¿Imaynatam kusisqa kayta atichwan?

1. ¿Imaynataq kusisqa kawsakuq runaqa?

IMAYNA kawsakusqanwan kusisqa kaq runaqa Jehova Diospa allin kaqkuna qusqanpi piensaspanmi hawka tarikun, manam mana kapusqankunapi llumpayta piensaspanchu piñasqallaña tarikun. Chaywanpas manamá mana imatapas ruwaspanchu kawsakun, aswanqa Jehova Diospa kaqkunata astawan ruwananpaqmi kallpanchakun, hinallataqmi kusisqa kawsakun imapas munasqanpi yanapakunanpaq mana niptinkupas (Rom. 12:1; 1 Tim. 3:1).

2. ¿Imamantaq wichiykuchwan imapas kapuwasqallanchikwan utaq Diosta servispa imatapas ruwasqanchikwan mana kusisqa kaspaqa?

² Imapas kapuwasqanchikwan mana kusisqa kawsakuspaqa ruwaruchwanmi ima mana allintapas. Wakiqninchikqa ichapas llumpay tardekama llamkayta qallaykuchwan mana necesitasqanchik kaqkunata rantinapaq. Wakin iñiqmasinchikkunaqa qullqita utaq imatapas munaruspankum suwakuyman wichiykurqaku. Ichapas piensarqaku: “‘Anchata llamkasqayraykum kayqa ñuqapaq kanan’, ‘manañam suyaymanñachu rantinaykamaqa’ utaq ‘kay qullqitayá hapirusaq, chaymantachiki kutichipusaq’”, nispanku. Imataña niptinkupas chayqa suwakuymi. Suwakuytaqa Jehova Diosqa chiqninmi sutinta pinqayman churasqanrayku (Prov. 30:9). Wakin iñiqmasinchikkunañataqmi imapas munasqanku kaqpi yanapakunankupaq mana niptinku hukmanyarunku utaq piñakurunku, hinaspankum Diosmanta karunchakurunku (Gal. 6:9). ¡Imaynamá Jehova Diosta serviqqa chaykunataqa ruwanman! Ichapas chaymanqa wichiykurqa imayna kawsakusqanwan pisi-pisimanta manaña kusisqa kasqanrayku.

3. ¿Imatam yachachwan Filipenses 4:​11, 12 nisqanmanta?

³ Wakinpi sasa kaptinpas imapas kapuwasqallanchikwan kusisqa kawsakuytaqa atichwanmi. Apostol Pablopas nirqam: “Imayna tarikuspaypas imapas kapuqllaywan kawsakuytam yacharuni”, nispan (leey Filipenses 4:​11, 12). Chaytaqa qillqarqa preso kachkaspanmi, chaywanpas hinallam kusisqa karqa. Wakinpi mana kusisqa kaspanchikpas apostol Pablota qatipakuspanchikmi hawka kawsakuyta atichwan. Kay yachachikuypim yachasun imaynaña tarikuspapas imaynata kusisqa kanamanta.

AGRADECEKUQYÁ KASUN

4. ¿Imanasqataq agradecekuq kananchik? (Rimarimuytaq 1 Tesalonicenses 5:18 nisqanmantapas).

⁴ Agradecekuqllaña kaspaqa aswan kusisqam kawsakusun (leey 1 Tesalonicenses 5:18). Imapas kapuwasqallanchikwan agradecesqa kaspanchikqa manam llumpaytaqa piensasunchu mana kapuwasqanchikkunapiqa. Jehova Diosta servispapas imapas ruwasqanchikkunallawan kusisqa kaspaqa paypaqmi astawan imatapas ruwayta munasun. Manam llumpaytaqa piensasunchu munasqanchik kaqkunapi yanapakunapaq niwananchikpiqa. Chayraykupaschá bibliapipas niwanchik sapa kuti Diosta mañakuspa agradecekunanchikpaq. Agradecekuq kaptinchikqa ‘runapa mana entiendey atinan’ Diospa hawkayayninmi yanapawasun (Filip. 4:​6, 7).

5. ¿Imakunapi piensaspankum Israel runakunaqa Jehova Diosta agradecekunmanku karqa? (Qawaytaq dibujotapas).

