Jehova Dioswan Jesus hinayá piensasun

1, 2. (1) ¿Imaynatam Jehova Diosta kuyananchik? (2) ¿Ima ruwananpaqtaq Jesusqa tantiakurqa taytanta tukuy yuyayninwan kuyasqanrayku?

JESUSMI Moisespa chaskisqan kamachikuykunamanta mayqin aswan allin kasqanmanta nirqa: “Jehova Diosnikitam kuyanayki tukuy sunquykiwan, tukuy vidaykiwan, tukuy yuyaynikiwan hinaspa tukuy kallpaykiwan”, nispa (Mar. 12:30). Diosta tukuy sunqunchikwan kuyanapaqqa imakuna ruway munasqanchik hinaspa imayna sientekusqanchikmi paypa munasqanman hina kanan. Kallpanchikwan imakuna ruwasqanchikpas paypa munasqanman hinataqmi kanan. Jehova Diostaqa kuyananchiktaqmi tukuy yuyayninchikwanpas. Huk rimaypiqa imayna piensasqanchikmi paypa munasqanman hina kanan. Payta kuyasqanchikraykum imayna piensasqanta qatipakuyta munanchik. Manamá haykapipas Diospa lliw piensaynintaqa entiendeyta atisunchu. Chaywanpas, ‘Jesuspa piensasqanta’ estudiayninchikmi yanapawasun Dios hina piensananchikpaq. ¿Imanasqa? Payqariki taytan hinam imapaqpas piensaq (1 Cor. 2:16 versiculopaq “nosotros sí tenemos la mente de Cristo” niq willakuyta qaway Biblia de Estudio nisqanpi).

² Jesusqa tukuy yuyayninwanmi Diostaqa kuyarqa. Payqa yacharqam imam ruwananta taytan munasqanta, hinaspapas ñakarinanta yachachkaspanpas taytanpa munayninta ruwananpaqmi tantiakurqa. Tukuy ima ruwasqanpim taytanta kusichiypi umayuqlla karqa.

3. ¿Imatam Jesusmanta Pedro yacharqa? ¿Imapaqmi iñiqmasinkunata kallpancharqa? (Rimarimuytaq 1 Pedro 4:1 nisqanmantapas).

³ Pedrowan wakin apostolkunaqa Jesuswan kasqankuraykum yacharqaku Jesuspa imayna piensasqanta. Chaymi Pedroqa punta kaq cartasqanpi iñiqmasinkunata nirqa: “Qamkunapas pay hina piensanaykichikpaqyá kallpanchakuychik”, nispan (leey 1 Pedro 4:1). Griego rimaypi “kallpanchakuychik” nispanqa soldadokunapa rimasqantam Pedroqa servichikuchkarqa. Chaytaqa rimaqku guerraman rinankupaq soldadokuna tukuy imankuta alistanankupaqmi. Llapallanchikmi guerrapi hina kachkanchik mana allin munaykunawan hinaspa satanaspa munaychakusqan runakunawan. Chaymi Jesuspa piensasqanman hina piensayqa yanapawasun tukuy chaykunata vencenapaq (2 Cor. 10:​3-5; Efes. 6:12).

4. ¿Imamantam kay yachachikuypi yachasun?

⁴ Kay yachachikuypim yachasun Jesuspa imayna piensasqanmanta hinaspa payta imayna qatipakunamanta. Imayna piensasqanta estudiayninchikmi yanapawasun Jehova Dios hina piensanapaq, humilde kanapaq hinaspa allin yuyayniyuq kanapaq.

JEHOVA DIOS HINAYÁ PIENSASUN

5. ¿Pedropa ima nisqantaq Jehova Diospa piensasqanwan mana tuparqachu?

⁵ Huk kutipim Pedropa nisqanta uyarispan Jesus nirqa Diospa piensasqanman hina mana kasqanta. Jesusmi apostolninkunata nirqa Jerusalenman rinanmanta, religionpi punta apaqkuna presocharunankumanta hinaspa ñakarichisqa kaspan wañuchisqa kananmanta (Mat. 16:21). Pedroqa yacharqam Diospa llaqtanta salvananpaq prometesqan runa Jesus kasqanta. Chayraykuchá mana creerqachu Jesus wañuchisqa kananta Jehova Dios saqinantaqa (Mat. 16:16). Chaymi Jesusta huklawman pusaruspan nirqa: “Llakipayarikuyá señor, kayqa manapunim qamtaqa pasasunkichu”, nispan (Mat. 16:22). Arí, chay kutipiqa manamá Pedropa piensasqanqa Diospa piensasqanwanqa tuparqachu, chaymi Jesuspa piensasqanwanpas mana tuparqachu.

