“Kunanyá akllakuychik pim yupaychayta”

1. ¿Imakunata ruwaspallam kusisqa kawsakusun? ¿Imanasqa? (Rimarimuytaq Isaias 48:​17, 18 nisqanmantapas).

JEHOVA DIOSQA anchata kuyawasqanchikraykum munan kunanpas hinaspa hamuq tiempopipas kusisqa kawsakunanchikta (Ecl. 3:​12, 13). Payqa unanchawarqanchik imakunatapas ruway atiqtam. Ichaqa manam unanchawarqanchikqa kikillanchikmanta imam allin utaq imam mana allin kasqanta tantiakunapaqchu. Chaymi munasqallanchikta ruwaspaqa mana kusisqa kawsakuytaqa atichwanchu (Ecl. 8:9; Jer. 10:23). Diosqa yachanmi payta servispallanchik hinaspa kasukuspallanchik kusisqa kawsakunanchikta (leey Isaias 48:​17, 18).

2. ¿Ima creenanchiktam satanasqa munan? ¿Imatam Jehova Dios ruwarqa satanaspa nisqan llulla kasqanta yachanapaq?

² Satanasmi ichaqa munan Diosta mana servispa hinaspa munasqanchikman hinalla kawsakuspa kusisqa kananchikta creenata (Gen. 3:​4, 5). Satanaspa chayna nisqan llulla kasqanta yachanapaqmi Jehova Diosqa saqichkan runakuna munasqankuman hina kawsakunankuta hinaspa kikinkupura kamachinakunankuta. Llapallanchikmá cuentata qukuchkanchik runakunapa kamachinakusqankuqa mana allinllapi tukusqanta. Bibliapim ichaqa willawanchik Diosta serviqkuna ancha kusisqa kawsakusqankuta. Paykunamanta aswan kusisqaqa karqa Jesucristom. Chaymi kay yachachikuypi puntata yachasun Diosta servinanpaq imanasqa Jesus akllakusqanmanta. Yachasuntaqmi imanasqa Jehova Dioslla yupaychana kasqanmantapas. Tukunapaqñataqmi yuyarisun imanasqa Diosta servinapaq tantiakusqanchikmanta.

¿IMANASQAM JESUSQA AKLLAKURQA DIOSTA SERVINANPAQ?

3. ¿Imatam satanas Jesusman munachirqa? ¿Imapaqmi Jesusqa tantiakurqa?

³ Jesusqa kay pachapi kachkaspanmi akllakunan karqa pita servinanpaq. Bautizakusqan qipallatam satanasqa kay pachapi gobiernokunata munachispan nirqa huk kutillata yupaychaykuptin qunanpaq. Jesusmi ichaqa nirqa: “¡Pasaway kaymanta satanas! Qillqasqam kachkan: ‘Jehova Diosllaykitam yupaychanaykiqa, payllatataqmi servinaykipas’ niq”, nispa (Mat. 4:​8-10). Qatiqninpiyá yachaykusun imanasqa taytanta servinanpaq Jesuspa tantiakusqanmanta.

4, 5. ¿Imanasqam Jesusqa Jehova Diosta servinanpaq akllakurqa?

⁴ Imamantapas astawanqa taytanta servinanpaqqa Jesusqa akllakurqa tukuy sunqunwan kuyasqanraykum, manam imapasraykuchu (Juan 14:31). Chaymantapas, Jesusqa yachanmi Diosta serviy allin kasqanta (Juan 8:​28, 29; Apoc. 4:11). Jehova Diosqariki vidatawan tukuy imatam quwanchik, hinaspapas confianapaqmi (Sal. 33:4; 36:9; Sant. 1:17). Payqa yacharqataqmi Jehova Diosqa haykapipas imam kaqta nisqantapas chaynataq tukuy ima allin kaqkunata qusqantapas (Juan 1:14). Satanasmi ichaqa llullakunallata rimaq hinaspa kikillanpaq munaq. Paypa huchanpitaqmi wañunchikpas (Juan 8:44). Jehova Diosta chaynataq satanasta allinta riqsisqanraykum Jesusqa mana piensayllapas-piensarqachu satanas hina taytanpa contranpi kaytaqa (Filip. 2:​5-8).

⁵ Jehova Diosta servinanpaqqa Jesusqa akllakurqataqmi payman sunqu kaptin allin kaqkuna cumplikunanpi piensaspanpas (Heb. 12:2). Payqa yacharqam Diosman sunqu kasqanrayku taytanpa sutin chuyanchasqa kananta hinaspa satanaspa rikurichisqan tukuy mana allinkuna chinkananta.

