Iñiqmasinchikkunawan amistad kayqa allinpunim

1, 2. ¿Imatam Jehova Diosqa qawamuchkan? ¿Iñiqmasinchikkunata imaynata kuyananchiktam munan?

JEHOVA DIOSQA qawamuchkanmi runamasinchikkunawan imayna kasqanchikta hinaspa paykunapaq imakuna ruwasqanchikta. Jesuspas yachachirqam runamasinchikta kikinchikta hina kuyanapaq (Mat. 22:​37-39). Chaymi Diosta mana serviq runakunawanpas kuyakuq kananchik. Chayta ruwaspaqa hanaq pacha taytanchiktam qatipakuchkanchik, “payqa intitapas qispichimun allin hinaspa mana allin runakunapaqmi, parachimunpas kasukuq chaynataq mana kasukuq runakunapaqmi” (Mat. 5:45).

² Jehova Diosqa llapallan runakunata kuyaspanpas serviqninkunatam astawanqa kuyan (Juan 14:21). Payta qatipakunanchikta munasqanraykum kallpanchawanchik iñiqmasinchikkunata ‘sunqumanta anchata kuyanapaq’ (1 Ped. 4:8; Rom. 12:10). Arí, iñiqmasinchikkunataqa kuyananchik ayllunchikta hinam utaq ancha kuyasqanchik amistadninchikta hinam.

3. ¿Imawanmi tupachichwan iñiqmasinchikkuna kuyasqanchikta?

³ Imaynam plantacha allin wiñananpaqpas yakuta tallinanchik hinaspa cuidananchik, chaynam iñiqmasinchikkunata kuyanapaqpas anchata kallpanchakunanchik. Apostol Pablom iñiqmasinkunata nirqa: “Wawqi-panintin hinayá hinalla kuyanakuychik”, nispan (Heb. 13:1). Diosqa munan hukkunata hinalla kuyananchiktam. Chaymi kay yachachikuypi yachasun iñiqmasinchikkunawan amistad kay ancha allin kasqanmanta hinaspa hinalla chayna kanapaq imakunata ruwanamanta.

IÑIQMASINCHIKKUNAWAN AMISTAD KAYQA ANCHA ALLINMI

4. ¿Imatam ruwachwan Salmos 133:1 nisqanman hina iñiqmasinchikkunawan huk sunqulla kasqanchikta valoranapaq? (Qawaytaq fotokunatapas).

⁴ (Leey Salmos 133:1). Salmosta qillqaq hinam ñuqanchikpas ninchik: “‘Mayna allinmi hinaspa mayna sumaqmi’ Jehova Diosta kuyaqkunapa amistadnin kayqa”, nispa. Ichaqa, ¿imanasqam manaña valorachwanchu paykunawan amistadninchikta? Imaynam hatu-hatun sachata sapa punchaw qawaptinchikqa manaña hatu-hatunñachu rikchakapuwachwan, chaynam iñiqmasinchikkunawan sapa punchaw tupaptinchikpas huk sunqulla kasqanchikqa manaña suma-sumaqñachu rikchakapuwachwan. Chaynaqa, ¿imatam ruwachwan chayllaraq riqsisqanchik punchaw hina iñiqmasinchikkunata kuyanapaq? Tiempochakuspam piensananchik sapakama iñiqmasinchik ñuqanchikta hinaspa lliw iñiqmasinchikkunata imaynata yanapasqanpi.

5. ¿Imamantam runamasinchikkuna mana iskayrayankuchu kikinchikpura kuyanakusqanchikta qawaspanku?

⁵ Wakin runamasinchikkunaqa huñunakuyman chayllaraq riruspankum anchata admirakunku llapallanchik anchata kuyanakusqanchikta qawaspanku, hinaspankum manapuni iskayrayankuchu Diospa chiqap qatiqninkuna kasqanchikmanta. Jesuspas kaynatam nirqa: “Qamkuna kuyanakuptikichikmi llapa runakuna yachanqaku qatiqniykuna kasqaykichikta”, nispa (Juan 13:35). Universidadpi estudiaq Cintiam biblia estudiayta qallaykurqa. Paytam invitaykurqaku kimsa punchaw asambleaman. Huk punchaw chay huñunakuypi karuspanmi bibliamanta yachachiqninta nirqa: “Tayta-mamayqa manam haykapipas abrazaykuwarqachu. Kaypim ichaqa huk punchawllapi 52 abrazotaña chaskikuruni. Kayna kuyakuq runakunata riqsisqaywanmi cuentata qukuruni Jehova Dios anchata kuyawasqanta. Chaymi familianpa parten kayta munani”, nispa. Cintiaqa hinalla bibliata estudiaspanmi bautizakururqa 2024 watapi. Arí, runamasinchikkunaqa allin kaqkuna ruwasqanchikta hinaspa kikinchikpura kuyanakusqanchikta qawaspankum munanku Diospa serviqnin kayta (Mat. 5:16).