6. ¿Imaynatam yachanchik Jesusqa taytan hina piensasqanta?

⁶ Jesusqa taytan hinam piensaq, chaymi Pedrota nirqa: “¡Qipayman churakuy satanas! Qamqa pantachiwachkankim, manam Diospa piensasqanman hinachu piensanki, aswanqa runapa piensasqanman hinallam”, nispan (Mat. 16:23). Jesusqa yacharqam taytanpa munasqanta cumpliyqa mana facil kananta. Aswanqa ñakarichisqa kaspanmi wañuchisqa kanan karqa. Chaymi Pedropa nisqanwanqa mana acuerdopichu karqa allinninta piensaspan niptinpas. Jesuspa nisqanta uyariruspanmi Pedroqa entienderurqa Jehova Diospa piensasqanman hina piensananpaq kallpanchakunanta. Chaypaqmi ñuqanchikpas kallpanchakunanchik.

7. ¿Imapim sutillata qawakurqa Dios hina piensananpaq Pedropa kallpanchakusqan? (Qaway dibujota).

⁷ Tiempopa risqanman hinam Pedroqa Jehova Dios hina piensananpaq kallpanchakurqa. Chaymi sutillata qawakurqa Cornelioman rinanpaq Dios kachaptin. Chay tiempopim Diosqa tantiarurqa mana judio kaqkunapas llaqtanpi kananpaq. Chaymi Cornelio mana judio kachkaptinpas yachachinanpaq nirqa. Judiokunaqa manam hukllawakuqkuchu huklaw nacionniyuqkunawanqa, chaymi Pedropaqqa sasa kanman karqa Diosta kasukuyqa. Chaywanpas, Diospa ima munaynin kasqanta entienderuspanmi ‘mana imata nispan’ Cornelioman rirqa (Hech. 10:​28, 29). Paymanwan wasinpi kaqkunaman Diosmanta willaruptinmi bautizakurqaku (Hech. 10:​21-23, 34, 35, 44-48).

8. ¿Imakunatam ruwasun Jehova Dios hina piensaspaqa? (Rimarimuytaq 1 Pedro 3:8 nisqanmantapas).

⁸ Watakuna pasaytam Pedroqa iñiqmasinkunata consejarqa: “Llapallaykichikyá hukllata piensaychik”, nispa (leey 1 Pedro 3:8). Chaynam kunan tiempopi Jehova Diospa testigonkunapas llapallanchik hukllata piensanapaqqa bibliata estudianchik Diospa imayna piensasqanta yachaspa qatipakunapaq. Bibliata estudiaspam yachanchik Diospa munayninta imamantapas puntata ruwanapaq Jesuspa nisqanta (Mat. 6:33). Chaynaqa, ¿congregacionninchikpi mayqan iñiqmasinchikpas tukuy tiemponwan Dios serviyta piensaptinqa Pedro hinachu nisun mana chaynata piensananpaq? Manamá. Aswanqa chay piensasqanmantam alabaykusun, hinaspam imapipas yanapanapaq nisun.

HUMILDEYÁ KASUN

9, 10. ¿Imaynatam Jesusqa qatiqninkunata yachachirqa humilde kanankupaq?

⁹ Manaraq wañukuchkaspanmi Jesusqa Pedrota hinaspa wakin apostolninkunata sumaqta yachachirqa humilde kanankupaq. Paymi Pedrotawan Juanta nirqa manaraq wañukuchkaspan wakin qatiqninkunapiwan mikunankupaq tukuy imata alistamunankupaq. Chayraykuchá paykunaqa alistarqaku lavatoriotapas chaynataq toallakunatapas, chaynapi invitasqa kaqkunapa chakinta pipas mayllananpaq. Ichaqa, ¿pitaq chakinkutaqa mayllanan karqa?

