Ancha llakipayakuqmi Diosninchikqa

1. ¿Imaynataq llakipayakuq runaqa?

¿IMAYNA runatataq ninchik “llakipayakuqmi” nispa? Chaynataqa ninchik kuyakuq hinaspa imapas qukuykuq runatam. Chaynam karqa Jesuspa willakusqan Samaria llaqtayuq runa, payqa suwakunapa maqapasqan runata ‘qawaykuspanmi llakipayarikurqa’, hinaspanmi yanapaykurqa (Luc. 10:29-37). Chay rikchanachiywanmi yachanchik Jehova Diosqa ancha llakipayakuq kasqanta, payqa kuyawaspanchikmi sapa punchaw imapipas llakipayawanchik.

2. ¿Imaynaraqtaq llakipayakuq runaqa?

² Llakipayakuq runaqa pi pantaruptinpas pampachaykunmi. Jehova Diospas chaynam, “manam huchanchikman hinachu castigawanchik” (Sal. 103:10). Chaywanpas Jehova Diosqa mana wanakuq runataqa correginmi.

3. ¿Imakunamantam kay yachachikuypi yachasun?

³ Kay yachachikuypim yachasun imanasqa Jehova Dios llakipayakuq kasqanmanta hinaspa pitapas corregiykuyqa imanasqa llakipayaykuy kasqanmanta. Yachasuntaqmi ñuqanchikpas llakipayakuq kanamanta.

¿IMANASQATAQ JEHOVA DIOSQA LLAKIPAYAKUQ?

4. ¿Imanasqataq Jehova Diosqa llakipayawanchik?

⁴ Kuyakuq kasqanraykum. Apostol Pablom hanaq pachapaq akllasqakunaman qillqaspan nirqa: “Jehova Diosqa ‘ancha llakipayakuq Diosmi’”, nispa (Efes. 2:4-7). Diosninchikqa manam hanaq pachapaq akllasqakunallatachu llakipayan, aswanqa llapallanchiktam. Chaymi bibliapas nin: “Tayta Diospa kuyakuyninqa llapallan runakunapaqmi, tukuy unanchasqankunatam llakipayaspa waqaychan”, nispa (Sal. 145:9, CQ12). Jehova Diosqa kuyawasqanchikraykum llakipayawanchik, chaymi imapiña pantaruptinchikpas wanakuptinchikqa pampachaykuwanchik.

5. ¿Imanasqataq Jesusqa yacharqa Jehova Diosqa llakipayakuq kasqanta?

⁵ Jesusqa manaraq kay pachaman hamuchkaspanmi hanaq pachapi una-unay wata taytan Jehova Dioswan karqa. Chaymi yacharqa taytanqa ancha llakipayakuq kasqanta (Prov. 8:30, 31). Jesusqa achka kutitam rikurqa Diosqa huchayuq runakunata llakipayaspan pampachaykusqanta (Sal. 78:37-42). Chaymi hukkunaman yachachispanqa taytan llakipayakuq kasqanmanta yachachirqa.

6. ¿Imamantam Jesus willakurqa taytan llakipayakuq kasqanmanta yachananchikpaq?

⁶ Pasaq yachachikuypim yachamurqanchik mana allinta tantiakuq musumanta Jesuspa willakusqanmanta. Chaytaqa willakurqa Jehova Dios llakipayakuq kasqanta yachananchikpaqmi. Chay musuqa wasinmanta ripukuspanmi “mana allinta kawsaspan tukuy imanta” tukururqa (Luc. 15:13). Chaymi wanakuspan wasinman kutirqa. ¿Wasinman kutiruptinqa taytanqa pampachaykurqachu? Arí. Jesusmi willakurqa: ‘Karullapiraq kachkaptinmi taytanqa rikuruspan llakipayarikurqa, chaymi kallpaspan kusikuyllawanña abrazaykurqa hinaspam kuyakuywan muchaykurqa’, nispa. Chay musutaqa taytanqa manam qaqcharqachu, aswanqa kaqmantam wasinpi chaskiykurqa. Hinaspapas mana allin ruwasqankunamanta wanakusqanraykum pampachaykurqa. Chay willakuywanmi Jesusqa yachachiwarqanchik pipas huchallikuruspan wanakuptinqa Jehova Dios pampachaykusqanta (Luc. 15:17-24).

7. ¿Imanasqaraqtaq Jehova Diosqa llakipayawanchik?