⁵ Ñawpaq tiempopi Israel runakunam Egiptopi mikusqanku mikuykunata yuyarispanku Jehova Diosman quejakurqaku (Num. 11:​4-6). Arí, chunniqpi kasqankuqa manamá facilchu karqa. Chaywanpas paykunapaq tukuy imata Jehova Dios ruwasqanpi piensaspankuqa kusisqam kanmanku karqa. Yuyarinmankumá karqa sirviente kachkaptinku hinaspa maqapasqa kachkaptinku Egipto runakunaman 10 castigokunata kachaykuspan paykunata Jehova Dios hurqusqanta. Hurqurqaqa manamá mana imayuqtachu, lluqsispankum Egipto runakunapata apakurqaku qullqinkuta, qurinkuta, pachankuta hinaspa tukuy imankuta (Ex. 12:​35, 36). Chaymantapas Egipto soldadokuna qatiptinmi Jehova Diosqa Puka lamar quchata kicharurqa chayninta Israel runakuna pasananpaq. Chunniqninta riptinkupas maná sutiyuq mikuytam sapa punchaw qurqa. Chaynaqa, ¿imanasqataq quejakurqaku? Manam mikuyninku faltasqanraykuchu, aswanqa tukuy imankumanta mana agradecekuq kasqankuraykum.

6. ¿Imatam ruwananchik agradecekuq kanapaq?

⁶ Agradecekuq kanapaqqa sapa punchawmi tiempochakunanchik imakunawan kusisqa kasqanchikpi piensanapaq. Wakinpiqa imakunamanta agradecesqa kasqanchiktam qillqachwan iskayta utaq kimsata (Lam. 3:​22, 23). Chaymantapas ñuqanchikpaq pipas imatapas ruwaykapuwaptinchikmi sapa kuti “gracias” ninanchik, astawanraqmi Jehova Diostaqa (Sal. 75:1). Agradecekuq runakunawantaqmi hukllawakunanchik, amistadninchikkuna mana agradecekuq utaq quejakuq kaptinkuqa chaynam kasun. Agradecekuq kaptinkum ichaqa ñuqanchikpas agradecekuq kasun (Deut. 1:​26-28; 2 Tim. 3:​1, 2, 5). Imamantapas agradecekuq kaspanchikqa manamá quejakusunchu mana kapuwaqninchik kaqkunamantaqa.

7. ¿Imatam Amelia ruwarqa kusisqaña kananpaq?

⁷ Indonesia nacionmanta Ameliama nin: “Coronavirus tiempopim imayna kawsakusqayta iñiqmasiykunapa imayna kawsakusqanwan tupachispay hukmanyarurqani”, nispan (Gal. 6:4). Mana hukmanyasqalla kananpaq imata ruwasqanmantam nin: “Sapa punchaw Jehova Dios imakunata quwasqanpim piensayta qallaykurqani. Piensarqanitaqmi payta servispay kusisqa kawsakusqaypipas. Tukuy chaykunamanta Jehova Diosta agradecekuspaymi kusisqa hinaspa hawkalla tarikurqani”, nispa. Ameliatayá qatipakusun imayna kawsakusqanchikwan mana kusisqa kaspanchikqa.

HUMILDEYÁ KASUN

8. ¿Imam Barucwan pasarurqa?

⁸ Diosmanta willakuq Jeremiaspa secretarion Barucmi huk tiempopi imayna kawsakusqanwan mana kusisqachu tarikurqa. Payqa Jeremiastam yanaparqa Israel runakuna mana kasukusqankurayku ima pasananmanta willaypi, chayqa sasachá karqa. Barucqa ima ruwananta Dios munasqanpi piensananmantaqa kikillanpim hinaspa ima ruway munasqallanpim piensayta qallaykurqa. Chaymi Diosqa Jeremiaswan nichirqa: ‘Tukuy ima maskaypim kachkanki, saqinaykim chaykuna maskaytaqa’, nispan (Jer. 45:​3-5). Huk rimaypiqa nichkarqa: “Imayna kawsakusqaykiwanyá kusisqa kay”, nispanmi. Barucqa nisqanta kasukuspanmi hinalla Diospa kuyasqan karqa.

9. ¿Imatam niwanchik 1 Corintios 4:​6, 7 nisqan? (Qawaytaq fototapas).

⁹ Yaqapaschá mayqin iñiqmasinchikpas tukuy imata yachaq kasqanrayku, Diospaq anchata llamkasqanrayku utaq unay wataña Diosta servisqanrayku piensanman imapipas yanapakunanpaq ninankuta. Chayna kaptinpas munasqanpi yanapakunanpaq hukta niykuptinkuqa, ¿imatam ruwanman mana hukmanyarunanpaq utaq mana piñakurunanpaq? 1 Corintios 4:​6, 7 (leey) textopi apostol Pablopa nisqanpim yuyaymananman. Imatapas ruway yachasqanchikqa utaq imapipas yanapakusqanchikqa manam kikillanchikmantachu, aswanqa Jehova Dios anchata kuyawaspanchik yanapawasqanchikraykum (Rom. 12:​3, 6; Efes. 2:​8, 9).

10. ¿Pitam qatipakunanchik humilde kanapaq?

