Pi kuyasqanchikpas Jehova Diosmanta karunchakuruptin

1. Pipas Jehova Dios serviyta saqiruptinqa, ¿imaynam ayllunkuna tarikun?

PIPAS qarqurachikuptinqa utaq Dios serviyta saqiruptinqa ayllunkunam anchata llakikunku. Iñiqmasinchik Hildamb nin: “Qusaywanqa 41 watam casarasqa karqaniku. Payqa Diosman sunqum wañukurqa. Pay wañukuptinmi anchata llakikurqani, ichaqa astawanraqmi llakikurqani waway Jehova Diosta hinaspa warmintawan churinkunata saqiruptinqa”, nispa.

2, 3. Salmos 78:40, 41 nisqanman hinaqa, ¿imaynataq Diosqa tarikun pi serviqninpas qipancharuptin?

² ¡Maynatachá Jehova Diosqa llakikurqa achkallay-achka angelninkuna qipancharuptinqa! (Jud. 6). ¡Maynatataqchá llakikurqa kuyasqan Israel runakuna sapa kuti mana kasukuptinkupas! (Qaway Salmos 78:40, 41). Chaynaqa, manamá iskayrayachwanchu pi kuyasqanchikpas Dios serviyta saqiruptin kikin Diospas llakikusqanmantaqa. Payqa yachanmi imayna tarikusqanchikta, chaymi payqa yanapawasun hinaspa kallpanchawasun.

³ Kay yachachikuypim yachasun kuyasqanchik ayllunchik qarquchikunanpaq mana huchayuq kasqanchikmanta. Yachasuntaqmi Jehova Dios yanapawananchikpaq ima ruwanamantapas hinaspa qarqusqa aylluyuq iñiqmasinchikkunata imayna yanapanamantapas.

AMAYÁ “HUCHAYMI” NISUNCHU

4. ¿Imaynam tayta-mamakuna tarikunku kuyasqanku warmanku qarqurachikuptin?

⁴ Achka tayta-mamakunam kuyasqanku churi-wawanku qarqurachikuptin anchata llakikunku “Diosman sunqu kananpaqchiki astawanraq yanapayman karqa” nispanku. Iñiqmasinchik Lukem nin: “Kuyasqay churiy qarqurachikuptinmi ‘mana allin tayta kasqayraykuch qarqurachikun’ nirqani. Manam puñuytapas atirqanichu. Waqasqallaypim tarikurqani, sunquypas anchatam nanawaq”, nispa. Iñiqmasinchik Elizabetpas ninmi: “Waway qarqurachikuptinmi ‘manachiki allintachu yanaparqani Diosman sunqu kananpaq’ nispay chayllapiña piensaq kani”, nispa.

5. Pipas Diosta saqiruptinqa, ¿pitaq huchayuq?

⁵ Jehova Diosqa unanchawarqanchik sapakama imapas tantiakuqtam. Chaymi sapakama tantiakunanchik kasukunapaq utaq mana kasukunapaqpas. Wakin churi-wawakunaqa tayta-mamanku Diosta servinankupaq mana yachachichkaptinkupas kikinkumantam Diosman sunqu kanku. Wakinkuñataqmi taksachankumanta Diosman sunqu kanankupaq yachachichkaptinkupas wiñaruspankuqa paymanta karunchakurunku. Manam pitapas hikutachwanchu Diosta servinanpaqqa (Jos. 24:15). Tayta-mamakuna, churi-wawaykichik qarqurachikuptinqa amayá niychikchu “ñuqapa huchaymi” nispaqa. Kikinkumantam karunchakunkuqa.

6. ¿Imaynataq churi-wawakuna tarikunku taytanku utaq mamanku qarqurachikuptin?

⁶ Wakinpiqa taytam utaq mamam Diostawan ayllunta saqirun (Sal. 27:10). Chayna kaptinqa churi-wawakunapaqqa aswan llakikunapaqmi. Esthermi nin: “Papay qarqurachikuptinmi sapa punchaw waqasqallaypi tarikuq kani. Payqa manam pisi-pisimantachu Diosmantaqa karunchakururqa, aswanqa qunqayllamantam saqirurqa, chaymi anchata llakikurqani. Papaytaqa anchatam kuyani, chaymi ¡imaynaraq kachkan! nispay llakikuq kani. Chaymantapas, muspaypi hinam tarikuq kani”, nispa.

