Hatun huchata ruwaqwan Diospa imayna kasqantayá qatipakusun

1. ¿Imatam Jehova Diosqa llapallanchikpaq munan?

JEHOVA DIOSQA runataqa unancharqa imapaqpas kikinmanta tantiakuqtam. Chaymi sapa punchaw imapaqpas tantiakunchik. Diosqa anchata kuyawasqanchikraykum munan payllapaqña kawsakunapaq hinaspa serviqninkunawan kuska payta yupaychanapaq tantiakunanchikta. Chay tantiakuyqa imamantapas aswan allinmi. ¿Imanasqa? Chaypaq tantiakuspaqa Diospa amistadninmi kasun hinaspapas wiñaypaqmi kawsakusun (Deut. 30:​19, 20; Gal. 6:​7, 8).

2. ¿Hatun huchata ruwaqkuna imata ruwanankutam Diosqa munan? (Rimarimuytaq 1 Juan 2:1 nisqanmantapas).

² Chaywanpas Jehova Diosqa manam pitapas obliganchu payta servinanpaqqa, aswanqa sapakama tantiakunantam saqin. ¿Imataq pasanman bautizasqa iñiqmasinchik hatun huchaman wichiykuptin? Mana wanakuspanqa congregacionmantam qarqusqa kanan (1 Cor. 5:13). Chayna qarqusqa kaptinpas Diosqa anchatam munan huchanmanta wanakuspan payman kutirikunanta. Chayraykum churin Jesusta kay pachaman kachamurqa, chaynapi hatun huchata ruwaqkunapas Jesuspa wañukusqanwan pampachasqa kanankupaq (leey 1 Juan 2:1). Ancha kuyakuq kasqanraykum Diosninchikqa hatun hucha ruwaqkunata kuyakuywan rimapayan wanakunankupaq (Zac. 1:3; Rom. 2:4; Sant. 4:8).

3. ¿Imamantam kay yachachikuypi yachasun?

³ Jehova Diosqa munan huchakunata hinaspa hatun hucha ruwaqkunata pay hina qawananchiktam. Chaymi kay yachachikuypi yachasun Corinto congregacionpi iñiqkuna hatun huchata ruwaqwan imata ruwasqankumanta, chay runa wanakuruptin imata ruwanankupaq apostol Pablo nisqanmanta hinaspa hatun huchata ruwaqkunata Dios imayna qawasqanmanta.

¿IMATAM RUWARQAKU HATUN HUCHATA RUWAQWAN?

4. ¿Imam pasachkarqa Corinto congregacionpi? (Rimarimuytaq 1 Corintios 5:​1, 2 nisqanmantapas).

⁴ (Leey 1 Corintios 5:​1, 2). Pablom kimsa kaq viajasqanpi uyarirurqa chayllaraq rikuriq Corinto congregacionpi huknin iñiq madrastallanwan kakusqanmanta, chaymi anchata llakikurqa. ‘Chayna pinqaypaq huchapakuyqa manamá karqachu Diospi mana iñiq runakunapipas’. Iñiqkunaqa chay huchapakuq runatam hinalla congregacionpi kananta saqichkarqaku. Paykunaqa piensarqakuchá chayna kasqankuwan Diospa llakipayakuq hinaspa entiendeq kasqanta qatipakusqankuta. Ichaqa manamá haykapipas saqirqachu hatun huchata ruwaq hinalla serviqnin kanantaqa. Chay runapa huchanraykuchá Diosta mana serviqkunapas congregacionmanta mana allinkunata rimayta qallaykurqaku. Chay runa congregacionpi hinalla kaptinqa wakinkupas paytachá qatipakuyta qallaykunmanku karqa. Chaynaqa, ¿imata ruwanankupaqmi Pablo nirqa?

5. ¿Imata ruwanankupaqmi Pabloqa iñiqkunata nirqa? ¿Imatam chaywanqa nichkarqa? (Rimarimuytaq 1 Corintios 5:13 nisqanmantapas, qawaytaq dibujotapas).

⁵ (Leey 1 Corintios 5:13). Pablom Jehova Diospa yanapakuyninwan cartata qillqarqa. Chaypim nirqa chay mana wanakuq iñiqta congregacionmanta qarqunankupaq. Kamachirqataqmi chay iñiqwan amaña hukllawakunankupaqpas. ¿Imakunapitaq mana hukllawakunankuchu karqa? Kikin Pablom nirqa: “Chayna runakunawanqa amayá mikuyllapas-mikuychikchu”, nispa (1 Cor. 5:11). Piwanpas kuska mikuspaqa unaymi tukuy imamantapas parlanchik hinaspam aswan confianza kanchik. Chaynaqa, Pablom Corintopi iñiqkunata nichkarqa chay runawan ama unayta parlanankupaq utaq yanqapas-yanqa ama hukllawakunankupaq. Pablopa nisqanta kasukuspankuqa hatun huchaman wichiykuymantam cuidakunmanku karqa (1 Cor. 5:​5-7). Iñiqkuna manaña hukllawakusqanwanmi chay runaqa cuentata qukunman karqa Diosta maynata llakirachisqanta, hinaspanmi ruwasqanmanta pinqakuspan wanakunman karqa.