¿IMANASQATAQ JEHOVA DIOSLLA YUPAYCHANA DIOSQA?

6, 7. ¿Imanasqam achka runakuna Diosta mana servinkuchu? ¿Imanasqam Jehova Dioslla yupaychana Diosqa?

⁶ Achka runakunam Diosta mana servinkuchu mana riqsisqankurayku. Arí, manam yachankuchu imayna sunqu kasqantapas chaynataq paykunarayku imakuna ruwasqantapas. Chaynam karqaku Atenas llaqtapi Jehova Diosmanta Pablopa willasqan runakunapas (Hech. 17:​19, 20, 30, 34).

⁷ Pablom paykunaman entiendechirqa kawsaq Diosqa “vidata, samayta hinaspa tukuy imakunatapas” llapallan runakunaman qusqanta. Nirqataqmi ‘pay kaptin kawsasqanchikta, purisqanchikta hinaspa kay pachapi kasqanchiktapas’. Yachachirqataqmi Diosqa ‘huk runallamanta llapallan nacionpi runakunata rikurichisqanmantapas’. Chaynaqa, unanchawaqninchik Diosllam yupaychana Diosqa (Hech. 17:​25, 26, 28).

8. ¿Imatam Jehova Diosqa mana haykapipas ruwanmanchu?

⁸ Jehova Diosqa unanchawaqninchik kasqanraykum hinaspa paypa makinpi tukuy imapas kasqanraykum obligawachwan payta servinanchikpaq. Ichaqa manamá haykapipas chaytaqa ruwanmanchu. Payqa munachkan hayka runapas wiñaypaq amistadnin kanantam (1 Tim. 2:​3, 4). Chayraykum tukuy ima unanchasqanwan yachachiwanchik pay kasqanta hinaspa anchata kuyawasqanchikta. Allintataqmi yachachiwanchik lliw runakunapaq ima ruwananmanta chaynataq prometesqanta imayna cumplinanmanta runamasinchikkunaman yachachinapaqpas (Mat. 10:​11-13; 28:​19, 20). Chaymantapas, sapa congregacionpim punta apaqkunata churan serviqninkunata kuyakuywan cuidawananchikpaq (Hech. 20:28).

9. ¿Imaynatam yachanchik Dios anchata kuyawasqanchikta?

⁹ Diosqa anchatataqmi kuyan pay kasqanta mana creeyta munaqkunatapas. Ñawpaqmantaraqmi millonnintin runakuna munasqankuman hina kawsakunankupaq tantiakurqaku. Chaywanpas Diosninchikqa kawsanankupaq tukuy ima necesitasqankutam qun (Mat. 5:​44, 45; Hech. 14:​16, 17). Pay kuyakuq kasqanraykum familiayuq, churi-wawayuq, amistadniyuq hinaspa llamkayniyuq kanku (Sal. 127:3; Ecl. 2:24). Tukuy chaykunawanmi mana iskayrayanchikchu taytanchik Jehova Diosqa llapallanchikta kuyawasqanchikmanta (Ex. 34:6). Kunanñataqyá yachaykusun Jehova Diosta servinapaq imanasqa akllakusqanchikmanta hinaspa imaynata pay bendeciwasqanchikmanta.

¿IMANASQAM DIOSTA SERVINAPAQ AKLLAKURQANCHIK?

10. (1) ¿Imanasqataq Diosta servinchik? (Rimarimuytaq Mateo 22:37 nisqanmantapas). (2) ¿Imaynatam yanapasurqanki Jehova Diospa pacienciakuq kasqan? (Rimarimuytaq Salmos 103:​13, 14 nisqanmantapas).

¹⁰ Ñuqanchikpas Jesus hina tukuy sunquwan kuyasqanchikraykum Jehova Diostaqa servinchik (leey Mateo 22:37). Pay imayna kasqanta astawan yachaspanchikmi sumaq sunquyuq kasqanrayku astawan kuyanchik. Yachanchikmi ancha pacienciakuq kasqanta. Chaymi Israel runakuna mana kasukuptinku ruegaq: “Ama hina kaspayá mana allin ñannikichikta saqiychik”, nispan (Jer. 18:11). Chaymantapas payqa yuyanmi ñutu allpamanta ruwasqa kasqanchikta (leey Salmos 103:​13, 14). Pacienciakuq hinaspa sumaq sunquyuq kasqanpi yuyaymanaspaqa, ¿manachu kallpanchasqa tarikusun wiñaypaq servinapaq?

11. ¿Imanasqaraqtaq Jehova Diosta servinchik?

