2 | Palabranwan Dios sunqunchikta tiyaykachisqanmanta

BIBLIAM NIN: “Ñawpaq tiempopi tukuy ima qillqakusqanqa yachachiwananchikpaqmi qillqasqa kachkan. Chaynapi tukuy imata aguantaspanchik hinaspa Diospa qillqanwan sunqunchikta tiyaykachispanchik Diospa quwananchikta suyananchikpaq”, nispa (ROMANOS 15:4).

¿Ima ninantaq bibliapi chayna nisqanqa?

Bibliapa nisqankunaqa sunqunchiktam tiyaykachin, yanapawanchikmi tukuyta aguantanapaq hinaspa mana valeqpaq hapikusqanchik pensamientokunata controlanapaq. Bibliaqa prometewanchiktaqmi pisi tiempollamantaña llakikuykuna manaña kananmanta.

¿Imaynatataq yanapawanchik?

Llapanchikmi wakinpiqa preocupasqa utaq hukmanyasqa tarikunchik. Ichaqa depresionwan utaq ansiedadwan unquqkunaqa sapa punchawmi llakisqallaña utaq hukmanyasqallaña tarikunku. ¿Imaynatataq paykunata biblia yanapanman?

Bibliapiqa tarichwanmi sumaq achka yachachikuykunata, chaykunaqa yanapawachwanmi hukmanyachiwaqninchik pensamientokunata atipanapaq (Filipenses 4:8). Arí, bibliapa nisqankunaqa hawka kanapaqmi chaynataq mana hukmanyasqallaña kanapaqmi yanapawachwan (Salmos 94:18, 19).
Bibliaqa yanapawachwantaqmi mana valeqpaq hina hapikuptinchikpas (Lucas 12:6, 7).
Bibliapiqa achka yachachikuykunam kachkan mana sapallanchik kasqanchikta yachananchikpaq. Bibliapiqa niwanchiktaqmi imayna sientekusqanchikta taytanchik Jehova Dios allinta yachasqanmantapas (Salmos 34:18; 1 Juan 3:19, 20).
Bibliaqa niwanchikmi llakichiwaqninchik kaqkunata Jehova Dios chinkachinanmanta (Isaias 65:17; Apocalipsis 21:4). Sichu kunan mana allin pensamientokuna hukmanyachiwachkanchik hinaptinqa Diospa promesankunamanta yachasqanchikmi yanapawachwan.

¿Imaynatam biblia yanapan Jessicata?

Llumpay llakisqallaña utaq depresionwan kasqanmanta

Jessicam nin: “25 wataypi kachkaspaymi mana imapaq ganasniyuq tarikurqani (crisis nerviosa), chaymi doctorkuna niwarqaku depresionwan unqusqayta. Ñawpaqpi tukuy mana allinkuna pasasqaymi umayman hukraq-hukraq chayamuq (flashbacks), hinaptinmi controlaytapas mana atiqchu kani. Doctorkunam niwarqaku warma kaspay tukuy ima pasasqayrayku mana valeqpaq hapikusqaymanta hinaspa depresionwan kasqaymanta. Chayraykum hampita chaynataq doctorpa yanapakuyninta necesitarqani, chaynapi mana allin pensamientokunawan mana intuchikunaypaq”, nispa.

Biblia yanapasqanmanta

Jessicaqa nintaqmi: “Chay depresion unquywan kaspayqa llumpay mancharisqallaña hinaspa preocupasqallañam karqani, manam puñuytapas atiqchu kani. Achka tutakunam mana allin pensamientokuna umaypi hinalla muyuq. Ichaqa Salmos 94:19 nisqanman hinam Diosqa sunqunchikta tiyaykachin hinaspa hawkayaykachiwanchik ima llakipiña kaptinchikpas. Chaynam ñuqawanpas karqa, chaymi camaypa ladonpi karqa bibliay hinaspa kallpanchawananpaq cuadernoypi anotasqay bibliapa nisqankuna. Chaymi puñuyta mana atispayqa Dios sunquyta tiyaykachinanpaq palabranta leeq kani.

Bibliam yanapawanchik Diospa piensasqanman hina piensanapaq. Ñawpaqtaqa piensaq kani mana valeq kasqayta hinaspa mana kuyanapaq kasqaytam. Ichaqa cuentatam qukururqani chayna piensasqayqa mana bibliapa nisqanman hina kasqanta. Bibliapiqa ninmi Diosqa papanchik hina kuyakuq hinaspa llakipayakuq kasqanmanta, niwanchiktaqmi sapakamamanta preocupakusqanmantapas. Pisi-pisimantam ñuqaña pensamientoykunata controlarqani, manañam saqirqanichu pensamientoykuna ñuqata controlawanantaqa. Kunanqa Jehova Diospa piensasqanman hinañam kikiymantapas piensani, chaymi mana valeqpaq hinaqa manaña hapikuniñachu.

Munachkaniñam imapas umanchikman chayamuq chaynataq imapas pasawasqanchikkuna manaña hukmanyachiwananchikta. Hamuq tiempopiqa manañam kanqañachu depresionpas, ansiedadpas nitaq chayman rikchakuq ima unquypas. Chaymanta mana iskayrayasqaymi yanapawan depresionwan kachkaspaypas hinalla kallpanchakunaypaq”, nispa.