¿Imanasqataq runakunaqa chiqninakunku?

Runakunaqa chiqninakuyllapiñam kachkanku. Qatiqninpim yachasun imaynam chiqnikuq runakuna kasqankumanta, imanasqa chiqnikuqllaña kasqankumanta chaynataq imaynata chiqninakuy mirasqanmanta.

¿Imaynataq chiqnikuq runakuna?

Chiqnikuq runakunaqa runamasintam maymanta kasqanman hina utaq imayna kasqanman hina mana imanachkaptinpas hukmanta qawanku. Chiqninakuyqa runapa sunqunpim kachkan.

¿IMANASQAM RUNAKUNAQA CHIQNIKUQLLAÑA KANKU?

Wakinqa runamasinkutam chiqninku mana imanachkaptinpas huklawmanta kasqankurayku utaq kikinku hina mana kasqankurayku. Wakinñataqmi chiqninku manchakusqankurayku, hatuntukuq kasqankurayku, pipas ñakarichisqanrayku.

¿IMAYNATAM CHIQNINAKUYQA MIRAN?

Wakin runakunaqa runamasinkutam mana riqsichkaspankupas chiqninku. Wakinñataqmi chiqninku runakunapa rimasqanta uyarispanku utaq runakunapa nisqanta kasukuspanku. Tukuy chaykunawanmi chiqnikuyqa astawanraq miran.

Chaywanmi cuentata qukunchik achka runakuna imanasqa chiqninakusqankumanta. Ichaqa, ¿imanasqaraqtaq chiqninakunku? Chaymantam qatiqninpi yachasun, chaymanta yachasqanchikqa yanapawasunmi mana chiqnikuq kanapaq.

BIBLIAPIM WILLAWANCHIK CHIQNINAKUY IMAYNA QALLARISQANMANTA

Kay dibujopim qawanchik runakuna imanasqa chiqnikuq kasqankumanta. 1. Llullata uyarisqankurayku: Internetpi, noticiakunapi hinaspa achka rimaptinku. 2. Mana yachaspa: Manam yachankuchu maymanta kasqankuta, ima kasta kasqankuta, mayqan religionniyuq kasqankuta. 3. Manchakuspa: Manchakunkum imapas kananmanta, mana yachasqankumanta, mana imayuq qiparunanmanta. 4. Chiqnikuspam alabakunku, maqanakunku, hukmanta qawanakunku.

¿PITAQ CHIQNINAKUYTAQA QALLARICHIRQA? Chiqninakuytaqa hanaq pachapim diablo qallarichirqa Diospa contranpi churakuspan. Chaywanmi diabloqa rikurirurqa runakuna wañuchiqña. Diabloqa “llullam hinaspapas llullakunapa taytanmi”. Paymi runakunata chiqninachispa mana allinkunata ruwanakunankupaq tanqan (Juan 8:44; 1 Juan 3:11, 12). Bibliapiqa nintaqmi diabloqa mana llakipayakuq hinaspa piñallaña kasqantapas (Job 2:7; Apocalipsis 12:9, 12, 17).

¿RUNAKUNAQA IMAYNATAM CHIQNINAKUYTA QALLAYKURQANCHIK? Adan sutiyuq runam satanasta qatipakurqa, chaymi mirayninkunapas llapallanchik pantaq hinaspa huchallikuq kanchik (Romanos 5:12). Adanpa piwi churin Cainmi sullkan Abelta chiqnisqanrayku wañurachirqa (1 Juan 3:12). Runakunaqa kuyapayakuq kaspanchikpas huchallikuq kasqanchikraykum chaylla piñakuq kanchik, kikillanchikpaq munaq kanchik, envidiakuq kanchik, hatuntukuq kanchik, chaykunawanmi chiqninakuyta hatarichinchik (2 Timoteo 3:1-5).

MANA RESPETAKUQQA CHIQNIKUQLLAÑAM. Bibliapim nin kay pachaqa satanaspa makinpi kasqanta. Chaymi runakunaqa kanku mana respetakuqllaña, mana kuyapayakuqllaña, kamikuqllaña, chiqnikuqllaña (1 Juan 5:19).

Bibliapiqa willawanchikmi chiqninakuy imayna qallarisqanmanta. Willawanchiktaqmi chiqninakuy manaña kananmantapas.