¹¹ Jehova Diostaqa servinchiktaqmi payta serviy allin kasqanta yachasqanchikrayku (Mat. 4:10). Sapa kutitaqmi yuyarinchik Diosman sunqu kaspanchikqa paypa sutinta chuyanchasqanchikta, satanas llulla kasqanta qawachisqanchikta hinaspa Diospa sunqunta kusichisqanchikta. Diosta servinapaq kunan akllakuspanchikqa wiña-wiñaypaqmi serviyta atisun (Juan 17:3).

12, 13. ¿Imatam yachachwan Yanetmantawan Pamelamanta?

¹² Warmachakunapas Diostaqa anchatam kuyanmanku. Hatunyasqankuman hinam Diosta kuyayninkuqa astawan wiñanqa. Chaypaqyá rimarisun Yanetmantawan ñañan Pamelamanta.a Paykunaqa 11 hinaspa 10 watankupi kachkaspallankuraqmi biblia estudiayta qallaykurqaku. Tayta-mamankuqa biblia estudiayta mana munaspankupas warmanku testigokunawan estudianantam saqirqaku. Saqirqakuqa sapa semana tukuyta hinalla paykunawan iglesiata rinankuraykum. Yanetmi nin: “Testigokunawan bibliata estudiasqaymi yanapawarqa estudiaqmasiykuna hina mana drogakunaypaq utaq warmi-qari puñuyman mana wichiykunaypaq”, nispa.

¹³ Sipaschaña kachkaspankum iskayninku bautizakururqaku, chaymantañataqmi precursora karqaku, hinaspapas yuyaqña tayta-mamankutam cuidarqaku. Testigo kaspan imayna kawsakusqanmantam Yanet nin: “2 Timoteo 2:19 nisqanman hinam Jehova Diosqa amistadninkunataqa mana qunqanchu. Chaypim nin: ‘Jehova Diosqa riqsinmi pim yupaychaqnin kasqanta’”, nispa. Arí, Diosqa allintam cuidan payta kuyaspan servinanpaq akllakuqkunataqa.

14. ¿Imatam ruwachwan Diosmanta llullakunata rimaptinku? (Qawaytaq fototapas).

¹⁴ Jehova Diosmanta llullakunata rimaptinkuqa imam kaqta yachanankupaqmi yanapayta munanchik. Piensariy kuyakuq, qukuykuq hinaspa imayna tarikusqaykita entiendesuqniki amistadnikipi. Huk punchaw uyariruwaq mana allin hinaspa llulla kasqanta rimasqankuta. ¿Imatam ruwawaq? ¿Manachu niwaq nisqankuqa llulla kasqanta? Yaqa chaynam Jehova Diosmanta llullakunata rimaptinkupas imam kaqta nispanchik defiendenchik (Sal. 34:1; Is. 43:10). Imapas rimasqanchikkunawan ruwasqanchikkunam qawachinqa Diosta tukuy sunquwan serviy munasqanchikta.

15. ¿Ima bendicionkunatam Pablo chaskirqa vidanpi imapas haypay munasqankunata cambiasqanrayku? (Rimarimuytaq Filipenses 3:​7, 8 nisqanmantapas).

¹⁵ Jehova Diosta kusichiyta hinaspa astawan serviyta munasqanchikraykum vidanchikpi imapas haypay munasqanchikta cambiananchik kanqa. Chaytam ruwarqa apostol Pablopas. Payqa llaqtanpi allin riqsisqa kaytam saqirqa Jesuspa qatiqnin kaspan Jehova Diosta servinanpaq (Gal. 1:14). Chayraykum kusisqa kawsakurqa, hinaspapas Jesuswan kuska kamachimunanpaqmi akllasqa karqa. Pabloqa manamá haykapipas pesakurqachu Diosta servinanpaq tantiakusqanmantaqa, manataqmi ñuqanchikpas pesakusunchu (leey Filipenses 3:​7, 8).

16. ¿Imatam yachachwan Juliapa tantiakusqanmanta? (Qawaytaq fotokunatapas).

