Yuyaqña kaspapas kusisqa kaytaqa atichwanmi

1, 2. ¿Ima nintaq Jehova Dios yuyaqyaq iñiqmasinchikkunamanta? (Rimarimuytaq Salmos 92:​12-14 nisqanmantapas, qawaytaq fototapas).

YAQA LLAPALLANCHIKMI mana munanchikchu yuyaqyaytaqa, chaymi wakinkuqa suqunku wiñayta qallaykamuptinqa kamas chutanku. Ichaqa manam chayraykuchu suqunkuqa mana wiñamunqa. Arí, manamá imawanpas harkayta atichwanchu yuyaqyaytaqa.

² ¿Ima nintaq Jehova Dios yuyaqyaq iñiqmasinchikkunamanta? (Prov. 16:31). Payqa tupachin suma-sumaqta waytariq sachakunawanmi (leey Salmos 92:​12-14). ¿Imanasqa? Llaqisapallaña hinaspa suma-sumaqllaña waytayuq sachakunaqa yaqa llapanpim unay watata kawsan. Chayna suma-sumaqta waytaq cerezo sutiyuq sacham wiñan Japon nacionpi. Unayta kawsaq sachakuna hinam yuyaq iñiqmasinchikkunapas Jehova Diospaqqa suma-sumaq kanku. Suqu umaña kaptinkupas payqa sumaq sunquyuq kasqankutam astawanqa qawan. Paykunaqa allin tiempopipas chaynataq mana allin tiempopipas unayñam Diosta servichkanku.

3. ¿Imaynatam yuyaq serviqninkunata Jehova Dios valekurqa munayninta ruwanankupaq?

³ Jehova Diosqa manam piensanchu yuyaqkuna munayninta manaña ruwayta atisqankutaqa.a Aswanqa achka kutipim yuyaq serviqninkunata valekurqa munayninta ruwanankupaq. Sara yuyaqña kachkaptinmi Jehova Dios nirqa wawayuq kananpaq. Nirqataqmi chay mirayninmanta hatun nacion chaynataq Diospa akllasqan runa rikurinanmantapas (Gen. 17:​15-19). Moisespas yuyaqñam karqa Israel runakunata Egiptomanta hurqunanpaq Jehova Dios niptinqa (Ex. 7:​6, 7). Apostol Juanpas yuyaqña kachkaspanmi bibliapi pichqa librokunata Diospa yanapakuyninwan qillqarqa.

4. Proverbios 15:15 nisqanman hinaqa, ¿imayna kanankupaqmi yuyaq iñiqmasinchikkunata Jehova Dios yanapanman? (Qawaytaq fototapas).

⁴ Yuyaqyasqanchikman hinam aswan sasachakuykunapi kanchik, chaymi huk iñiqmasinchik nirqa: “¡Yuyaqyayqa sasamá kasqa!”, nispan. Chaywanpas Jehova Diosmi yanapanman sasachakuykuna kaptinpas kusisqalla kanankupaqb (leey Proverbios 15:15). Kay yachachikuypim yachasun hinalla kusisqa kanankupaq imata ruwanankumanta. Yachasuntaqmi ñuqanchikpas paykunata imayna yanapanamanta. Ichaqa puntataraqyá yachaykusun yuyaqkunapaq kusisqa kay imanasqa sasa kasqanmanta.

¿IMANASQAM KUSISQALLA KAYQA SASA?

5. ¿Imakunaraykutaq achka yuyaqkuna llakisqa tarikunku?