⁷ Yachayniyuq kasqanraykum. Arí, Diosqa yachayniyuq kasqanraykum imatapas allinninchikpaq tantian. Bibliam nin Diosqa yachayniyuq, llakipayakuq hinaspa ‘tukuy imapi allin ruwaq’ kasqanta (Sant. 3:17). ‘Imaynam kuyakuq tayta churinkunata llakipayan, chaynam Jehova Diospas llapallanchikta llakipayawanchik’ (Sal. 103:13; Is. 49:15). Payqa ima mana allintapas ruwaruspa wanakuptinchikqa pampachaykuwanchikmi. Ichaqa yachayniyuq kasqanraykum munasqanchikpi purikunanchiktaqa mana munanchu.

8. ¿Imanasqataq mana wanakuqkunaqa qarqusqa kanku?

⁸ Pi iñiqmasinchikpas mana wanakuspan huchallapi purikuptinqa, ¿imatam ruwachwan? Bibliam nin: “Amayá hukllawakuychikchu [...], chayna runakunawanqa”, nispa (1 Cor. 5:11). Chaymi huchanmanta mana wanakuqkunaqa qarquchikuspanku manaña Jehova Diospa testigonchu kanku. Chayqa allin mana ima huchapipas purinanchikpaqmi hinaspa Jehova Diospa sutin mana pinqaypi kananpaqmi. Wakinkum ninku: “Qarquspankuqa manam llakipayachkankuchu”, nispa. ¿Chaynachu kanman? Chaymantayá yachaykusun.

¿IMANASQATAQ MANA WANAKUQTA QARQUYQA LLAKIPAYAKUQ KAY?

9, 10. (1) Hebreos 12:5, 6 nisqanman hinaqa, ¿imanasqataq mana wanakuqta qarquyqa llakipayakuq kay? (2) ¿Ima rikchanachiytaq chaymanta sumaqta yachachiwanchik?

⁹ Pi iñiqmasinchikpas qarqurachikuptinqa anchatam llakikunchik, chayrayku ichapas nichwan: “¿Qarqunankuraqchu karqa? ¿Imaynataq qarquruyqa llakipayakuy kanman?”, nispa. Pipas mana allinta ruwaptin mana corregiykuspanchikqa manam yachayniyuqchu, kuyapayakuqchu nitaq llakipayakuqchu kachwan (Prov. 13:24). Achka iñiqmasinchikkunam huchankurayku qarqurachikuspanku chayraq cuentata qukunku imapas mana allin ruwasqankumanta, hinaspam mana allin ruwasqankuta saqispanku kaqmanta Diosta servichkanku (qaway Hebreos 12:5, 6).

¹⁰ Pitapas corregiyqa, ¿imanasqataq llakipayaykuy? Chaymanta yachanapaq rimarisun unquq ovejamanta. Dueñon cuentata qukuruspanqa chay unquq ovejatam sapaqcharun, chaynapi wakinkunapas mana chay unquywan hapirachikunanpaq. Chay ovejaqa wakin ovejakunawan costumbrasqa kasqanrayku ichapas mana rakikuyta munanqachu. ¿Chayraykuchu nichwan michiqninqa mana llakipayakuq kasqanta? Manam. Michiqqa ovejataqa rakin hampiyta munaspanmi hinaspa wakinkunatapas chay unquy mana hapirunanpaqmi (tupachiy Levitico 13:3, 4 nisqanwan).

11. (1) ¿Imanasqataq huchanmanta qarqurachikuq runaqa unquq ovejacha hina? (2) ¿Imatam huchanmanta qarquchikuqqa hinalla ruwayta atinman?

¹¹ Pipas mana wanakuspan qarquchikuqqa Jehova Dioswan mana allin kasqanraykum unquq ovejacha hina tarikun (Sant. 5:14). Imaynam ima unquypas mana hampisqaqa mirarun, chaynam pipas mana corregisqaqa wakin iñiqkunatapas pantarachinman. Chaymi mana wanakuq runaqa manaña wakinkunawan kuskaqa Diostaqa servinmanchu. Jehova Diosqa chayna kananpaqqa tantian hinalla paypi hapipakuqkunata kuyasqanraykum hinaspa qarquchikuq runatapas yanapayta munasqanraykum. Qarquchikuqqa hinallam huñunakuykunamanqa hamunman, chaynapi hinalla Diosmanta yachananpaq hinaspa astawan paypi hapipakunanpaq. Chaymantapas, qillqanchikkunatapas hinallam leenman, sapa killa lluqsimuq videonchiktapas hinallam qawanman. Allintaña ruwasqanta qawaspankuqa punta apaqkunapas ninmankum imapiraq astawan kallpanchakunanpaq, chaynapi kaqmanta ñuqanchikwan kuska Jehova Diosta servinanpaq.b

12. ¿Imatam punta apaqkunaqa kuyakuq hinaspa llakipayakuq kasqankurayku ruwanmanku pi huchallikuqpas mana wanakuptinqa?