¹⁰ Humilde utaq mana hatuntukuq kanapaqqa Jesustam qatipakunanchik. Payqa Diospa churin hinaspa atiyniyuq kachkaspanpas apostolninkunapa chakintam mayllarqa. Apostol Juanmi qillqarqa: ‘Jesusqa yacharqam makinpi tukuy imatapas taytan churasqanta, yacharqataqmi Dios kachamusqantapas chaynataq Diosman kaqlla kutinantapas [ . . . ]. Chaywanpas qatiqninkunapa chakintam mayllayta qallaykurqa’, nispa (Juan 13:​3-5). Jesusqa ninmanpaschá karqa: “¡Qatiqniykunam mayllawananqa!”, nispan. Ichaqa manam chaytaqa piensarqachu. Chaymantapas, manam Diospa churin kasqanraykuchu piensarqa allin wasiyuq kayta, qullqisapa kayta utaq tukuy imayuq kayta (Luc. 9:58). Aswanqa humilde kaspanmi imapas kapusqankunallawan kusisqa kawsakurqa. Chaymi payta qatipakunanchik (Juan 13:15).

11. ¿Imam Dennista yanaparqa kusisqa kananpaq?

¹¹ Paises Bajos nacionmanta iñiqmasinchik Dennismi willakun Jesus hina humilde kananpaq kallpanchakuptinpas wakinpi sasa kasqanta. Paymi nin: “Munasqay kaqpiraq yanapakunanpaq pitapas niptinkum piñakuspayraq nikuni: ‘Ñuqatachiki niwanmankuqa’, nispay. Chayna tarikuspaymi estudiani humilde kaymanta. Chaypaqmi JW Library^® niqpi etiquetas nisqanpi chaymanta rimaq achka textokunata churaruni, chaynapi facilta tarispay kaqmanta leenaypaq. Chaymantapas, humilde kaymanta videokunata celularniyman descargaruspaymi qawani.b Tukuy chaykunawanmi yacharuni imatapas ruwasqanchikqa Diosta hatunchanapaq kasqanta. Diospa imapas ruwasqankunamantaqa ñuqanchikpa ruwasqanchikqa manam imapaschu. Chaywanpas kuyawasqanchikraykum imapipas yanapakunanchikta saqiwanchik”, nispa. Ñuqanchikpas imapas munasqanchikpi yanapakunapaq mana niwaptinchik piñasqa kaspaqa humilde kanapaqyá tukuyta ruwasun. Chayna kaptinchikqa Diosmi kuyawasun, hinaspapas kusisqam kasun (Sant. 4:​6, 8).

DIOSPA PROMETEWASQANCHIKPIYÁ PIENSASUN

12. ¿Diospa ima prometewasqanchikkunam yanapawanchik imayna kawsakusqanchikwan kusisqa kanapaq? (Rimarimuytaq Isaias 65:​21-25 nisqanmantapas).

¹² Hamuq tiempopaq Diospa prometewasqanchikpi yuyaymanaymi yanapawasun imayna kawsakusqanchikwan kusisqa kanapaq. Jehova Diosqa yachanmi kay tukupay punchawkunapi kawsakuy sasa kasqanta. Chaymi Isaias libropi niwanchik tukuy mana allinkunata tukuchinanmanta (leey Isaias 65:​21-25). Hamuq tiempopiqa sumaq wasiyuqmi kasunchik, kusisqam llamkasunpas, tarpukusqanchikkunapas mana hampillawanñam achka-achka qispinqa. Manañataqmi manchakusunchu churi-wawanchikkunata imapas pasarunanmantaqa. Llapanchikmi hawkaña kawsakusun (Is. 32:​17, 18; Ezeq. 34:25). Jehova Diospa chay niwasqanchikkunaqa cumplikunqapunim.

13. ¿Imanasqataq astawanraq piensananchik Diospa prometewasqanchikkunapi?

¹³ ¿Imanasqataq kunan astawanraq piensananchik Diospa prometewasqanchikkunapi? ‘Tukupay punchawkunapi’ kawsaspa tukuy ima sasachakuyniyuq kasqanchikraykum (2 Tim. 3:1). Ichaqa Diosmi sasachakuykunata sapa punchaw aguantanapaq yanapawanchik yachaytawan kallpata quwaspanchik (Sal. 145:14). Chaymantapas, llumpay llakisqa tarikuptinchikmi hamuq tiempopi kusisqa kawsakunapaq niwasqanchik sunqunchikta tiyaykachin. Ichapas wakiqninchikqa mikunallanchikpaq, pachallanchikpaq utaq maypipas yachanallanchikpaq anchata llamkanchik. Ichaqa manamá tukuy tiempochu chayna kawsasun. Diosmi prometewanchik kay allpa pachanchik sumaq huerta kaptin tukuy imayuq kanapaq (Sal. 9:18; 72:​12-14). Yaqapaschá imanchik nanawasqanchikwanpas, mana hampiy atina unquywanpas utaq imawanpas ñakarichkanchik. Ichaqa Jehova Diosmi niwanchik hamuq tiempopiqa unquypas chaynataq wañuypas manaña kananmanta (Apoc. 21:​3, 4). Chaykunapi yuyaymanaymi yanapawasun imayna kawsakusqanchikwan mana piñakurunanchikpaq utaq mana hukmanyarunanchikpaq. Chaynaqa, unquspanchikpas, familianchik wañukuptinpas utaq ima sasachakuyña pasawaptinchikpas kusisqa kawsakuytaqa atichwanmi. Yachanchikmi ñakariykunaqa tukuruqlla kasqanta hinaspa wiñaypaq chinkananta (2 Cor. 4:​17, 18).