¹⁰ Chaytaqa sirvientekunallam ruwaqku, chay kutipim ichaqa kikin Jesus chakinkuta mayllarqa. Payqa hawa pachanta hurqukuykuspanmi toallata wiqawninman watakuykurqa. Chaymantam lavatorioman yakuta talliykuspan qatiqninkunapa chakinta mayllayta qallaykurqa. Chaywanqa ¡maynataraq admirakurqaku! (Juan 13:​4, 5). Unaypichá 12 apostolkunapa chakintaqa mayllarqa. Judaspa chakintapas mayllarqam traicionananta yachachkaspanpas. Chakinkuta mayllayta tukuruspanmi nirqa: “¿Yachankichikchu chakikichikta imanasqa mayllasqayta? Qamkunaqa sutichawankichik ‘yachachikuq’ hinaspa ‘señor’ nispam. Chaytaqa allintam ninkichik, arí, ñuqaqa ‘yachachikuq’ hinaspa ‘señormi’ kani. Sichu ‘señor’ hinaspa ‘yachachikuq’ kachkaspay chakikichikta ñuqa mayllaruykichik, hinaptinqa qamkunapas chaynayá chakikichikta mayllanakuychik”, nispa (Juan 13:​12-14). Arí, Jesusqa humildemá karqa.

11. ¿Imaynatam yachanchik Pedroqa humilde kayta yacharusqanta? (Rimarimuytaq 1 Pedro 5:5 nisqamantapas, qawaytaq dibujotapas).

¹¹ Jesusmantamá Pedroqa yacharurqa humilde kayta. Hanaq pachaman Jesus kutikuptinmi Pedroqa nacesqanmantapacha wiqru runata sanoyarachirqa (Hech. 1:​8, 9; 3:​2, 6-8). Chay milagro ruwasqanta qawaspankum achkallaña runakuna Pedropa kasqanman huñunakururqaku (Hech. 3:11). ¿Imatam Pedroqa ruwarqa? Chay tiempopi runakuna hina imapas ruwasqanwan riqsichikunanmantaqa humilde kaspanmi Jehova Diostawan Jesusta hatuncharqa. Jesusmantam kaynata nirqa: “Chayraykum kay rikusqaykichik hinaspa riqsisqaykichik wiqru runaqa Jesuspa sutinpi allinyarun sutinpi iñisqaykurayku”, nispan (Hech. 3:​12-16). Chaymanta qipatam Pedroqa iñiqmasinkunaman qillqarqa humilde utaq mana hatuntukuq kay imanasqa ancha allin kasqanmanta. Pedropa qillqasqanta leespaqa yaqapaschá yuyarinchik Jesus toallata wiqawninman watakuykuspan apostolninkunapa chakinta mayllasqanta (leey 1 Pedro 5:5).

12. ¿Imaynatam Pedro hina humilde kayta atichwan?

¹² Pedro hinam ñuqanchikpas humilde kayta atichwan. Humilde kasqanchikqa sutilla kanqa manam hukkunapa qayllanpi mana alabakusqallanchikwanchu. ‘Ama hatuntukuspayá kawsakuychik’ nisqanwanmi Pedroqa rimachkarqa kikinchikmanta imayna piensasqanchikwanpas humilde kanamanta. Hukkunaraykuqa imatapas ruwanchik manam alabawananchikta munasqanchikraykuchu, aswanqa Jehova Diostawan runamasinchikkunata kuyasqanchikraykum. Chaynaqa, mana hukkuna qawawanallanchikpaq Diosta kusisqa serviptinchikqa hinaspa iñiqmasinchikkunata yanapaptinchikqa humilde kasqanchikmi sutilla qawakunqa (Mat. 6:​1-4).

‘ALLIN YUYAYNIYUQYÁ KASUN’

13. ¿Imaynam ‘allin yuyayniyuq runaqa’?

¹³ ¿Imaynam ‘allin yuyayniyuq runaqa’? (1 Ped. 4:7). Jehova Diospa piensasqanman hinam imatapas tantian. Chayna runaqa sapa kutim yuyarin Dioswan amistadnin imamantapas aswan allin kasqanta. Allin yuyayniyuq kaspaqa manam haykapipas piensasunchu tukuy imata yachasqanchiktaqa. Aswanqa humilde kaspam Diosta sapa kuti mañakusun yachachiwananchikpaq hinaspa imapaqpas tantianapaq yanapawananchikpaq.

