Diosmi yanapawanchik imatapas aguantanapaq

1. ¿Ima sasachakuykunatam kunan aguantananchik? ¿Pim chaypaqqa yanapawasun? (Rimarimuytaq 1 Pedro 5:10 nisqanmantapas).

SASA tiempokunapi kawsasqanchikrayku ichapas ima unquywanpas kachkanchik, familianchik wañukun, utaq familianchikkuna hinaspa gobiernokuna Diosta servinanchikta harkakunku (Mat. 10:​18, 36, 37). Ichaqa ima sasachakuyña kaptinpas Jehova Diosqa hinalla aguantanapaqmi yanapawasun (leey 1 Pedro 5:10).

2. ¿Imaynatam Jehova Dios yanapawanchik aguantanapaq?

² Aguantayqa imaña kaptinpas hinalla Diosman sunqu kaymi hinaspa kusisqa serviymi. Aguantanapaqqa manataqmi iskayrayananchikchu tukuy imapas allinyananmantaqa. Ichaqa manam aguantanchikqa kikinchikpa kallpallanchikwanchu, aswanqa Jehova Dios yanapawaptinchikmi. Paymi ‘runakunapa mana haypay atisqan atiyninwan’ yanapawanchik (2 Cor. 4:7). Chaymi kay yachachikuypi yachasun aguantanapaq imakunawan yanapawasqanchikmanta hinaspa ñuqanchik imata ruwanamanta.

MAÑAKUYWANMI YANAPAWANCHIK

3. ¿Imanasqataq Dioswan rimay atisqanchikqa ancha admirakuypaq?

³ Jehova Diosta mañakuspaqa ima sasachakuytapas aguantasunmi. Pantaq kaptinchikpas Diosqa munan paywan rimananchiktam (Heb. 4:16). Paywanqa rimaytam atichwan imay horapas, imamantapas, ima idiomapipas, carcelpiña utaq maypiña kaspapas (Jon. 2:​1, 2; Hech. 16:​25, 26). Mañakuspanchik mana ima niyta atiptinchikpas payqa entiendewanchikmi (Rom. 8:​26, 27). Chaynaqa, Dioswan rimayta atisqanchikqa ancha admirakuypaqmi.

4. ¿Allinchu aguantanapaq Diosta mañakuy? ¿Imanasqa?

⁴ Bibliapim niwanchik ‘Diospa munasqanman hina mañakuptinchik uyariwasqanchikmanta’ (1 Juan 5:14). Chaynaqa, ¿allinchu aguantanapaq Diosta mañakuy? Arí, chayqa Diospa munasqanman hinam. Sasachakuykunata aguantaspa Diosman sunqu kaptinchikqa insultaqnin satanastam upallachinqa (Prov. 27:11). Chaymantapas Diosqa ‘tukuy sunqunwan yupaychaqninkunata yanapaykuytam’ munan (2 Cron. 16:9). Chaynaqa, manam iskayrayachwanchu aguantanapaq yanapayta munawasqanchikmantaqa hinaspa yanapawananchikpaq atiyniyuq kasqanmantaqa (Is. 30:18; 41:10; Luc. 11:13).

5. ¿Imaynatam Diosta mañakuy yanapawanchik hawkalla kanapaq? (Rimarimuytaq Isaias 26:3 nisqanmantapas).

⁵ Bibliapim niwanchik llakichiwaqninchikkunamanta Diosman willakunapaq. Chaynapim ‘Diospa hawkayaynin sunqunchiktawan yuyayninchikta mana allinkunamanta harkanqa, chay hawkayayqa runapa mana entiendey atinanmi’ (Filip. 4:7). Diosta mana serviqkunaqa tukuytam ruwanku sasachakuyninkuta qunqaspanku hawka kanankupaq. Wakinkum yuyayninkumanta lliw piensasqankuta hurqunku, chaynapi sasachakuyninkupi mana piensanankupaq. Ichaqa manamá chayqa allinchu. Chayta ruwaptinchikqa demoniokuna munaychakuruwaspanchikmi mana allinkunata piensachiwachwan (tupachiy Mateo 12:​43-45 nisqanwan). Chayta ruwananchikmantaqa Jehova Diostam mañakunanchik hawkayaykachiwananchikpaq. Tukuy sunqunchikwan paypi hapipakusqanchikraykum yuyayninchiktawan sunqunchikta waqaychanqa ‘hawkallata kawsachiwaspanchik’ (leey Isaias 26:3). Chaypaqmi yuyarichiwasun kuyawasqanchikmanta hinaspa yanapay munawasqanchikmanta rimaq textokunata. ¡Chayna yanapawasqanchikmantaqa anchatamá kusikunchik! (Sal. 62:​1, 2).