⁵ Achka yuyaqkunam musu-sipas hinaspa sano kaspankuraq tukuy ima ruwasqankuta yuyarinku. Kunanmi ichaqa llakisqa tarikunku ñawpaqta hina manaña imatapas ruwayta atisqankurayku (Ecl. 7:10). Iñiqmasinchik Rubiymi nin: “Enteron cuerpoy nanasqanraykum sasata pachakunipas. Mediasniyta hinakunaypaqpas sasa-sasatam chakiyta huqarini. Maki dedoykuna qipichakuruspan llumpayta nanawaptinmi imachallatapas sasata ruwani”, nispa. Ñawpaqta betelpi llamkaq Jarolpas kaynatam nin: “Musu kaptiyqa beisbolpi pukllaymi anchata gustawaq. Chaymi pukllaptiyku ninakuqku ‘¡Jarolman pelotata pasay, payqa manam pantanqachu!’ nispanku. Kunanqa manañachá pelota chuqayllatapas atiymanñachu. Chayna gustasqaykunata manaña ruwayta atisqayraykum wakinpiqa kikiypaq rabiani”, nispan.

6. (1) ¿Imakunawanraqtaq llakisqa tarikuchwan? (2) ¿Imakunapim yuyaymananmanku carrota manejayta hinalla munaq yuyaq iñiqmasinchikkuna? (Qaway kay revistapi “¿Hinallaraqchu manejanay?” niqta).

⁶ Llakisqataqmi tarikuchwan hukpa yanapasqallanña imatapas ruwaspa. Ichapas hukpa cuidasqallanña kachkanchik utaq mayqin warmanchikwanpas yachananchik kanqa. Utaqchá manaña allinta rikukusqanchikrayku hinaspa unqusqanchikrayku carrota, motota utaq bicicletata manaña manejayta atinchikchu, manañataqchá sapallanchikqa maytapas riyta atinchikñachu. Tukuy chaykunawan mana llumpayta hukmanyarunanchikpaqmi ichaqa Jehova Diospaq hinaspa hukkunapaq ancha valorniyuq kasqanchikta yuyarinanchik. Chaymantapas yachanchikmi imayna sientekusqanchikta Jehova Dios allinta entiendesqanta. Diosqa astawanqa qawamuchkan payta hinaspa iñiqmasinchikkunata anchata kuyasqanchiktawan valorasqanchiktam (1 Sam. 16:7).

7. ¿Imatam yuyarinanchik tukuy mana allinkunata Diospa chinkachinan punchawkama manaña kawsananchikta piensaspaqa?

⁷ Wakinpiñataqmi piensachwan tukuy mana allinkunata Diospa chinkachinan punchawkama manaña kawsananchikta. Chaywan llakisqa kaspaqa yuyarinanchikmi Jehova Diosqa tukuy mana allinkunata chinkachinanpaq pacienciawan suyasqanta (Is. 30:18). ¿Imanasqataq pacienciawan suyachkan? Millonnintin runamasinchikkuna payta riqsispanku servinankuta munaspanmi (2 Ped. 3:9). Chaynaqa yuyarisunyá runamasinchikkunapas utaq familianchikkunapas Dios pacienciakusqanrayku salvakuy atinankuta. Chaykunata yuyarispaqa manam hukmanyasunchu.

8. ¿Imaynam yuyaqkuna kachwan unqusqanchikrayku utaq hukmanyasqa kasqanchikrayku?

⁸ Musu-sipas utaq yuyaq kaspanchikpas llapallanchikmi hukmanyasqa tarikuspanchikqa rimaruspanchikña utaq ruwaruspanchikña pesakuchwan (Ecl. 7:7; Sant. 3:2). Chaynam pasarqa Diosman sunqu Jobta. Llumpay sasachakuypi tarikuspanmi ‘mana yuyayniyuq runa hina rimarurqa’ (Job 6:​1-3). Wakinpiqa unqusqanchikraykum utaq ima medicinatapas tomasqanchikraykum mana allinta piensaspa rimaruchwan utaq ruwaruchwan. Ichaqa manam yuyaq kasqanchikraykuchu utaq unqusqanchikraykuchu hukkunata sientichinapaq hina rimananchik utaq munasqanchikta ruwanankupaq pitapas hikutananchik. Imapas nisqanchikwan pitapas sientirachispaqa chayllam ninanchik pampachaykuwananchikpaq (Mat. 5:​23, 24).

¿IMAKUNATAM RUWACHWAN HINALLA KUSISQA KANAPAQ?