7. Taytanku utaq mamanku Dios serviyta saqiruptinqa, ¿imamantam mana iskayrayanankuchu churi-wawakuna?

⁷ Churi-wawakuna, taytaykichik utaq mamaykichik Dios serviyta saqiruptinqa ñuqaykupas anchatam llakikuniku. Jehova Diosqa allintapunim yachan imayna tarikusqaykichiktaqa. Payqa anchatam kuyasunkichik, hinaspapas kusikunmi payman sunqu kaptikichikqa. Ñuqaykupas kusikunikum, hinaspapas kuyaykikum. Amayá chaymantaqa haykapipas iskayrayaychikchu. Taytaykichik utaq mamaykichik Dios serviyta saqiruptinqa manam huchaykichikchu. Yachamusqanchikman hinam Jehova Diosqa munan sapakama tantiakunanchikta. Bibliam nin: “Sapakamamiki qipinchiktaqa apasunchik”, nispa (Gal. 6:5).

8. ¿Imatam ruwachkachwan qarqurachikuq ayllunchik Diosman kutimunankama? (Qawaytaq “Kutimunaykitam Jehova Diosqa munan” niqtapas).

⁸ Pi kuyasqanchikpas Jehova Dios serviyta saqiruptinqa anchatam munanchik wanakuspan Diosman kutirikamunanta. Manaraq kutimuptinqa, ¿imatam ruwachkachwan? Allin iñiyniyuq kanapaqmi hinalla kallpanchakunanchik. Chayna kaptinchikqa wakin ayllunchikpas qatipakuwasunmi, qarqusqa ayllunchikpas cuentata qukuspanmi Diosman kutimunman. Chaymantapas allin iñiyniyuq kaspaqa manam llumpaytaqa hukmanyarusunchu, nitaqmi llakisqallañaqa kasunchu.

¿IMATAM RUWANANCHIK HINALLA ALLIN IÑIYNIYUQ KANAPAQ?

9. ¿Imatam ruwachwan allin iñiyniyuq kanapaq? (Qawaytaq “¿Ima textokunataq yanapawachwan pi ayllunchikpas qarqurachikuptin?” niqtapas).

⁹ Pi ayllunchikpas qarqurachikuptinqa astawanraqmi kallpanchakunanchik Diosman sunqu kanapaq hinaspa ayllunchikwanpas huk sunqulla kanapaq. Allin iñiyniyuq kanapaqqa sapa punchawmi bibliata ñawinchaspa chaypi yuyaymanananchik, hinaspapas huñunakuykunamanmi rinanchik. Yoana sutiyuq iñiqmasinchikpam taytanwan ñañan Dios serviyta saqirurqaku. Ima yanapasqanmantam nin: “Abigailmanta, Estermanta, Jobmanta, Joseymanta, Jesusmanta hinaspa hukkunamanta bibliapi leespaymi hawka tarikuni. Paykunamanta yachaspaymi mana llumpay hukmanyasqallañachu tarikuni. Sapa killapaq lluqsimuq videonchikkunapi takichakunapas anchatam yanapawan”, nispa.

10. Salmos 32:6-8 nisqanman hinaqa, ¿imatam ruwachwan llumpay llakisqa tarikuspanchik?

¹⁰ Llakisqa tarikuspanchikqa Jehova Diosmanmi lliwta willakunanchik. Mañakunanchiktaqmi mana llumpayta hukmanyarunapaq hinaspa imatapas yachaywan ruwanapaq yanapawananchikpaq (qaway Salmos 32:6-8). Wakinpiqa sasam kanman imayna tarikusqanchikmanta willayqa, chaywanpas Jehova Diosqa munanmi payman willakunanchikta. Payqa anchatam kuyawanchik (Ex. 34:6; Sal. 62:7, 8).

11. Hebreos 12:11 nisqanman hinaqa, ¿imanasqataq nichwan huchallikuqpa qarqusqa kayninqa Dios kuyawasqanchikrayku kasqanta? (Qawaytaq “Jehova Dios kuyawaspanchik corregiwasqanchikmanta” niqtapas).