6. ¿Imatam Diosta mañakuspa ruwananchik yanapawananchikpaq? (Qawaytaq fototapas).

⁶ ¿Imatam ruwananchik? Ima sasachakuypipas kaspaqa Jehova Diosmanyá willakusun imayna tarikusqanchikta. Nisuntaqyá hawka kanapaq yanapawananchikpaqpas chaynataq imata ruwanapaq yachayta quwananchikpaqpas (Sal. 55:22; Prov. 2:​10, 11). Amataqyá qunqasunchu agradecekuytapas (Filip. 4:6). Kunankama imayna yanapawasqanchikpiyá yuyaymanasun, hinaspayá agradecekusun ñuqanchikpaq tukuy ima ruwasqanmanta. Sasachakuyllanchikpi umayuq kanamantaqa yuyarisunyá kunankama imayna yanapawasqanchikta (Sal. 16:​5, 6).

BIBLIAWANMI YANAPAWANCHIK

7. ¿Imakunatam bibliapi tarinchik?

⁷ Jehova Diosqa palabrantam quwanchik imatapas aguantanapaq. Chaypim tarinchik mana haykapipas saqiwananchikmanta rimaq achka textokunata. Hukninmi Mateo 6:​8, chaypim nin: “Taytaykichikqa manaraqpas mañakuchkaptikichikmi yachanña imam pisipususqaykichikta”, nispa. ¿Pitaq chayta nirqa? Jehova Diosta allinta riqsiq Jesusmi. Chaynaqa, manam iskayrayachwanchu imapas necesitasqanchikta Dios yachasqanmantaqa hinaspa yanapaykuwananchikmantaqa. Bibliapiqa tarinchiktaqmi Diospa sumaq promesankunatapas. Chaykunam sunqunchikta tiyaykachispa hinalla aguantanapaq yanapawanchik (Sal. 94:19).

8. (1) ¿Imaynatam Mateo 6:34 nisqan yanapawanchik? (2) ¿Imatam ruwananchik ima sasachakuypas kaptin Diospa consejonta kamas yuyarinapaq?

⁸ Bibliapi sumaq consejokunapas yanapawanchiktaqmi hinalla aguantanapaqqa. Chay consejokunata kasukuspaqa yachayniyuqmi kasun imapaqpas allinta tantiakunapaq (Prov. 2:​6, 7). Mateo 6:34 nisqanpim willawanchik hamuq punchawkuna imayna kananmanta preocupakunamantaqa sapa punchaw imapas kaptin Jehova Diospi hapipakunapaq. Chaynaqa, bibliata sapa punchaw leespayá niwasqanchikpi yuyaymanasun. Chayta ruwaspaqa ima sasachakuypas kaptinmi kamas yuyarisun imata ruwanapaq Diospa consejonta.

9. ¿Imanasqam yuyaymanananchik ñawpaq tiempopi serviqninkunata Dios imayna yanapasqanpi?

⁹ Bibliapiqa tarinchiktaqmi sasachakuypi tarikuq Diosta serviqkuna paypi hapipakusqankurayku yanapasqa kasqankumantapas (Heb. 11:​32-34; Sant. 5:17). Paykunata Dios imayna yanapasqanpi yuyaymanaspanchikqa manam iskayrayasunchu ‘pakaykuwaqninchik hinaspa kallpanchawaqninchik kasqanmantaqa. Payqa sasachakuypipas chaylla yanapaykuwaqninchikmi’ (Sal. 46:1). Ñawpaq tiempopi Diosta serviqkuna paypi hapipakuspanku aguantasqankuqa paykunata qatipakunapaqmi kallpanchawanchik (Sant. 5:​10, 11).

10. ¿Imatam ruwananchik biblia yanapawananchikpaq?

