Tukuy imata ruway atiq Diosmi haykapipas yanapawasun

1. ¿Imatam Moises ruwarqa Jehova Diospi hapipakusqanrayku?

HEBREOS qillqapim willawanchik Diospi hapipakuq achka runakunamanta. Hukninmi karqa Moises. Payqa qatipakunapaqmi karqa (Heb. 3:​2-5; 11:​23-25). Jehova Diospi tukuy sunqunwan hapipakusqanraykum faraontawan soldadonkunata mana manchakuspan Israel runakunata Egiptomanta hurqurqa. Hinaspanmi Puka lamar quchanta pasachispan chunniqninta pusarqa (Heb. 11:​27-29). Tiempopa risqanman hina yaqa llapallan Israel runakuna Diospi manaña hapipakuptinkupas Moisesqa manapunim iskayrayarqachu llaqtanta Dios cuidananmantaqa, chaynamá karqa. Diosqa chunniqpi mana wañurunankupaqmi mikuytawan yakuta qurqa (Ex. 15:​22-25; Sal. 78:​23-25).a

2. ¿Imanasqataq Moisesta Dios tapurqa: “¿Taksallachu Jehova Diospa makin?”, nispan?

² Egiptomanta lluqsisqankumanta yaqa wata pasayllatam Jehova Dios nirqa aychata qunanmanta. Moisesqa ancha iñiyniyuq kaspanpas Diospa nisqanmantam iskayrayarqa. Manamá creerqachu millonnintin runakunaman aychata Dios qunantaqa. Chaymi Diosqa tapurqa: “¿Imataq ñuqa Jehova Diospaq mana ruway atinay kanman?”, nispan (leey Numeros 11:​21-23). Diospa chayna nisqantam hebreo rimaypiqa nichkan: “¿Taksallachu Jehova Diospa makin?”, nispan. ‘Diospa makinmanta’ rimaspanqa nichkan imatapas ruwananpaq atiyninmantam. Huk rimaypiqa Diosqa Moisestaqa nichkarqa: “¿Imapas nisqayta mana ruway atinaytachu piensanki?”, nispanmi.

3. ¿Imanasqataq astawan yachananchik Moisestawan Israel runakunata ima pasasqanmanta?

³ ¿Haykapipas nirqankichu: “¿Diosqa quwanqachu ñuqapa hinaspa familiaypa imapas necesitasqaykuta?”, nispa? Chaynataqa ichapas tapukurqankiña utaq manaraqpas. Chaymi kay yachachikuypi yachasun imapas necesitasqankuta Dios qunanmanta Moiseswan Israel runakuna iskayrayasqankumanta. Yachasuntaqmi bibliapi wakin textokunamantapas, chaymi kallpanchawasun Diosqa haykapipas yanapawananchikmanta mana iskayrayanapaq.

¿IMATAM YACHACHWAN MOISESMANTAWAN ISRAEL RUNAKUNAMANTA?

4. ¿Imanasqataq Israel runakunaqa imapas necesitasqankuta Dios qunanmanta iskayrayayta qallaykurqaku?

⁴ Israel runakunam Egiptomanta lluqsirqaku huklaw nacionniyuq runakunapiwan, hinaspankum Diospa prometesqan allpaman unayña chunniqninta richkarqaku (Ex. 12:38; Deut. 8:15). ¿Imanasqataq imapas necesitasqankuta Dios qunanmanta iskayrayayta qallaykurqaku? Chay huklaw nacionniyuq runakuna maná sutiyuq mikuyta amiruspanku quejakuyta qallaykuptinkum Israel runakunapas quejakuyta qallaykurqaku (Num. 11:​4-6). Egiptopi tukuy ima mikusqankuta yuyarispankum llakikurqaku. Sapa kuti quejakusqankuraykum Moisesqa llumpayta preocupakuspan nirqa: “¿Maymantataq kaynaña runapaqqa aychata hurqumusaq?”, nispan (Num. 11:​13, 14).

5, 6. ¿Imatam yachachwan huklaw nacionniyuqkuna hina Israel runakuna quejakuyta qallaykusqankumanta?

