayllun hina kasqanwan.

Jehova Diosmi Timor nacionpi iñiqmasinchikkunata yanapachkan paymanta willakunankupaq. Pasaq chunka watapim achka bautizakururqaku. Paykunamanta achkaqmi kanku precursorkunaña, iñiqkunapi punta apaqkunaña hinaspa paykunapa yanapaqninña. Wakinkunañataqmi rimayninkupi qillqakuna ruwaypi yanapakuchkanku. Anchatam kusikuni paykuna tukuy sunqunkuwan hinaspa kusisqa Jehova Diosta servisqankuwan.

KUSISQAMÁ KAWSAKUNI

Timor nacionpiqa manam imapas llaqtaykupi hinachu, chaywanpas kusisqam karqaniku Diosmanta willakuspayku. Wakinpim maymanpas rinaykupaq carropi huntay-huntay riq kaniku. Wakinpiñataqmi llumpayta rupakamuptinpas bibliamanta yachachiq kaniku.

Tayta-mamaytam anchata agradecekuni warma kaptiy Diosmanta yachachiwasqanmanta hinaspa sipasyaptiypas yanapaykuwasqanmanta. Paykunaqa Proverbios 22:6 nisqanman hina uywawanankupaqmi kallpanchakurqaku. Paykunaqa Jehova Diosta qusaywan kuska tukuy sunquykuwan servisqaykumantam anchata kusikunku. 2016 watapim Australasia betelmanta niwarqaku llaqtan-llaqtan watukuq kanaykupaq, chay watamantam iñiqmasinchikkunata watukuchkaniku.

Ñawpaqtaqa manam kusisqachu willakurqani. Kunanqa kusisqañam Diosmanta willakuni. Ima sasachakuyña kaptinpas hinalla tukuy sunqunchikwan Diosta servispanchikqa kusisqam kanchik. Ñuqaqa 18 watañam qusaywan kuska Diosta servichkani. Davidpa nisqanman hinam tarikuniku. Paymi nirqa: “Kusikuchunkuyá qampi amparakuy maskaq runakunaqa. Kusikuymantayá wiñaypaqraq takichunku runakunaqa. [...] Chaymi qamrayku kusikunku kuyaqnikiqa”, nispa (Sal. 5:11).