¹⁰ ¿Imatam ruwananchik? Sapa punchaw bibliata leespayá anotasun yanapawaqninchik textokunata. Achkam sapa punchaw yuyaymananapaq textota tempranollan leenku, chaynapi leesqankuta yuyarispa chay punchaw kallpanchasqa kanankupaq. Chaytam ruwarqa Mariapasa tayta-maman cancerwan kasqankuta doctorkuna niykuptin. Paymi nin: “Sapa punchawpaq textota leespaymi yuyaymanaq kani. Chaymi yanapawarqa sasachakuyllapi umayuq kanaymantaqa Jehova Diospi hinaspa palabranpi sumaq yachachikuykunapi astawan piensanaypaq”, nispa (Sal. 61:2). Mariaqa wañukunankukamam tayta-mamanta atienderqa.

IÑIQMASINCHIKKUNAWANMI YANAPAWANCHIK

11. ¿Imamantam cuentata qukunchik iñiqmasinchikkunapa ñakarisqankuta yachaspa?

¹¹ Jehova Diosta servisqanchikraykum enteron allpa pachapi iñiqmasinchikkunawanpas ayllu hina kanchik. Yachanchikmi paykunapas ñuqanchik hina ñakarisqankuta (1 Ped. 5:9). Tukuy ima sasachakuykunata aguantasqankuta yachaspanchikmi cuentata qukunchik ñuqanchikpas sasachakuyninchikkunata aguantay atinanchikta (Hech. 14:22).

12. ¿Imaynatam iñiqmasinchikkunawan yanapanakuchwan? (Rimarimuytaq 2 Corintios 1:​3, 4 nisqanmantapas).

¹² Iñiqmasinchikkunam kallpanchaykuwachwan rimasqankuwan utaq imapas ruwasqankuwan. Chaynatam apostol Pablotapas kallpanchaykurqaku wasinpi presochasqa kaptin. Chaymi cartakunata qillqaspanpas sapakamapa sutinkuta churaspan agradecekurqa kallpanchaykusqankumanta hinaspa yanapaykusqankumanta (Filip. 2:​25, 29, 30; Col. 4:​10, 11). Kunanpas iñiqmasinchikkunaqa listom kachkanku imapas kaptin yanapawananchikpaq. Chaytam ñuqanchikpas ruwachwan yanapanata necesitaptinku (leey 2 Corintios 1:​3, 4).

13. ¿Pikunam Mayata yanaparqaku aguantananpaq?

¹³ 2020 watapim Rusia nacionpi yachaq Mayapa wasinta guardiakuna yaykuruspanku tukuy imanta maskachakururqaku. Chaymantam nirqaku Diosmanta willakusqanrayku cortepi juzgasqa kananmanta. Mayam willakun: “Huk punchawmi mana kallpayuq hina tarikurqani, hinaptinmi iñiqmasinchikkuna qayamuwarqa, qillqamuwarqa hinaspa niwarqa anchata kuyawasqankuta. Yacharqanim iñiqmasinchikkunaqa kuyakuq hinaspa aylluy hina kasqankuta. Ichaqa 2020 watamantam chayqa cierto kasqanta astawanraq cuentata qukurqani”, nispa.

14. ¿Imatam ruwananchik iñiqmasinchikkuna yanapawananchikpaq? (Qawaytaq fototapas).

¹⁴ ¿Imatam ruwananchik? Ima sasachakuypipas kaspaqa amayá iñiqmasinchikkunamantaqa karunchakusunchu. Punta apaqkunatapas yanapawananchikpaqyá nisun. Paykunaqa kanku ‘llumpa-llumpay wayramanta pakakuna hinam’ hinaspa ‘llumpa-llumpay paramanta llantukuna hinam’ (Is. 32:2). Yuyarinanchiktaqmi iñiqmasinchikkunapas tukuy imawan sasachakusqankuta. Sasachakuypi tarikuqkunata yanapaspanchikqa kusisqam kasun, hinaspapas sasachakuyninchikkunawan mana llumpayta hukmanyaspam hinalla aguantasun (Hech. 20:35).

PROMETEWASQANCHIKWANMI YANAPAWANCHIK

15. ¿Imaynatam Jesusta yanaparqa Diospa prometesqankuna? ¿Imaynatam ñuqanchiktapas yanapawanchik? (Rimarimuytaq Hebreos 12:2 nisqanmantapas).