14. ¿Imatam ruwachwan Diospa prometewasqanchikkunamanta mana iskayrayanapaq?

¹⁴ ¿Imatam ruwachwan Diospa prometewasqanchikkunamanta mana iskayrayanapaq? Sapa kutim chaykunapi yuyaymanananchik. Imaynam achkipas tuta riptinchik yanapawanchik mana iskayrayaspa rinapaq, chaynam Diospa prometewasqanchikkunapi yuyaymanaypas yanapawanchik mana iskayrayaspa hinalla suyanapaq. Qullqinchik mana haypawaptinchik preocupasqa kaspaqa piensachwanmi hamuq tiempopiqa manaña qullqita necesitananchikpi hinaspa manaña wakcha kananchikpi. Munasqanchik kaqpi yanapakunapaq mana niwasqanchikrayku hukmanyasqa utaq piñasqa kaspaqa piensachwanmi hamuq tiempopi manaña pantaq kaspa hinaspa waranqantin wata Diosta servispa chaykunamanta manaña preocupakunanchikpi (1 Tim. 6:19). Ichapas sasachakuykunapi kaspaqa Diospa prometewasqanchikkunapi piensayta qunqaruchwan, ichaqa chaypi astawan yuyaymanaspaqa manam sasachakuyllanchikpiqa piensasunchu.

15. ¿Imatam yachachwan Cristinapa willakusqanmanta?

¹⁵ 11 parrafopi rimamusqanchik Dennispa warmin Cristinam willakun: “Unquyniyraykum manaña kallpayuq tarikuni. Mana puriyta atisqayraykum silla ruedallapi kani, hinaspapas sapa punchaw nanaywan kaspaymi camallapi kani. Doctorpas niwan manaña allinyanaytam. Hinaptinmi kamas piensarqani: ‘Manamá doctorqa ñuqa hinachu hamuq tiempomantaqa piensan’, nispay. Diospa prometewasqanchikpi piensaspaymi hawka tarikuni. Kunanqa tukuy kaykunatam hinalla aguantanay. Hamuq tiempopim ichaqa manaña unquspa kusisqaña kawsakusaq”, nispa.

‘DIOSTA MANCHAKUQKUNAPAQQA MANAM IMANKUPAS PISIPUNQACHU’

16. ¿Imatam David nirqa Jehova Diosmanta, imanasqa?

¹⁶ Imayna kawsakusqanchikwan kusisqa kaptinchikpas qunqayllamantam imapas pasaruwanchikman. Rimarisun Davidmanta. Paypaqa kimsa churinkunam wañukurqa. Chaymantapas yanqamantam tumpaykurqaku, traicionarurqakum, hinaspapas unay watam maskarqaku wañuchinankupaq. Tukuy chaykunawanpas kusisqam karqa. Chaymi Jehova Diosmanta rimaspan nirqa: “Payta manchakuqkunapaqqa manam imankupas pisipunqachu”, nispa (Sal. 34:​9, 10). ¿Imanasqataq chaynata nirqa? Davidqa yacharqam sasachakuykunamanta mana harkawaspanchikpas Diosqa imapas necesitasqanchikta quwasqanchikta (Sal. 145:16). Ñuqanchikpas David hinam imaña kaptinpas Dios yanapawananchikmanta mana iskayrayaspanchik kusisqa kanchik.

17. ¿Imayna kananchiktam Dios munan? ¿Imaynam chaypaq kananchik?

¹⁷ Jehova Diosqa munan imaña kaptinpas kawsakusqanchikwan kusisqa kananchiktam (Sal. 131:​1, 2). Kay yachachikuypim yacharunchik kusisqa kanapaq agradecekuq kanamanta, humilde kanamanta hinaspa Diospa prometewasqanchikkunapi yuyaymananamanta, chaypaq hinalla kallpanchakuspaqa Pablopa nisqanman hinam imapas kapuwasqallanchikwan kusisqa kawsakusun (Filip. 4:11).