6. ¿Imanasqam nichwan iñiqmasinchikkunawan amistad kayqa mana allinkunamanta harkawasqanchikta?

⁶ Iñiqmasinchikkunawan amistad kayqa harkawanchiktaqmi mana allinkunamantapas. Pablom iñiqmasinkunata nirqa: “Qamkunaqa hinallayá sapa punchaw kallpanchanakuychik […], chaynapi atiyniyuq hina hucha mayqinnikichiktapas engañasuspaykichik sunquykichikta ama rumiyachinanpaq”, nispa (Heb. 3:13). Hukmanyasqa kaptinchikmi hinaspa Diosmanta karunchakuyta qallaykuptinchikmi payqa mayqan iñiqmasinchikwanpas yanapawachwan (Sal. 73:​2, 17, 23). ¡Mayna allinmi iñiqmasinchikkunapa chayna yanapawasqanchikqa!

7. ¿Imaynatam kuyakuq kayqa yanapawanchik huk sunqulla kanapaq? (Rimarimuytaq Colosenses 3:​13, 14 nisqanmantapas).

⁷ Jehova Diospa testigonkunaqa anchata kuyanakunapaqmi kallpanchakunchik, chayraykum Diosqa bendeciwanchik (1 Juan 4:11). Kuyakuq kasqanchikraykum iñiqmasinchikkunawanqa aguantanakunchik, chaymi yanapawanchik Diosta huk sunqulla servinapaq (Efes. 4:​2-6; leey Colosenses 3:​13, 14). Chayraykutaqmi huñunakuyninchikkunaman rispapas kusisqa parlarinchik, abrazanakunchik hinaspa ancha kuyasqa tarikunchik. Manamá chaynaqa kanchu huk religionkunapiqa.

HUKKUNAPAQYÁ ALLIN KAQKUNATA RUWASUN

8. ¿Imaynatam Jehova Dios yanapawanchik huk sunqulla kanapaq?

⁸ Jehova Dios yanapawaptillanchikmi pantaq kaspapas enteron pachapi iñiqmasinchikkunawanqa huk sunqulla kanchik (1 Cor. 12:25). Bibliapim nin: ‘Qamkuna imayna kuyanakunaykichikpaqqa Diosmi yachachichkasunkichik’, nispa (1 Tes. 4:9). Chaypaqmi palabranpi niwanchik iñiqpura allin amistad kanapaq imata ruwananchikpaq. Ñuqanchikñataqmi Diospa yachachisqan kanapaq palabranta allinta estudianchik hinaspa chaypi nisqanman hina kawsakunchik (Heb. 4:12; Sant. 1:25). Jehova Diospa lliw testigonkunamá chayta ruwanapaqqa kallpanchakunchik.

9. Romanos 12:​9-13 nisqanman hinaqa, ¿imaynam kananchik iñiqmasinchikkunawan?

⁹ ¿Imaynatam Diospa palabran yanapawachwan iñiqmasinchikkunawan amistad kanapaq? Chaypaq qawasun Romanos 12:​9-13 (leey) nisqanpi Pablopa ima nisqanta. Paymi nirqa: “Qamyá puntataqa hukkunapaq allin kaqkunata ruwaykapuy”, nispan. Chaywanmi niwachkanchik iñiqmasinchikkunawan pampachanakuq, samaykachikuq hinaspa qukuykuq kanamanta. Hinaspapas atentom kananchik paykunata imapipas yanapananchikpaq (Efes. 4:32). Manam suyananchik ñuqanchikman asuykamuwananchiktaraqchu, aswanqa ñuqanchikmi asuykuspanchik imapipas yanapananchik. Chaywanmi cuentata qukusunchik Jesuspa nisqanqa ñuqanchikpaqpas cierto kasqanta, paymi nirqa: “Imapas quqmi aswan kusisqaqa imapas chaskiqmantaqa”, nispan (Hech. 20:35).