⁵ Huklaw nacionniyuq runakunapa quejakusqanta qawaspankum Israel runakunapas quejakuyta qallaykurqaku. Chaynam ñuqanchikpas Diosta mana agradecekuq runakunata qawaspanchik Diospa imapas quwasqanchikmanta quejakuyta qallaykuchwan. Chaymi ñawpaqta tukuy imanchikpas kapuwasqanchikta yuyariyta qallaykuchwan, utaqmi hukkunapa imankutapas envidiakuyta qallaykuchwan. Ichaqa imapas kapuwasqallanchikwan contentakuspanchikmi aswan kusisqaqa kasun.

⁶ Israel runakunaqa Diospa ima prometesqantamá yuyarinmanku karqa. Payqariki prometerqa manam chunniqpi kachkaptinku imatapas qunanpaqchu, aswanqa prometesqan allpaman chayaruptinku tukuy imata qunanpaqmi. Chaynam ñuqanchikpas kay tiempopi imapas mana kapuwasqanchikpi piensanamantaqa hamuq tiempopi tukuy imata Dios quwananchikpi yuyaymanananchik. Yuyaymanachwantaqmi tukuy tiempo Diospi hapipakunapaq bibliapa nisqankunapipas.

7. ¿Imanasqataq mana iskayrayachwanchu Dios yanapawananchikmanta?

⁷ ¿Imanasqataq Diosqa Moisesta nirqa: “¿Taksallachu Jehova Diospa makin?”, nispan? Chaywanqa entiendechichkarqa atiynin mana tukuq kasqantam hinaspa serviqninkuna maypiña kaptinkupas yanapay atisqantam. Chayraykum Israel runakuna chunniqpi kaptinkupas Diosqa aychata quyta atinman karqa. Arí, serviqninkuna maypiña kaptinkupas payqa “atiyninwanmi, atiyniyuq makinta haywarispanmi” yanaparqa (Sal. 136:​11, 12). Chaymi ima sasachakuypiña kaspapas manapuni iskayrayachwanchu makinta haywarispan maypiña kaptinchikpas Dios yanapawananchikmanta (Sal. 138:​6, 7).

8. ¿Imataq ñuqanchikpaqqa aswan allin kanan Israel runakuna hina mana kanapaq? (Qawaytaq dibujotapas).

⁸ Jehova Diosqa prometesqanman hinam Israel runakunamanqa qurqa achkallay-achka codornizkunata. Paykunañataqmi Diosta agradecekunankumantaqa chay punchaw hinaspa paqarintin chawpi punchawkama codornizkunata huñukuypi karqaku. Diosqa piñakuruspanmi chay mikuylla munaq runakunata castigarurqa (Num. 11:​31-34). ¿Imatam paykunamanta yachachwan? Manam imatapas llumpaytaqa munapayananchikchu. Chayraykum apu utaq wakcha kaptinchikpas aswan allinqa ‘hanaq pachapi tukuy imata huñukuchkaq hina’ Dioswan hinaspa Jesuswan allin amistad kanapaq kallpanchakuyninchik (Mat. 6:​19, 20; Luc. 16:9). Chaypaq kallpanchakuspaqa manam iskayrayasunchu imapas necesitasqanchikta Dios quwananchikmantaqa.

9. ¿Imamantam seguro kananchik?

⁹ Kunanpas Jehova Diosqa hinallam serviqninkunataqa yanapachkan. Ichaqa manam chayraykuchu piensananchik mikunanchikpas utaq qullqinchikpas mana faltapuwananchiktaqa.b Chaywanpas segurom kananchik Dios mana saqiwananchikmantaqa, hinalla ima sasachakuytapas aguantanapaqmi yanapawasun. Chaymi kay yachachikuypi yachasun qullqinchik mana haypawaptinchik hinaspa yuyaqyaspa imayna kanamanta tantiaptinchik Jehova Dios yanapawananchikmanta mana iskayrayanapaq.

QULLQINCHIK MANA HAYPAWAPTINCHIK

10. ¿Ima sasachakuykunapim tarikuchwan?