¹⁶ Jehova Dios serviyta imamantapas puntapi churaspanchikqa kunanpas hinaspa hamuq tiempopipas achka bendicionkunatam chaskisun. Rimarisun Juliamanta. Paymi taksachanmanta iglesianpi takiq karqa. Chayna takiq kasqanmantam cuentata qukururqa ancha riqsisqa takiqkunata yachachiq, hinaspanmi nirqa astawan yachachinanpaq. Manapas unaymanta ancha riqsisqa rikuriruspanmi achka runakunapa qayllanpi takirqa. Musicata estudiachkaptinmi estudiaqmasin willarqa Diosmanta hinaspa Diospa sutin Jehova kasqanta. Chaymi Juliaqa semanapi iskay kutita biblia estudiayta qallaykurqa. Chaymantam Jehova Diosta servinanpaq tantiakururqa musicata hinalla estudiananmantaqa. Chaypaq tantiakuyninqa manamá facilchu karqa. Paymi willakun: “Achka runakunam niwaq allin takiq kasqaypas yanqapaq kasqanta. Chaywanpas ñuqaqa Jehova Diosta servinaypaqmi tantiakururqani”, nispa. Chayna tantiakusqanmantam 30 wataña pasarun. Paymi nin: “Kusisqam tarikuni, hinaspapas manam iskayrayanichu imapas munasqaykunata hamuq tiempopi Dios quwananmantaqa”, nispa (Sal. 145:16).

JEHOVA DIOSTAYÁ HINALLA SERVISUN

17. ¿Imanasqataq Diosta mana serviqkunapas chaynataq Diosta serviqkunapas yachananchik tukupay tiempollapiña kasqanchikta?

¹⁷ Tukuy mana allinkunapa tukunan punchawqa kayllapiñam kachkan. Apostol Pablom qillqarqa: “Manapas unaymantam hamuqqa chayaramunqa, payqa manam unamunqachu”, nispa (Heb. 10:37). ¿Ima ninantaq chayqa? Runamasinchikkunapaqmi Diosta servinankupaq akllakunanku tiempo tukuykuchkanña (1 Cor. 7:29). Ñuqanchikmi ichaqa akllakurunchikña Diosta servinapaq, chaymi yachanchik ima sasachakuypiña kasqanchikpas ‘manaña unay’ kananta.

18. ¿Imata ruwananchiktam Jehova Dioswan Jesusqa munan?

¹⁸ Jesusqa runakunataqa kallpancharqa manam qatiqnin kanallankupaqchu, aswanqa hinalla qatinankupaqwanmi (Mat. 16:24). Chayraykuyá unay wataña Diosta servispanchikpas hinalla kusikuywan servisun, amayá hukmanyasunchu. Yachanchikmi Diosta serviyqa wakinpi sasa kananta, chaywanpas payqa munan tantiakusqanchikman hina hinalla servinanchiktam. ¿Manachu Diosta servisqanchikrayku ancha kusisqa tarikunchik hinaspa achka bendicionkunata chaskinchik? (Sal. 35:27).

19. ¿Imatam yachachwan Yimipa willakusqanmanta?

¹⁹ Wakinkum piensanku Diosta serviyqa tukuy imapi kusirikunankuta harkasqanta. Musu-sipas kaspaykiqa, ¿piensankichu Diosta servisqaykirayku wiñaymasikikuna hina imatapas mana ruwanaykita utaq vidaykipi llakisqallaña kanaykita? Yimipas kaynatam nin: “Ñuqaqa piensarqani Jehova Diospa testigon kaspay mana imapipas kusirikunaytam. Wiñaymasiykuna fiestakunaman rispanku, sipaskunawan lluqsispanku hinaspa computadorapi mana allin pukllaykunapi pukllaspanku kusisqa kasqankutam piensarqani. Ñuqañataqmi huñunakuykunallaman hinaspa Diosmanta willakuqlla riq kani”, nispa. ¿Imapim tukurqa Yimipa chayna piensasqan? Kikinmi nin: “Huñunakuykunaman hinaspa Diosmanta willakuq richkaspaypas pakallapim mana allinkunawan kusirikuyta qallaykurqani. Ichaqa manam sunquypiqa kusisqachu tarikurqani. Chaymi bibliapa ima nisqankunata mana kasukusqayta yuyariyta qallaykurqani. Yuyaymanarqanitaqmi chay consejokunata kasukuyniyqa allinniypaq kasqanpipas. Chaymantam tantiakururqani Diosta tukuy sunquywan servinaypaq. Chaymantapacham payqa mañakusqayman hina tukuy imapi yanapawarqa”, nispa.

20. ¿Imata ruwanapaqmi tantiakunanchik?

²⁰ Davidmi Jehova Diospaq kaynata takirqa: “Mayna kusisqam qampa akllasqayki runaqa. Mayna kusisqam wasikipi yachananpaq akllasqayki runaqa”, nispan (Sal. 65:4). Josuey hinamá mana iskayrayaspa ninanchik: ‘Ñuqawan wasiypi kaqkunaqa Jehova Diosllatam yupaychasaqku’, nispa (Jos. 24:15).