¹² Qarqusqaqa kanku huchankumanta mana wanakuqkunallam. Chaymi punta apaqkunaqa sumaqta tantiananku huchayuq qarqusqa utaq mana qarqusqa kananpaq. Manam qunqanankuchu Jehova Diosqa llakipayaspan pitapas ‘faltanmanta corregisqanta’ (Jer. 30:11) Punta apaqkunaqa huchallikuruq iñiqmasinchiktam yanapaykuyta munanku, manam munankuchu Dios serviyta saqirunankutaqa. Chaywanpas wakinpiqa Jehova Diospa testigon manaña kananpaqmi tantianku. Chaynataqa tantianku huchallikuqta kuyasqankuraykum hinaspa llakipayasqankuraykum.

13. ¿Imanasqataq Corinto llaqtapi huk runata qarqunanku karqa?

¹³ Apostol Pablopa tiemponpim Corinto llaqtapi huk runa madrastrallanwan kakuchkarqa. Chayqa hatun hucham karqa. Jehova Diosmi Israel runakunata nirqa: ‘Pipas taytanpa warminwan kakuqqa taytantam pinqayman churachkan. Chaynaqa iskayninkum wañuchisqa kanqaku’, nispa (Lev. 20:11). Pabloqa chay runata wañuchinankupaq mana kamachispanpas qarqunankupaqmi nirqa. Chayna huchapi purikuspanmi wakin iñiqkunatapas pantachichkarqa. Wakinkum piensarqaku chay runapa imayna kawsakusqanqa manaña hucha kasqanta (1 Cor. 5:1, 2, 13).

14. ¿Imatam Pablo punta apaqkunata nirqa wanakuq runata llakipayaspan? (Rimarimuytaq 2 Corintios 2:5-8, 11 nisqanmantapas).

¹⁴ Tiempopa pasasqanman hinam apostol Pabloqa yacharurqa madrastrallanwan kakuq runaqa huchanmanta wanakusqanta. Chay runa Jehova Diospa sutinta pinqaypi churaruptinpas wanakusqanraykum Pabloqa llakipayaykurqa. Chaymi punta apaqkunata nirqa: “Chay runatam pampachanaykichik hinaspam sunqunta tiyaykachinaykichik”, nispa. Chaynataqa nirqa chay wanakuq runa “llumpay llakipa intusqan mana” kananpaqmi. Pabloqa manam munarqachu llumpay llakisqa kasqanrayku hinalla karunchasqa kanantaqa (qaway 2 Corintios 2:5-8, 11).

15. ¿Imapaqmi punta apaqkunaqa tantianku pipas mana wanakuptinqa? ¿Imatam ruwanku wanakuqwanqa?

¹⁵ Jehova Dios llakipayakuq kasqanraykum punta apaqkunapas llakipayakuq kanku. Chaywanpas huchallikuq mana wanakuptinqa qarqunankupaqmi tantianku. Wanakuptinmi ichaqa yanapanku kaqmanta Dioswan allin kananpaq. Punta apaqkuna mana corregispankuqa manachá llakipayakuqchu kanmanku. Chayraykum pipas huchallikuruptinqa mana saqinkuchu huchallapi purikunantaqa. Ichaqa, ¿punta apaqkunallachu llakipayakuq kananku? Manam. Chaymanta yachaykusun.

LLAPANCHIKMI LLAKIPAYAKUQ KANANCHIK

16. Proverbios 21:13 nisqanman hinaqa, ¿mana llakipayakuq kaptinchikqa Diosqa mañakusqanchikta uyarinqachu?

¹⁶ Ñuqanchikpas Jehova Dios hinam llakipayakuq kananchik. Mana llakipayakuq kaptinchikqa Diosqa manam mañakusqanchiktaqa uyarinqachu (qaway Proverbios 21:13). Ñuqanchikqa munanchik mañakusqanchikta uyariykuwananchiktam, chaymi runamasinchikkunawanqa llakipayakuq kananchik. Pipas sasachakuypi kaptinqa yanapaykunanchikmi. Chaymantapas, bibliapa nisqantam kasukunchik, chaypim nin: “Mana llakipayakuq runaqa juzgasqa kaspanmi mana llakipayasqa kanqa”, nispa (Sant. 2:13). Pantaq kasqanchikraykum imapipas pantanchik, chaymi munanchik hukkunapas llakipayaykuwananchikta. Chayraykum ñuqanchikpas hukkuna pantaptinqa llakipayaykunanchik. Astawanraqmi wanakuq iñiqmasinchikkunawanqa llakipayakuq kananchik.