¹⁰ Tukuy mana allinkunata Dios chinkachinan punchaw hichpamusqanman hinaqa yaqapaschá qullqimanta aswan sasachakuypi kasun. Ichapas llamkayninchikta, wasinchikta utaq imanchiktapas pierderuchwan runakuna autoridadkunapa contranpi hatariptinku, guerra kaptin, terremoto kaptin utaq ima unquypas rikuriramuptin. Yaqapaschá huk llamkayta maskananchik kanqa utaq familiantin huklawman rinanchik kanqa imapas necesitasqanchikta tarinanchikrayku. Chaynakuna pasaptinqa, ¿imatam ruwananchik Jehova Diospi hapipakusqanchik sutilla qawakunanpaq?

11. ¿Imatam ruwachwan qullqinchik mana haypawaptinchik? (Rimarimuytaq Lucas 12:​29-31 nisqanmantapas).

¹¹ Jehova Diosta mañakuspam willachwan tukuy imapas llakichiwaqninchikkunata (Prov. 16:3). Diostayá mañakusun allin yuyaywan imapaqpas tantiananchikpaq hinaspa ‘hukmanyasqallaña mana kanapaq’ sunqunchikta tiyaykachinanpaq (leey Lucas 12:​29-31). Mañakusuntaqyá imapas kapuqllanchikwan kusisqa kawsakunapaq yanapawananchikpaqpas (1 Tim. 6:​7, 8). Chaymantapas, qillqanchikkunapiyá maskasun qullqinchik mana haypawaptinchik imata ruwanamanta. Achka iñiqmasinchikkunatam yanaparqa jw.org nisqapi chaymanta rimaq videokuna hinaspa yachachikuykuna.

12. ¿Imakunatam nikuchwan familianchikpa allinninpaq imatapas tantianapaq?

¹² Achkam familiankuta saqispanku huklawpi llamkapakuyta maskanku. Ichaqa chaymantam cuentata qukunku chaypaq tantiakusqanku mana allin kasqanta. Chaymi ima llamkaytapas manaraq aceptachkaspa piensananchik Diosta serviyninchikpi imayna kananchikpi, manam allinta pagawanallanchikpichu (Luc. 14:28). Nikusun: “¿Imaynataq casado vidaypi kasaq warmiymanta utaq qusaymanta karupi kaspay? ¿Atisaqchu lliw huñunakuykunaman riyta, Diosmanta willakuyta hinaspa iñiqmasiykunawan kuska kayta?”, nispa. Churiyuq utaq wawayuq kaspanchikpas kaynatam nikunanchik: “¿Imaynatataq warmayta uywasaq ‘Jehova Diospa yachachisqanman hina’ hinaspa consejonkunaman hina paykunawan kuska mana kaspayqa?”, nispa (Efes. 6:4). Imapaqpas tantiasqanchikqa manam Diosta mana serviq familianchikkunapa utaq amistadninchikkunapa niwasqanchikman hinachu kanan, aswanqa Diospa piensasqanman hinam.c Asia occidental lawpi yachaq Tonytam nirqaku huklaw nacionpi llamkaspan achka qullqita ganananpaq. Ichaqa Diosta mañakuruspanmi hinaspa señoranwan parlaruspanmi tantiarurqa mana rinanpaq hinaspa imapas necesitasqallankupi qullqinkuta gastanankupaq. Chayna tantiakusqanmantam Tony nin: “Achka runamasinchikkunatam yanaparqani Jehova Diosta servinankupaq. Warmaykupas Diostataqmi anchata kuyanku. Chaywanmi yacharuniku Mateo 6:33 nisqanman hina Diospa munayninta puntapi churaptinchikqa pay cuidawananchikta”, nispa.

YUYAQYASPA IMAYNA KANAMANTA TANTIAPTINCHIK

13. ¿Imatam kunanmanta ruwachwan qipa punchawkunata allin kananchikpaq?

¹³ Llapallanchikmi kunanmanta imatapas ruwayta munanchik yuyaqyaspa allin kananchikpaq. Chaypipas sutillam kanan Jehova Diospi hapipakusqanchikqa. Bibliapim niwanchik allin llamkakuq kanapaq, chaynapi qipakunata ima necesitasqanchikpaqpas kananpaq (Prov. 6:​6-11). Chaymi allin kanman qipa punchawkunapaq qullqichata huñukuyninchik. Ichaqa qullqi allinta yanapawaptinchikpas manam chay maskayllamanqa qukurunanchikchu (Ecl. 7:12).