14. ¿Haykapim Pedroqa Diospi hapipakunanmantaqa kikillanpi hapipakurqa?

¹⁴ Jesusmi manaraq wañukuchkaspan qatiqninkunata nirqa: “Llapallaykichikmi kunan tuta ñuqata saqiwankichik”, nispan. Chaynata niptinmi Pedroñataq kikillanpi hapipakuspan nirqa: “Llapallanku saqirusuptikipas, ñuqaqa manapunim haykapipas saqisqaykichu”, nispan. Hina chay tutallam Jesusqa wakin qatiqninkunata consejaspan nirqa: “Qawan-qawanllayá kaychik, hinaspayá Diosta tukuy tiempo mañakuychik”, nispan (Mat. 26:​31, 33, 41). Chayna nisqanta Pedro kasukuspanqa mana manchakuspanchá ninman karqa Jesuspa qatiqnin kasqanta. Ichaqa kikillanpi hapipakuspa mana kasukusqanraykum Jesusta negaruspan llumpayta ñakakurqa (Mat. 26:​69-75).

15. ¿Ima ruwaynintaq Jesusta yanaparqa wañukunan tuta allin yuyayniyuq kananpaq?

¹⁵ Jesusqa Jehova Diospim tukuy sunqunwan hapipakurqa. Mana pantaq kaspanpas wañukunan tutam achka kutikama mañakurqa. Chayna ruwasqanmi yanaparqa taytanpa munayninta mana manchakuspan ruwananpaq (Mat. 26:​39, 42, 44; Juan 18:​4, 5). Wañukunan tuta achka kutikama Jesuspa mañakusqantaqa manachá haykapipas Pedroqa qunqarqachu.

16. ¿Imakunaraykum yachanchik Pedroqa allin yuyayniyuqña kasqanta? (Rimarimuytaq 1 Pedro 4:7 nisqanmantapas).

¹⁶ Tiempopa risqanman hinam Pedroqa Jehova Diosta mañakuspan paypi astawan hapipakuyta yacharurqa. Jesusqa kawsariramuspanmi Pedrotawan wakin apostolninkunata nirqa Diosmanta willakunankupaq chuya espirituta chaskinankumanta. Chaykamaqa Jerusalenpi suyanankupaqmi nirqa (Luc. 24:49; Hech. 1:​4, 5). ¿Imatam Pedroqa chaykama ruwarqa? Bibliapim niwanchik paywan wakin iñiqkuna ‘Diosta huk sunqulla mañakusqankumanta’ (Hech. 1:​13, 14). Chaymantam Pedroqa punta kaq cartanpi iñiqmasinkunata nirqa allin yuyayniyuq kanankupaq hinaspa Diosta mañakuspanku paypi astawan hapipakunankupaq (leey 1 Pedro 4:7). Arí, Pedroqa Jehova Diospi hapipakusqanraykum iñiqmasinkunapaq pilar hina karqa (Gal. 2:​9, qaway willakuyninta).

17. ¿Imatam ruwananchik ñuqanchikpaq imatapas ruway facil kaptinpas? (Qawaytaq fototapas).

¹⁷ Allin yuyayniyuq kanapaqqa Jehova Diostam tukuy tiempo mañakunanchik. Diostam yanapawananchikpaq mañakunanchik imatapas ruway ñuqanchikpaq facil kaptinpas. Astawanraqmi mañakunanchik imapas tantiasqanchik vidanchikta cambiananmanta yachaspaqa. Payqariki yachanmi imam ñuqanchikpaq aswan allin kasqantaqa.

18. ¿Imapaqmi Pedro hina kallpanchakunanchik?

¹⁸ Jehova Diostam anchata agradecekunchik payman rikchakuqta unanchawasqanchikmanta (Gen. 1:26). Yachanchikmi pantaq kasqanchikrayku Diospa imayna kasqanta mana lliwta qatipakuyta atinanchikta (Is. 55:9). Chaywanpas Pedro hinam hinalla kallpanchakunanchik Dios hina piensanapaq, humilde kanapaq hinaspa allin yuyayniyuq kanapaq.