¹¹ Jehova Diosmi nin pipas huchanmanta mana wanakuptinqa qarqusqa kananpaq. Chaytaqa niwanchik huchallikuqtawan ñuqanchikta anchata kuyawaspanchikmi. Iñiqkunapi punta apaqkunapa tantiasqanwanqa manam hukmanyananchikchu (qaway Hebreos 12:11). Wakin iñiqmasinchikkunam allinta mana yachasqankurayku ninmanku punta apaqkuna pantarusqankuta. Ichaqa manamá iskayrayananchikchu Jehova Diospa atiyninwan imatapas tantiasqankumantaqa. Paykunaqa “manam runakunapaqchu” imatapas ruwanku, aswanqa “Diospaqmi” (2 Cron. 19:6).

12. ¿Imanasqataq iñiqmasinchikkunapaq ancha allin karqa warmanku qarqurachikuptin Diosta kasukuyninku?

¹² Pi ayllunchikpas manaña Diospa testigon kananpaq iñiqkunapi punta apaqkunapa tantiasqankutaqa allinpaqmi hapinanchik. Chaynapim qarqusqa kaq ayllunchiktapas yanapachwan kaqmanta kutimunanpaq. 4 parrafopi rimamusqanchik Elizabetmi nin: “Yuyayniyuq wawaywan mana kuska kayqa hinaspa paywan mana rimayqa sasam karqa. Kutiramuspanmi ichaqa nirqa qarqusqa kasqanqa allinninpaq kasqanta, chaywanmi yachani Jehova Diosqa kuyawasqanchikrayku corregiwasqanchikta”, nispa. Mark sutiyuq qusanpas nintaqmi: “Churiymi niwarqa Diosta kasukuspayku paywan mana hukllawakusqaykurayku kutimunanpaq tantiakusqanta. Jehova Diostam anchata agradecekuni kasukuq kanaykupaq yanapawasqankumanta”, nispa.

13. ¿Imatam ruwachwan mana hukmanyasqallaña kanapaq?

¹³ Chaymantapas, allin iñiyniyuq iñiqmasinchikkunawanmi hukllawakunanchik. Paykunam yanapawasun mana hukmanyasqallaña kanapaq (Prov. 12:25; 17:17). 9 parrafopi rimamusqanchik Yoanam nin: “Sapallay hinam tarikurqani, ichaqa allin amistadniykunam yanapawarqa”, nispa. Chaywanpas, ¿imatam ruwachwan pi iñiqmasinchikpas rimasqanwan sientirachiwaptinchikqa?

14. ¿Imanasqataq hinalla aguantanakunanchik hinaspa sunqumanta pampachanakunanchik?

¹⁴ Amayá chaylla piñakuruqqa kasunchu. Llapallanchikmi pantaq runa kanchik, chaymi iñiqmasinchikkunaqa imapas rimasqankuwan wakinpiqa sientirachiwachwan (Sant. 3:2). Apostol Pablom nirqa: “Piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik”, nispa (Col. 3:13). Qarqusqa aylluyuq iñiqmasinchikmi nin: “Wakin iñiqmasinchikkunam yanapawayta munaspanpas rimasqankuwan sientirachiwaq. Paykunata pampachanaypaqmi Jehova Dios yanapawarqa”, nispa.

¿IMAYNATAM LLAPANCHIK YANAPACHWAN?

15. ¿Imaynatam qarqusqa kaqpa ayllunta yanapachwan?

¹⁵ Qarqusqa aylluyuq iñiqmasinchikkunataqa kuyakuywanmi rimapayananchik. Mirianmi nin: “Turiy qarqurachikuptinmi manchakurqani huñunakuypi iñiqmasinchikkuna ima rimanankumanta. Wakin iñiqmasinchikkunam ichaqa ñuqawan kuska llakikuqku. Paykunaqa manam turiymantaqa mana allinkunataqa rimaqkuchu. Paykuna yanapaykuwaptinmi mana sapallay hinachu tarikurqani”, nispa. Huk iñiqmasinchikpas ninmi: “Warmayku qarqurachikuptinmi iñiqmasinchikkuna wasiykuman hamuspa kallpanchawaqku. Wakinkuñataqmi niwarqa mana imatapas niy atisqankuta, chaywanpas waqaykaysiwarqakum. Qillqamuwasqankupas sunquytam tiyaykachirqa”, nispa.

16. ¿Imatam ruwachwan qarqusqa aylluyuq iñiqmasinchikkunata hinalla yanapanapaq?