¹⁵ Diospa prometewasqanchikkuna cumplikunanmanta mana iskayrayaspanchikmi imatapas aguantasun (Rom. 15:13). Chaymi Jesustapas yanaparqa wañukunan punchawkama Diosta kasukunanpaq (leey Hebreos 12:2). Payqa yacharqam kasukuq kaspanqa Diospa sutin hatunchasqa kananpaq yanapakusqanta. Anchatataqmi munarqa hanaq pachaman kutikuspan taytanwan tupaykuytapas, chaynataq akllasqa kaqkunawan kamachimuytapas. Pay hinam ñuqanchikpas yachanchik Diosña kamachimuptin wiñaypaq kawsakunanchikta. Chaymi yanapawanchik kay tiempopi ima sasachakuytapas hinalla aguantanapaq.

16. ¿Imaynatam Diospa prometewasqanchik Anata yanaparqa? ¿Imatam nisqanmanta yachawaq?

¹⁶ Diospa prometewasqanchikpi yuyaymanasqanmi Rusia nacionpi Anatapas yanaparqa. Paypa qusantam carcelman aparurqaku contranpi juicio tukunankama. Anam willakun: “Mana hukmanyarunaypaqmi yanapawarqa Diosta mañakusqay hinaspa hamuq tiempopaq Diospa prometewasqanchikpi yuyaymanasqay. Ñamá kay sasachakuykunaqa tukurunqaña. Lliwmá yachanqaku Jehova Diosqa enemigonkunamanta aswan atiyniyuq kasqanta. Chaykamaqa yanapawasunmi”, nispa.

17. ¿Imatam ruwananchik Diospa prometewasqanchikkunawan kusisqa kaspaqa? (Qawaytaq fototapas).

¹⁷ ¿Imatam ruwananchik? Diospa prometewasqanchikkunapi yuyaymananapaqyá tiempochakusun. Kay allpa pachanchik sumaq huerta kaptin kusisqa kawsakunanchikpiyá piensasun. Hinaptinqa kay tiempopi sasachakuykunaqa “mana kaqpaq hinallam” rikchakuwasun (2 Cor. 4:17). Tukuytataqyá ruwasun Diospa prometewasqanchikkunamanta runamasinchikkunaman willanapaqpas. Chaymantaqa achkam mana yachankuchu. Chayraykuchá satanaspa munaychakusqan kay allpapi kawsakuyqa paykunapaqqa aswan sasa. Ichapas willasqanchikwan astawan yachayta munanmanku Diospa prometewasqanchikkunamanta.

18. ¿Imanasqam yachanchik Diospa prometesqankuna cumplikunanta?

¹⁸ Tukuy ima sasachakuykunata aguantaruspanmi Jehova Diosta Job nirqa: “Kunanmi yacharuni tukuy ima ruway atisqaykita, qampaqqa ima ruwaypas manam sasachu”, nispan (Job 42:2). Jobmi entienderurqa Diospa prometesqankuna cumplikunanta mana imapas harkay atinanta. Chayta yachaymi ñuqanchiktapas yanapawanchik hinalla aguantanapaq. Piensarisun unayña unquq warmipi. Payqa llumpay hukmanyasqam tarikun achka doctorkunaman rispanpas mana allinyaspan. Ichaqa huk punchawmi experienciayuq doctor niykun imawan allinyananmanta. Doctorpa chayna nisqanwanmi kusisqa tarikun allimanta allinyanan kaptinpas. Ñuqanchiktapas Diospa prometewasqanchik sumaq huerta kayllapiña kasqanta yachasqanchikmi kusichiwanchik hinaspa yanapawanchik hinalla aguantanapaq.

19. ¿Imakunawanmi Jehova Diosqa yanapawanchik hinalla aguantanapaq?

¹⁹ Yachamusqanchikman hinam Jehova Diosqa hinalla aguantanapaq yanapawanchik payta mañakuywan, bibliawan, iñiqmasinchikkunawan hinaspa prometewasqanchikkunawan. Tukuy chaykunawan yanapachikuptinchikqa Diosmi ima sasachakuyña kaptinpas yanapawasun satanaspa munaychakusqan chinkachisqa kanan tiempo chayamunankama (Filip. 4:13).