14. ¿Imaynatam Hebreos 13:5 nisqan yanapawanchik yuyaqyaspa imayna kanamanta tantiaptinchik?

¹⁴ Jesusmi rikchanachispan rimarqa Diospaq imatapas mana ruwaspa qullqita huñukuyqa yanqapaq kasqanta (Luc. 12:​16-21). Manam yachanchikchu paqarin punchaw ima pasaruwananchiktaqa (Prov. 23:​4, 5; Sant. 4:​13-15). Jesusqa nirqataqmi paypa qatiqnin kanapaqqa tukuy imanchikta saqinapaq listo kanamantapas (Luc. 14:33). Chayraykum apostolkunapa tiempopi Judeapi yachaq iñiqkuna Diosta hinalla kusisqa servirqaku tukuy imankuta qichuruptinkupas (Heb. 10:34). Kunan tiempopipas achka iñiqmasinchikkunam politicaman mana sayapakusqankurayku llamkayninkuta utaq tukuy imankuta pierderqaku (Apoc. 13:​16, 17). Paykunaqa Diospa nisqanmantam manapuni iskayrayarqakuchu. Paymi nin: “Manapunim haykapipas saqisqaykichu nitaqmi qunqasqaykichu”, nispa (leey Hebreos 13:5). Tukuy atisqanchiktamá ruwanchik yuyaqyaruspanchik allinlla kanapaq, ichaqa qunqaymanta imapas kaptin Dios yanapawananchikmantaqa manam iskayrayanchikchu.

15. ¿Imapi piensaspam Diosta serviq tayta-mamakunaqa warmankuta uywanku? (Qawaytaq fototapas).

¹⁵ Wakin llaqtakunapiqa warmayuq kaytaqa munanku yuyaqyayninkupi tukuy imapas necesitasqankuta qunanta piensaspankum. Bibliam ichaqa yachachiwanchik churi-wawakunapa imapas necesitasqanta tayta-mamakuna qunankupaq (2 Cor. 12:14). Tayta-mamakuna yuyaqyaruspanqa ichapas munanku qullqiwan utaq imawanpas warmanku yanapananta. Chaytamá achka churi-wawakuna kuyakuywan ruwanku (1 Tim. 5:4). Chaywanpas Diosta serviq tayta-mamakunaqa astawanqa kusikunku warmankuta Diosta servinankupaq yanapaspam. Manam warmankutaqa uywanku yuyaqyaruptinku qullqiwan yanapanankuraykullachu (3 Juan 4).

16. ¿Imaynatam tayta-mamakuna warmankuta yachachinmanku vida pasayta yachanankupaq? (Rimarimuytaq Efesios 4:28 nisqanmantapas).

¹⁶ Tayta-mamakuna, allin llamkaq hinaspa Diospi hapipakuq kasqaykichikwanyá warmaykichikta yachachiychik. Taksachankumanta yachachiptikichikqa manam sasachu kanqa qipa punchawkunata vida pasayninkuqa (Prov. 29:21; leey Efesios 4:28). Wiñasqankuman hinayá yanapaychik estudiasqankupipas allin alumnokuna kanankupaq. Colegionkuta tukuruspa imataraq estudianankupaq allinta tantianankupaqyá yanapaychik qillqanchikkunapi bibliapa yachachikuyninkunawan. Qamkunaqariki munankichik warmaykichik kikinku mantienekuspanku Diosmanta astawan willakunankutam utaq precursor kanankutam.

17. ¿Imanasqam hamuq punchawkuna imapas pasanantaqa mana manchakunchikchu?

¹⁷ Jehova Diosta serviqkunaqa manam iskayrayanchikchu kuyawasqanchikmanta hinaspa imapas necesitasqanchikta quwananchikpaq atiyniyuq kasqanmantaqa. Tukuy mana allinkunapa tukunan punchaw hichpamusqanraykum Diospi astawan hapipakunanchik kanqa. Chaywanpas, manam imatapas manchakunchikchu. Ñuqanchikqa yachanchikmi imapas necesitasqanchikta atiyninwan Jehova Dios quwasqanchikta. Tukuy imata ruway atiq kasqanraykum maypiña tarikuptinchikpas yanapawasun.