¿Yacharqankichu?

Roma nacionniyuq runakunaqa pitapas qirupi wañurachispankuqa, ¿pampaqkuchu?

Qatiqninkunam, Jesuspa cuerponta qirumanta uraykachichkanku chaynataq telakunawan wankuchkanku.

YAQA lliw runakunam yachanchik Jesustaqa iskay suwakunapa chawpinpi wañurachisqankumanta (Mat. 27:35-38). Bibliapim willawanchik Jesus wañukuptin cuerponta telakunawan wankuruspa qaqapi tukusqa sepulturaman churaykusqankumanta (Mar. 15:42-46). Wakin runakunam ichaqa ninku mana chayna kasqanmanta.

Bibliapa contranpi rimaqkunaqa ninkum Roma nacionniyuq runakunaqa suwakunataqa mana pampasqankumanta. Ariel Sabar sutiyuq periodistapas qillqanpim nin kaynata: “Suwakunatam cruzpi chakataqku, hinaspapas Roma llaqtayuq runakunaqa munaqkum suwakuna pinqaypi kanankuta hinaspa mana pampasqa kanankuta”, nispa. Roma nacionniyuq runakunaqa suwakuna hatun pinqaypi wañunankutam munaqku, chaymi saqiqku purun animalkuna cuerponta mikunanpaq. Atikuptillanmi chay suwapa puchuq cuerponta may uchkumanpas wischuykuqku.

Ñawpa tiempopi runakunapa imayna kawsasqanmanta estudiaq runakunaqa ninkutaqmi wakin judio runakuna suwa kaspankupas wañuruspankuqa pampasqa kasqankumanta. 1968 watapim Jerusalen llaqtapa hichpanpi tarirurqaku Jesuspa tiemponpi judio runakunapa tullunkunata. Tullukunatam tarirurqaku sumaq guardasqata, chaypitaqmi kasqa runapa talonninpas. Chay talonqa kasqa parten kaspiman clavasqa clavoyuqraqmi. Chay clavopa sayayninmi kasqa yaqa huk qimi. Ariel Sabar sutiyuq runaqa ninraqmi: “Chay tarisqanku runapa talonninqa karqa Jehohanan sutiyuq runapam. Chay talon tarisqankuwanmi yachanchik Jesuspa tiemponpi suwa kasqankurayku cruzpi wañuqkunataqa pampasqankumanta”, nispa.

Chay talon tarisqankuwantaqmi Jesuspa wañukusqanmantapas tukuy rimaykunataña rikurichirqaku. Hina chaywantaqmi yachanchik wakin suwakunaqa qirupi wañuspankupas pampasqa kasqankumanta chaynataq Jesuspa cuerponpas bibliapi nisqanman hina pampasqa kasqanmanta. Manataqmi may uchkumanpas wischusqachu karqa. Chayraykum bibliapi Jesuspa wañukuspan pampakusqanmantaqa mana iskayrayachwanchu. Chaytam yachaysapa runakunapa rimasqankunawanpas yachachkanchik.

Jehova Diosqa bibliapim nirqaña Jesuspa cuerponqa apukunapa sepulturanpi pampasqa kananmanta. Arí, Jehova Diospa tukuy ima rimasqanqa manam llullachu (Is. 53:9; 55:11).