9. ¿Imanasqam hukkunawan yanapaykachikunanchik? (Qawaytaq fotokunatapas).

⁹ Hukkunawanyá yanapaykachikusun (Gal. 6:2). Wakinpiqa manam munachwanchu hukkuna yanapaykuwananchiktaqa. Gretelmi nin: “Tukuy ima ruwayniyuq kasqankuta piensaspaymi wakinpiqa mana pitapas ninichu yanapaykuwananpaqqa. Tiempopa risqanman hinam ichaqa humilde kaspa riqsikurqani pipas yanapaykuwananta necesitasqayta”, nispan. Bibliapim nin hukkunata yanapaspa utaq imatapas quspa kusisqa kananchikmanta. Chaymi hukkuna yanapaykuwananchikpaq nispaqa kusisqa kanankupaq yanapachkanchik (Hech. 20:35). Ñuqanchikpas kusisqataqmi kasun anchata kuyawasqanchikmanta hinaspa preocupakusqankumanta yachaspa.

10. ¿Sunqullanchikpichu agradecekunanchik pipas yanapaykuwaptinchikqa? ¿Imanasqa? (Qawaytaq fotokunatapas).

¹⁰ Agradecekuqyá kasun (Col. 3:15; 1 Tes. 5:18). Hukkuna yanapaykuwaptinchikqa kusikunchikmi. Ichaqa, ¿imatapas ruwanchikchu agradecekusqanchikta yachanankupaq, icha sunqullanchikpichu agradecekunchik? Ancha allinmi kanman asirispanchik “gracias” niykuyninchik. Chaywanmi yachanqaku ruwasqankuta anchata valorasqanchikta. Betelpi yuyaq iñiqmasinchikkunata cuidaq Leam nin: “Huknin iñiqmasinchikmi agradecekuwasqanta papelchapi sapa kuti qillqan. Chaywanmi yachani anchata kuyawasqanta. Yanapasqaymanta agradecekuwasqanwanmi anchata kusikuni”, nispan.

11. ¿Imaynatam hukkunata yanapachwan? (Qawaytaq fotokunatapas).

¹¹ Hukkunatayá yanapasun. Hukkunata yanapaykunapaq tiempochakuspaqa manam sasachakuyllapi umayuqchu kasun. Yuyaq iñiqmasinchikkunatam tupachichwan anchata yanapawaqninchik librokunawan. Chay librokunata pipas mana kichaspanqa manam yachanmanchu ima nisqantaqa. Chaynaqa, musu-sipaskunata allinta yanapananchikpaqmi imapas yachasqanchikmantawan experiencianchikmanta willananchik. Imamantapas tapuspaqa sumaqtayá uyariykusun. Entiendechisunyá Jehova Diosta kasukuyqa imamantapas aswan allin kasqanta hinaspa kusisqa kanankupaq yanapasqanta. Chaynata ruwaspaqa sunqunkuta tiyaykachispam hinaspa kallpanchaspam kusisqa kasun (Sal. 71:18).

12. ¿Imatam yuyaq serviqninkunata Jehova Dios prometewanchik Isaias 46:4 nisqanpi? (Qawaytaq fotokunatapas).

¹² Jehova Diostayá mañakusun kallpata quwananchikpaq. Pisipasqa utaq hukmanyasqa tarikuspanchikqa yuyarinanchikmi Jehova Diosqa ‘mana haykapipas pisipasqanta hinaspa kallpanpas mana tukusqanta’ (Is. 40:28). Chayraykum payqa yuyaq serviqninkunataqa hinalla servinanchikpaq kallpanchaykuwachwan (Is. 40:​29-31). Arí, kikinmá prometewanchik yanapawananchikpaq (leey Isaias 46:4). Jehova Diosqa nisqankunataqa cumplinpunim (Jos. 23:14; Is. 55:​10, 11). Mañakusqanchikman hina yanapaykuwaptinchikmi anchata kuyawasqanchikta yachaspa kusisqa tarikusun.