6. ¿Imapaqtaq Pablopa carta apachisqan yanaparqa iñiqkunata hinaspa qarquchikuqta?

⁶ Pabloqa cartata aparachispanchá tapukurqa Corintopi iñiqkuna ima ninankumanta. ¡Maynatachá kusikurqa cartanta allinta chaskisqankumanta Tito willaykuptinqa! (2 Cor. 7:​6, 7). Pablopa nisqanta kasukuspankum chay runata congregacionmanta qarqururqaku. Chaymanta killakuna pasayllatam qarquchikuqqa wanakururqa. Payqa mana allin ruwasqanta saqispanmi kaqmanta Diospa munasqanman hina kawsakuyta qallaykurqa (2 Cor. 7:​8-11). Chaynaqa, ¿imata ruwanankupaqñataq Pabloqa iñiqkunata kamachirqa?

¿IMAYNATAM CHASKIYKUNANKU KARQA HUCHANMANTA WANAKUQTA?

7. ¿Imanasqataq hucha ruwaqta congregacionmanta qarquyninkuqa ancha allin karqa? (Rimarimuytaq 2 Corintios 2:​5-8 nisqanmantapas).

⁷ (Leey 2 Corintios 2:​5-8). Pablom nirqa: “Chay runataqa llapallaykichikmi qaqcharunkichikña, chayllapaqñayá kachun”, nispa. Chay runata qarqusqankuqa ancha allinmi karqa. ¿Imanasqa? Wanakunanpaq yanapasqanraykum (Heb. 12:11).

8. ¿Imata ruwanankupaqñataq Pablo nirqa?

⁸ Pablom nirqa chay iñiqmasinkuta ‘pampachaykuspanku sunqunta tiyaykachinankupaq’. Nirqataqmi: ‘Ruegakuykichikmi pay kuyasqaykichikta niykunaykichikpaq’, nispa. Arí, Pabloqa munarqa manamá Diospa llaqtanman chay runa kutimunanta saqinallankutachu, aswanqa sunqumanta pampachaykunankutam hinaspa rimasqankuwan chaynataq ruwasqankuwan payta kuyasqanku sutilla kanantam. Chaynapimá huchanmanta wanakuqpas cuentata qukunman karqa kutimusqanwan iñiqmasinkuna kusisqa kasqankuta.

9. ¿Imanasqataq wakinkuqa wanakuq kutiramuptin mana kusisqachu kanmanku karqa?

⁹ Yaqapaschá wakiqninkuqa wanakuq kutiramuptinqa mana kusisqachu karqaku. Ichapas piñasqa karqaku lliw congregacionta pinqayman churarusqanrayku utaq wakiqninkuta sientirachisqanrayku. Lliw iñiqkunam tukuyta ruwachkarqaku Diospa kamachikuyninkunata kasukunankupaq, chayraykuchá wakiqninkuqa piensarqaku chay hatun hucha ruwaqta kusikuywan chaskiykuyninku mana allin kasqanta (tupachiy Lucas 15:​28-30 nisqanwan). Hinaptinqa, ¿imanasqataq ancha allin karqa chay iñiqmasinkuta kuyakuywan chaskiykuyninku?

10, 11. ¿Imataq pasanman karqa wanakuq runata pampachaykuyta punta apaqkuna mana munaptinkuqa?

¹⁰ ¿Imaynataq huchallikuqqa tarikunman karqa sunqumanta wanakuruptinpas kutimunanta punta apaqkuna mana munaptinkuqa? ¿Imaynataq kanman karqa kutiramuptinpas mana kuyakuywan chaskiykuptinkuqa? “Llumpay llakipa intusqan” kaspanchá piensanman karqa manaña haykapipas Diospa llaqtanman kutiykuy atinanta. Utaqchá mana imatapas ruwanmanchu karqa mana allin ruwasqanta saqispa Dioswan kaqmanta kuyachikunanpaqqa.

¹¹ ¿Imaraqtaq pasanman karqa wanakuq runata iñiqkuna pampachaykuyta mana munaptinkuqa? Manañam kikinkupas Dioswanqa kuyachikunmankuchu karqa. ¿Imanasqa? Manamá qatipakuchkanmankuchu karqa Jehova Diospa pampachakuq kasqantaqa, aswanqa satanastam. Payqariki mana pampachakuqmi hinaspa pitapas mana llakipayaqmi. Chaymantapas satanasqa paykunatam servichikunman karqa chay runata hukmanyachinanpaq, chaynapi Diosta manaña serviyta munananpaq (2 Cor. 2:​10, 11; Efes. 4:27).

12. ¿Imatam ruwanmanku karqa Diosta qatipakunankupaq?

