Astawan yachay munaqkunapaq

¿Imaynatam entiendenanchik Salmos 12:7 nisqanta?

Salmos 12 capitulota llapanta leeptinchikqa runamantam rimachkan.

Salmos 12:​1-4 nisqanpim David nirqa Diosman ‘sunqu runaqa manaña kasqanmanta’. Chaynaqa, Salmos 12:7 nisqanta imaynata entiendenamanta yachanapaqyá leeykusun Salmos 12:​5-7 nisqanta. Chaypim nin:

5 versiculopim nin ñakariq runakunata Dios harkaykunanmanta.

6 versiculopipas ninraqmi: “Jehova Diospa rimasqankunaqa mana pantayniyuqmi, […] chuyay-chuyay qullqi hinam”, nispa. Diosman sunqu kaqkunaqa manam iskayrayanchikchu chayna nisqan cierto kasqanmantaqa (Sal. 18:30; 119:140).

Salmos 12:7 versiculopiñataqmi nin: “Jehova Dioslláy, qanmi harkaykunki. Kunanmanta wiñaykamam sapakamata waqaychaykunki”, nispa. ¿Kaypi “harkaykunki” nispanqa rimachkan palabranta harkananmantachu icha runakunata harkananmantachu?

6 versiculopim nin: ‘Jehova Diospa rimasqankuna’, nispa. Chayraykupaschá wakinkuqa piensanku 7 versiculoqa palabranta Dios harkasqanmanta rimasqanta. Yachasqanchikman hinaqa, Diosqa palabran bibliataqa harkarqamá utaq waqaycharqamá chiqniqnin runakuna mana chinkarachinankupaq (Is. 40:8; 1 Ped. 1:25).

5 versiculopa nisqanpas ciertotaqmi. Jehova Diosqa ‘ñakariqkunataqa’ yanaparqam utaq harkarqam, hinallataqmi chaytaqa ruwanqa (Job 36:15; Sal. 6:4; 31:​1, 2; 54:7; 145:20).

Chaynaqa, ¿imamantam rimachkan 7 versiculopa nisqanqa?

Kaykama yachamusqanchikwanmi cuentata qukunchik runamanta rimasqanta.

Salmos 12:​1, 2 nisqanpim David nichkan runakuna llullallaña hinaspa iskay uyallaña rikurirusqankurayku paypas chaynataq hukkunapas ñakarisqankumanta. 3 versiculopiñataqmi nin hatuntukuspa alabakuqkunata Dios chinkachinanmanta. Qawasqanchikman hinam nichkan rimasqankuna mana pantayniyuq kasqanrayku Diosqa serviqninkunata yanapananpaq imatapas ruwananmanta.

Chaynaqa, 7 versiculopi “qanmi harkaykunki” hinaspa “sapakamata waqaychaykunki” nispanqa rimachkan mana allin runakunapa ñakarichisqan runakunata Dios yanapasqanmantam.

Ñawpaq testamentota hebreo idiomaman copiasqankupipas chay versiculopiqa runakunamantam rimachkan. Chaymantapas, Septuaginta sutiyuq bibliapim 7 versiculopi iskay kutikama nin ‘ñuqayku’ nispa. Chaywanmi yachanchik Diosman sunqu runakunapa ñakarisqankumanta rimasqanta. 7 versiculopiqa nintaqmi allin sunqu runakunata “sapakamata” ‘mana allin ruwaqkunamanta’ Dios waqaychaykunanmantapas (Sal. 12:​7, 8). Tárgum arameo nisqankupim 7 versiculo kaynata nin: “Señorlláy, allin ruwaq runakunatam waqaychaykunki, qanmi harkaykunki kunanmanta wiñaykama. Mana allin ruwaqkunaqa yawarta suquq uru hinam muyuriqniykupi kachkanku”, nispa. Tukuy chaykunawanmi yachanchik Salmos 12:7 nisqanqa Diospa palabranmanta mana rimasqanta.

Chayraykum chay versiculopiqa allin sunqu runakunata Dios cuidananmanta rimachkan.