10. ¿Imaynatam iñiqmasinchikkunata yanapaspa allin llamkakuq kachwan? (Qawaytaq fototapas).

¹⁰ Puntata ñuqanchik hukkunapaq allin kaqkunata ruwaykapunamanta rimaruspallanmi Pabloqa nirqa: “Llamkakuqyá kaychik, amayá qillaqa kaychikchu”, nispan. Allin llamkakuq runaqa ima llamkaytapas kusisqam ruwan, allintataqmi ruwan imatapas ruwananpaq pipas kamachiptinqa. Proverbios 3:​27, 28 nisqanpim nin: “Pitapas yanapaykuyta atichkaspaqa yanapaykuyá, amayá qawayllaqa-qawakuychu”, nispa. Chaynaqa, pipas yanapanata necesitaptinqa tukuy atisqanchiktam ruwananchik yanapaykunanchikpaq. Amayá nisunchu: “Chaymantañachiki yanapasaq utaq ñuqa mana yanapaptiyqa hukchiki yanapaykunqa”, nispaqa (1 Juan 3:​17, 18).

11. ¿Imata ruwaspanchiktaq iñiqmasinchikkunawan amistad kasun?

¹¹ Hukkunapaq allin kaqkunata ruwaykapuyqa kanmantaqmi pipas sientirachiwaptinchikqa chaylla pampachaykuypas. Efesios 4:26 nisqanpim nin: “Amayá inti siqaykunankamaqa piñasqaqa kaychikchu”, nispa. ¿Imanasqam chaynata nin? 27 versiculopa nisqanman hina diablo mana urmarachiwananchikpaqmi. Jehova Diosqa palabranpim sapa kuti niwanchik hukkunata pampachananchikpaq. Chaymi Colosenses 3:13 nisqanpi consejawanchik: “Tukuy sunqumantayá hinalla pampachanakuychik”, nispa. Iñiqmasinchikkunapa pantasqallankuta hinaspa sientichiwasqallanchikta mana qawaspaqa allin amistadmi kasun. Chayna kaspaqa ‘Diospa atiyninpa yanapakuyninwanmi huk sunqulla kasunchik’ (Efes. 4:3). Iñiqmasinchikkunata mana pampachaspaqa manam atichwanchu paykunawan huk sunqulla hinaspa hawkalla kaytaqa.

12. ¿Imaynatam Diosqa yanapawanchik iñiqmasinchikkunata pampachanapaq?

¹² Wakinpiqa sasam kanman mana allin ruwaruwaqninchikta pampachayqa. Chaywanpas atiyninwan Dios yanapawaptinchikqa atichwanmi. Tukuy sunqumanta kuyanakunapaq hinaspa allin llamkakuq kanamanta rimaruspanmi Pabloqa nirqaraq: “Diospa atiyninwanyá ancha kallpanchasqallaña kaychik”, nispan. Arí, Diospa atiynin yanapawaptinchikqa allin kaqkunata kusisqallaña ruwanapaqmi kallpanchasqa kasun. Manataqmi sasachu kanqa tukuy sunqumanta kuyanakuyqa hinaspa pampachanakuyqa (Romanos 12:11 versiculopaq “Que el espíritu los llene de fervor” niq willakuyta qaway Biblia de Estudio nisqanpi). Chayraykumá Jehova Diosta ruegakunchik atiyninwan yanapawananchikpaq (Luc. 11:13).

‘MANAM RAKINASQAQA KANANCHIKCHU’

13. ¿Imanasqataq iñiqmasinchikkunamanta karunchakuruchwan?

¹³ Congregacionkunapiqa ‘tukuy rikchaq runakunam’ kanchik (1 Tim. 2:​3, 4). Mana chaynalla uywasqa kasqanchikraykum mana igualtachu tantiakusun imayna pachakunapaqpas, imakunawan hampichikunapaqpas chaynataq imakunawan kusirikunapaqpas. Hukkunapa imayna tantiakusqankuta mana respetaspanchikqa iñiqmasinchikkunamantam karunchakuruchwan (Rom. 14:4; 1 Cor. 1:10). Diosmi yachachiwanchik iñiqmasinchikkunawan kuyanakunanchikpaq, chayraykum mana nichwanchu ñuqanchikpa tantiakusqanchik hukkunapamanta aswan allin kasqantaqa (Filip. 2:3).

