¿Imaynatam yanapachwan yuyayninkupi mana allin tarikuqkunata?

¿Ima ninantaq bibliapi chayna nisqanqa?

Hukkaqnin amistadninchik yuyayninpi mana allin tarikuptinqa manapaschá yachasunchu imayna yanapaykuyta. Ichaqa kuyasqanchikta yachanankupaqmi kallpanchakunanchik imallapipas yanapaykunanchikpaq.

¿Imaynatataq yanapaykuchwan?

SANTIAGO 1:​19 nisqanpim nin: “Chaylla uyariqyá kaychik”, nispa.

Kuyasqa amistadninchiktaqa uyariykuspallanchikmi yanapachkanchikña. Manam “¡imataya nisaq!” nispaqa manchakunanchikchu paywan parlaytaqa, aswanqa sunqumanta llakipayaspam sumaqta uyariykunanchik. Imanasqa chayna tarikusqanmantam allinta entiendenanchik, manam qaqchananchikchu nitaq juzgananchikchu. Wakinpiqa amistadninchikqa mana yuyaywanmi imatapas rimarunman hinaspam chaymanta pesapakunman, yuyarinanchikmi unqusqanrayku chayna kasqanta ( Job 6:​2, 3).

1 TESALONICENSES 5:​14 nisqanpim nin: ‘Hukmanyasqakunata kallpanchaychik’, nispa.

Yaqapaschá amistadnikiqa llumpay hukmanyasqallaña kachkan utaq mana valeqpaq hina sientekuchkan. Chayraykum paymanta preocupakusqaykita ninayki, chayta ruwaspaykim mana imatapas nispalla consuelaykunki hinaspa kallpanchaykunki.

PROVERBIOS 17:17 nisqanpim nin: “Ancha kuyakuq amistadqa imaña-haykaña ­kaptinpas hinallam kuyasunki, nispa”.

Yanapay munasqaykita niykuy hinaspa imapi yanapaykunaykimanta tapuykuy. Yaqapaschá amistadnikiqa ima necesitasqanmanta rimayta pinqakunman, chayna kaptinqa qanmi ninayki imatapas kuska ruwanaykichikpaq. Ichapas niwaq puriq rinaykichikpaq, rantipakuq rinaykichikpaq utaq wasinpi imapipas yanapaykunaykipaq (Galatas 6:2).

1 TESALONICENSES 5:​14 nisqanpim nin: ‘Llapallanwan paciencianakuychik’, nispa.

Unquq amistadnikiqa wakinpim rimayta mana munanqachu, chayna kaptinqa niwaqmi rimayta munaptinqa uyariykunaykipaq. Unqusqanraykum amistadnikiqa rimasqanwan, ruwasqanwan utaq chay punchaw imayna tarikusqanwan hukmanyachisunkiman, chayraykum yanapaspaykiqa entiendeykuspa pacienciawan yanapaykunayki (Proverbios 18:24).

Yanapasqaykiqa ancha allinmi kanman

Farraha sutiyuq warmim nin: “Kallpanchakunim allin amistad kanaypaq. Wakinpiqa manamá atisaqchu amistadniypa sasachakuyninkuna allichaytaqa, chaywanpas ñuqawan rimayta munaptinqa uyariykunaypaqmi kallpanchakuni. Wakinpiqa uyariykunallaytam necesitan allin tarikunanpaq”, nispa (paypa amistadninmi depresionwan, trastorno alimentario hinaspa ansiedadwan unqun).

Depresionwan unquq Ha-eun sutiyuq warmim nin: “Kanmi kuyakuqllaña hinaspa kusisqallaña amistadniy. Huk kutipim wasinman pusawaspan miski mikuychata yanuykapuwarqa. Ñuqawan kuyakuqllaña kasqanta qawasqayraykum imayna tarikusqayta willaykurqani chaymi payqa anchata kallpanchaykuwarqa”, nispa.

Jacob sutiyuq runam nin: “Pacienciakuq kayqa ancha allinmi. Warmichay sientechiwananpaq hina imatapas ruwaptinmi yuyarini unqusqanrayku chayna kasqanta. Chayta yuyariyniymi yanapawan paywan mana piñakurunaypaq hinaspa kuyakuywan yanapaykunaypaq”, nispa (paypa warmichanmi depresionwan unqun).

Ansiedadwan unquq Enrico sutiyuq runam nin: “Warmichayqa tukuy ima necesitasqaypim yanapawan hinaspa kallpanchawan. Ansiedadwan kaptiyqa manam hikutawanchu imapas mana munasqayta ruwanaypaqqa. Wakinpim payqa ñuqarayku imapas gustasqanta mana ruwanchu. Payqa kuyakuqllañam, ñuqaraykum tukuyta ruwan. ¡Anchatam kuyallani!”, nispa.