¹² Chaynaqa, ¿imatam Corintopi iñiqkuna ruwanmanku karqa satanasta qatipakunankumantaqa Jehova Diosta qatipakunankupaq? Huchanmanta wanakuqtam Dios hina pampachananku karqa. Dios imayna kasqanmantam David nirqa: “Qamqa allin Diosmi kanki. Qamqa pampachakuykuqmi kanki”, nispa (Sal. 86:5). Miqueasñataqmi nirqa: “¿Pitaq qam hina Diosqa kanman? ¿Pitaq [ . . . ] huchanta pampachaykuspan mana allin ruwasqankuta qunqanman?”, nispa (Miq. 7:18). Isaiaspas nirqam: “Mana allin runaqa mana allin ñannintayá saqichun, [ . . . ] umanpi mana allin kaqkunatayá hurquchun, Jehova Diosmanyá kutirikuchun, payqa mana allin ruwaq runataqa llakipayaykunqam, Diosninchikmanyá kutirikuchun, payqa mana imata nispallanmi pampachaykunqa”, nispa (Is. 55:7).

13. ¿Imanasqataq ancha allin karqa wanakuq runa congregacionman kutiykamunanpaq tantiayninku? (Qaway “¿Hayka tiempomantataq huchallikuq runa congregacionman kutimurqa?” niqta).

¹³ Corintopi iñiqkuna Diosta qatipakunanpaqqa wanakuq runatam kusisqa chaskinanku karqa, hinaspapas payta kuyasqankum sutilla kanan karqa. Pablom nirqa wanakuqta pampachaykusqankuwan ‘tukuy imapi kasukuq kasqanku’ sutilla kasqanta (2 Cor. 2:9). Chay runa qarqusqa kasqanmanta killakunalla pasaruptinpas huchanmantam wanakururqaña. Chaymi punta apaqkunaqa mana suyanankuraqchu karqa congregacionman kutiykamunanpaq tantianankupaqqa.

¿IMAYNATAM QATIPAKUCHWAN DIOSPA ALLIN RUWAQ HINASPA LLAKIPAYAKUQ KASQANTA?

14, 15. ¿Imakunatam yachachiwanchik Corinto congregacionpi ima pasakusqan? (Rimarimuytaq 2 Pedro 3:9 nisqanmantapas, qawaytaq fototapas).

¹⁴ Corinto llaqtapi ima pasakusqanqa “yachachiwananchikpaqmi” qillqasqa kachkan (Rom. 15:4). Chaymi yachachiwanchik hatun huchata ruwaqkuna llaqtanpi kananta Jehova Dios mana saqisqanta. Ichapas wakinkuqa piensanmanku Dios llakipayakuq kasqanrayku hatun huchata ruwaq congregacionpi hinalla kananta saqinanmanta, ichaqa manamá chaynachu. Diosqa llakipayakuq kaspanpas sutillatam yachachiwanchik imam allin utaq imam mana allin kasqanta, hinaspapas manam saqinchu mana kasukuqkuna llaqtanpi kanankutaqa (Jud. 4). Hatun huchata ruwaq congregacionpi hinalla kananta saqispanqa manachá llakipayakuqchu kachkanman, aswanqa lliw iñiqkuna peligropi kanantach saqichkanman (Prov. 13:20; 1 Cor. 15:33).

¹⁵ Corinto llaqtapi ima pasakusqanqa yachachiwanchiktaqmi Diosqa pipas chinkarunanta mana munasqanta. Chaymi hatun huchata ruwaq wanakuspa cambiaptinqa hinaspa kaqmanta amistadnin kananpaq kallpanchakuptinqa Diosqa llakipayaykun (Ezeq. 33:11; leey 2 Pedro 3:9). Chayraykum Corinto congregacionpi iñiqkunaman Pablowan willachirqa wanakuqta pampachaykuspanku kusikuywan chaskiykunankupaq.

16. ¿Imatam Jehova Diosmanta yachanki Corinto congregacionpi ima pasasqanwan? ¿Imaynam tarikunki chaypi yuyaymanaspayki?

¹⁶ Corinto congregacionpi ima pasasqanmi yanaparuwanchik Jehova Diosqa kuyakuq, allin ruwaq hinaspa llakipayakuq kasqanta yachanapaq (Sal. 33:5). Chayraykum payta astawan hatunchayta munanchik. Llapallanchik pantaq kasqanchikraykumá pampachaykuwananchikta necesitanchik. Chaymi Diosta agradecekunchik huchanchikmanta pampachawananchikpaq churin Jesusta kachamusqanmanta. ¡Anchatamá kusikunchik Dios kuyawasqanchikmantawan allin kananchikta munasqanmantaqa!

17. ¿Imakunamantam qatiqnin yachachikuykunapi yachasun?

¹⁷ ¿Imaynatam Jehova Diosta kunan tiempopi punta apaqkuna qatipakunmanku pipas hatun huchata ruwaruptin? ¿Imaynatam kuyakuywan yanapanmanku wanakunanpaq? ¿Imatam ruwananchik chay hucha ruwaq qarqusqa kananpaq utaq kutiykamunanpaq punta apaqkuna tantiaptinku? Chaykunamantam qatiqnin yachachikuykunapi yachasun.