14. ¿Imatam sapa kuti ruwananchik hinaspa imanasqa?

¹⁴ Congregacionninchikpi rakinasqa hina mana kanapaqqa sapa kutim hukkunata kallpanchananchik hinaspa yanapananchik (1 Tes. 5:11). Kay watakunapim Diosmanta manaña willakuqkuna utaq congregacionmanta qarqusqa kaqkuna Diospa llaqtanman achka kutiykamurqaku. Paykunataqa kuyakuywanmi chaskiykunchik (2 Cor. 2:8). Yaqa chunka watamantaña huñunakuyman hamuq iñiqmasinchikmi kaynata nin: “Llapallankum kuyakuywan hinaspa kusikuywan saludawarqa”, nispan (Hech. 3:19). Chaynata chaskiykusqankuwan imayna tarikusqanmantam nin: “Chay punchawmi cuentata qukurqani Jehova Diosqa kusisqa kanayta munasqanrayku llaqtanman kutiykunaypaq pusawasqanmanta”, nispan. Hukkunata kallpanchanapaq tukuyta ruwaptinchikmi Jesusqa ñuqanchikta valekunman llasaq qipiyuq hina iñiqmasinchikkunata yanapaykunanchikpaq (Mat. 11:​28, 29).

15. ¿Imaraqtaq yanapawasun iñiqmasinchikkunawan huk sunqulla kanapaq? (Qawaytaq fototapas).

¹⁵ Iñiqmasinchikkunawan huk sunqulla kanapaqqa yanapawasuntaqmi imatapas manaraq rimachkaspa allinta piensariypas. Job 12:11 nisqanpim nin: “Imaynam mikuytapas malliykuspa yachanchik miski kasqanta, chaynam pipa rimasqantapas allinta uyarispa yachanchik allin utaq mana allin kasqanta”, nispa. Yanukuyta yachaqqa manaraq servichkaspanmi malliykun miski kasqanmanta segurakunanpaq. Chaynam ñuqanchikpas imatapas manaraq rimachkaspa allinta piensananchik, chaynapi uyariwaqninchikkunata kallpanchanapaq, yanapanapaq hinaspa sunqunkuta tiyaykachinapaq (Sal. 141:3; Efes. 4:29).

16. ¿Pikunataq rimasqankuwan hukkunata astawan kallpanchananku?

¹⁶ Casarasqa qarikunaqa chaynataq tayta-mamakunaqa astawanraqmi rimasqankuwanqa hukkunata kallpanchananku (Col. 3:​19, 21; Tito 2:4). Punta apaqkunapas tukuytam ruwananku Diospa serviqninkunata kallpanchanankupaq hinaspa sunqunkuta tiyaykachinankupaq (Is. 32:​1, 2; Gal. 6:1). Proverbios libropim niwanchik: “¡Mayna kusisqam tupaqninpi rimariq runaqa!”, nispa (Prov. 15:23).

IÑIQMASINCHIKKUNAPAQYÁ IMATAPAS SUNQUMANTA RUWASUN

17. ¿Imatam ruwachwan iñiqmasinchikkunawan ancha kuyakuq kanapaq?

¹⁷ Apostol Juanmi nirqa: “Ñuqanchikqa manam rimaspallachu utaq simillanchikwanchu kuyanakunanchik, aswanqa imatapas sunqumanta ruwaspam”, nispa (1 Juan 3:18). ¿Imatam ruwachwan chayna kuyakuq kanapaq? Iñiqmasinchikkunawan kuska kanapaqmi tiempochakunanchik, chayta ruwaspaqa paykunawan amistad kaspam astawanraq kuyasun. Huñunakuypi hinaspa Diosmanta willakusqanchikpi iñiqmasinchikkunawan kuska kanapaqyá tiempochakusun. Tiempochakusuntaqyá wasinkuta visitanapaqpas. Chayta ruwaspaqa ‘imayna kuyanakunanchikpaq Diospa yachachisqanmi kachkanchik’ (1 Tes. 4:9). Hinaspapas kikinchikmi qawasun “wawqi-panintin huk sunqulla kawsakuyqa” ancha allin hinaspa suma-sumaq kasqanta (Sal. 133:1).