17. ¿Imanasqataq kamachiq Davidqa Saulpa contranpi mana hatarirqachu?

¹⁷ Jehova Diosqa kuyakuq hinaspa llakipayakuq kanapaqmi yachachiwanchik. Diosta serviq Davidpas llakipayakuqmi karqa, chaymi kamachiq Saul wañurachiyta munaptinpas mana contranpiqa hatarirqachu (1 Sam. 24:9-12, 18, 19).

18, 19. ¿Pikunatataq Davidqa mana llakipayarqachu?

¹⁸ Huk kutipim ichaqa Davidqa mana llakipayakuqchu karqa. Davidmi Nabalta mañakurqa runankunamanwan mikuykachinanpaq. Nabalmi ichaqa Davidmanta mana allinta rimaspanraq mana mikuyta qurqachu. Chaymi Davidqa llumpayta piñakuruspan runankunapiwan Nabalta aylluntinta wañuchiq rirqaku. Chayta yacharuspanmi Nabalpa warmin Abigailqa taripaspan Davidta ruegakurqa ayllunta mana wañuchinanpaq. Chaynatam Davidta harkarurqa Diospa contranpi mana huchallikunanpaq (1 Sam. 25:9-22, 32-35).

¹⁹ Huk kutipiñataqmi Davidman Natan willarqa wakcha runapa sapallan ovejachanta apu runa qichurusqanmanta. Chayta uyariruspanmi Davidqa anchallataña chay runapaq piñakuspan nirqa: ‘Chayna ruwaq runaqa wañunanpunim’, nispa (2 Sam. 12:1-6). Jehova Diospa kamachikuyninpim nirqa pipas huk ovejata suwakuruspanqa tawa ovejataña dueñonman kutiykachipunanpaq (Ex. 22:1). Chaymi ‘chayna ruwaq runaqa wañunanpunim’ nispan Davidpa rimasqanqa llumpayñataq karqa. Natanqa chaytaqa willarqa huchankunamanta David cuentata qukunanpaqmi. Payqa ovejata qichuruq runamantaqa aswan mana allinkunataraqmi ruwarqa. Chaywanpas Jehova Diosqa llakipayaykurqam. Davidmi ichaqa chay ovejata qichuruq runata mana llakipayarqachu (2 Sam. 12:7-13).

20. ¿Imanasqataq wakinpiqa iñiqmasinchikkunata juzgachwan?

²⁰ Davidqa piñasqa kasqanraykum Nabaltawan aylluntaqa wañurachiyta munarqa. Piñasqa kaspantaqmi ovejata qichuruq runamanta Natan willaptinpas nirqa: “Wañunanpunim”, nispa. ¿Imanasqataq llakipayakuq kachkaspanqa chay runakunata wañurachiyta munarqa? Kikin huchallikuruspan mana allin tarikusqanraykum. Arí, mana allin tarikusqanchikraykum wakinpiqa iñiqmasinchikkunata juzgachwan. Jesusmi ichaqa nirqa: “Amayá hukkunata juzgaychikchu chaynapi mana juzgasqa kanaykichikpaq”, nispa (Mat. 7:1, 2). Chayraykum llapallanchik kallpanchakunanchik Jehova Dios hina llakipayakuq kanapaq.

21, 22. ¿Imatam ruwasun llakipayakuq kaspaqa?

²¹ Hukkunata llakipayayqa manam “llakikunim” niyllachu, aswanqa paykunata yanapaymi. Chaymi pi ayllunchikpas, pi iñiqmasinchikpas utaq pi vecinonchikpas yanapanapaq kaptinqa yanapaykunanchik. ¿Riqsinchikchu pipas hukmanyasqa tarikuqta? Hinaptinqa yanapaykuchwanmi mikuyllatapas haywaykuspa utaq imapipas yanapaykuspa. Pipas huchanmanta wankuspan kaqmanta kutiramuptinpas yanapaykuchwanmi paypa amistadnin kaspanchik. Runamasinchikkunatapas yanapachwantaqmi Diosmanta yachachispanchik (Job 29:12, 13; Rom. 10:14, 15; Sant. 1:27).

²² Pitapas imallapipas yanapaykuptinchikqa llakipayakuq kasqanchikmi sutilla kanqa. Chaynatam llakipayakuq Diosninchikta kusichisunchik.