¹⁶ Qarqusqa aylluyuq iñiqmasinchikkunataqa hinallam yanapananchik. Kunanmi astawanraq necesitanku kuyananchikta hinaspa kallpanchananchikta (Heb. 10:24, 25). Wakin iñiqmasinchikkunam ninku paykuna qarqusqa kachkanmankupas hina wakin iñiqmasinchikkuna mana rimapayasqankuta. Chayqa manamá allinchu. Taytanku utaq mamanku qarqurachikuptinqa astawanraqmi warmakunataqa yanapananchik, hinaspapas Diosman sunqu kasqankumantam alabaykunanchik. Iñiqmasinchik Mariam nin: “Qusay qarqurachikuspanmi saqiruwarqaku. Chaymi wakin iñiqmasinchikkuna hamuspanku yanuykapuwarqaku. Yanapawarqataqmi wawaykunata yachachiypipas. Paykunaqa waqaysiwarqam. Huk runakuna mana allinkunata ñuqamanta rimaptinpas yanapawarqakum”, nispa (Rom. 12:13, 15).

17. ¿Imatam iñiqkunapi punta apaqkuna ruwanmanku llakisqa tarikuq iñiqmasinchikkunata yanapanankupaq?

¹⁷ Iñiqkunapi punta apaqkuna, qamkunam astawanqa qarqusqa kaqpa ayllunta yanapanaykichikpaqqa tukuyta ruwanaykichik (1 Tes. 5:14). Paykunaman asuykuspaykichikyá kallpanchaychik huñunakuy manaraq qallarichkaptin chaynataq huñunakuy tukuruptinpas. Watukuspaykichikmi paykunawan kuska Diosta mañakuwaqchik. Willakuqpas paykunawantaqmi riwaqchik, qayaykuwaqchiktaqmi aylluykichikwan kuska Diosta yupaychanaykichikpaqpas. Iñiqkunapi punta apaqkunaqa ovejata michiq hinam llakisqa tarikuq Diospa serviqninkunataqa kuyakuywan yanapanaykichik (1 Tes. 2:7, 8).

JEHOVA DIOSPI HAPIPAKUSPAYÁ HINALLA SUYASUN

18. 2 Pedro 3:9 nisqanman hinaqa, ¿qarqusqa kaqkuna ima ruwanankutam Diosqa munan?

¹⁸ Jehova Diosqa manam munanchu pipas wañunantaqa, “payqa munachkan llapallan runakuna huchankumanta wanakunankutam” (qaway 2 Pedro 3:9). Qarqusqa kaqkuna ima huchataña ruwaruptinkupas hinallam Diosqa kuyan. Payqa llapallanchikpaq wañunanpaqmi kuyasqan churintapas kachamurqa. Diosqa kuyakuq kasqanraykutaqmi karunchasqa kaqkuna payman kutimunankupaq yanapayta munan. Payqa suyachkan Jesuspa rikchanachisqanpi taytanmanta karunchakuruq churi hina kutimunankutam (Luc. 15:11-32). Achkam qarqusqa kasqankumanta taytanchik Jehova Diosman kutiramunku, iñiqmasinchikkunañataqmi kusikuywan chaskiykunku. Elizabetmi wawan kutiramuptin anchata kusikurqa. Paymi nin: “Mana amiruspa hinalla suyanaypaq kallpanchawaqniy iñiqmasiykunatam anchata agradecekuni”, nispa.

19. ¿Imanasqataq hinalla Diospi hapipakunanchik?

¹⁹ Jehova Diospiyá hapipakusun. Payqa allinninchikpaqmi imatapas niwanchik, hinaspapas llapallan iñiqmasinchikkunatam anchata kuyan. Ima sasachakuypiña tarikuptinchikpas payqa manapunim saqiwasunchu (Heb. 13:5, 6). 12 parrafopi rimamusqanchik Markmi nin: “Jehova Diosqa manam haykapipas saqiwarqakuchu. Ima sasachakuypiña kaptiykupas yanapawarqakum”, nispa. Arí, Jehova Diosqa hinallam kallpata quwasun ima sasachakuyta atipanapaqpas (2 Cor. 4:7). Chaynaqa, atichwanmi kuyasqanchik ayllunchik Dios serviyta saqiruptinpas kutimunanta suyaspa hinalla Diosman sunqu kaytaqa.