13. 2 Corintios 4:​16-18 nisqanman hinaqa, ¿imatam mana qunqananchikchu? (Qawaytaq fototapas).

¹³ Amayá qunqasunchu kaqmanta sano hinaspa musu-sipas kananchikta. Ima sasachakuytapas aguantanchikmi mana unaypaq kananta utaq tukurunantaña yachaspanchikqa. Bibliapim niwanchik hamuq tiempopiqa yuyaqyaywan unquyqa manaña kananmanta (Job 33:25; Is. 33:24). ¡Chaymi anchata kusikunchik ñawpaqta musu-sipas kasqanchikmantapas hamuq tiempopiqa aswan sano, aswan kallpayuq hinaspa aswan sumaq rikchayniyuq kananchikmanta yachaspa! (Leey 2 Corintios 4:​16-18). Chaykamaqa hukkuna imaynata yanapawananchikmantayá qatiqninpi yachaykusun.

¿IMAYNATAM YUYAQKUNATA YANAPACHWAN?

14. ¿Imanasqataq ancha allin yuyaq iñiqmasinchikkunata watukuyninchik utaq qayayninchik?

¹⁴ Watukuchwanmi hinaspapas sapa kutim qayachwan (Heb. 13:16). Yuyaqkunaqa sapallan hinam tarikunku. Percimc nin: “Chisyay-chisyay wasillapi kaytaqa aminim. Wichqasqa animal hina kaspaymi aburrisqa hinaspa llumpay hukmanyasqa tarikuni”, nispan. Yuyaqkunata watukuptinchikmi yachanqaku anchata kuyasqanchikta hinaspa paykunamanta preocupakusqanchikta. Ichaqa tukuy ima ruwayniyuq kasqanchikraykum yuyaq iñiqmasinchikkunata watukuyta utaq qayaykuyta munachkaspapas qunqarunchik. Chaynaqa, ¿imam yanapawasun imakuna allin ruway kasqanta entiendespa yuyaq iñiqmasinchikkunata watukunapaq? (Filip. 1:10). Ancha allinmi kanman maymi huñunakusqanchikpi yuyaq iñiqmasinchikkunapa sutinta papelpi qillqaruyninchik. Qillqaruchwantaqmi ima punchaw mensajeta apachinapaq utaq qayananchikpaqpas. Ñawpaqmantaraqmi tantiachwan ima punchaw visitananchikpaq, chaynapi mana qunqarunanchikpaq.

15. Musu-sipaskunaqa, ¿imakunatam yuyaqkunawan kuska ruwayta atinmanku?

¹⁵ Musuraq utaq sipasraq kaspaykiqa ichapas mana yachankichu yuyaq iñiqmasinchikkunawan imamanta rimayta utaq paykunawan kuska imata ruwayta. Ichaqa, wakin amistadnikikunawan hinam paykunawanpas amistadta armawaq (Prov. 17:17). Paykunawanmi rimawaq huñunakuy manaraq qallaykuchkaptin utaq huñunakuy tukuyta. Tapuwaqtaqmi mayqin textokuna astawan gustasqanmantapas utaq warma kaspan asikunapaq hina imakunata ruwarusqanmantapas. Niwaqtaqmi sapa killa lluqsimuq JW Broadcasting^® programata kuska qawanaykichikpaqpas. Yanapawaqtaqmi celularninkupi utaq tabletninkupi huñunakuypaq lliw qillqanchikkuna kananpaqpas. Carolmi nin: “Yuyaqña kaptiypas hinallaraqmi gustawan rantipakuq utaq maytapas mikuq riy chaynataq Diospa unanchasqankunata qaway”, nispa. Mairam nin: “Huknin amistadniyqa 90 watanpiñam kachkan. Paypaqa ñuqaqa karu sullkanmi kani, ichaqa manam hayka watayuq kasqanpichu piensani. Paywanqa asi-asillam kaniku hinaspapas kuskaykum peliculakunata qawaniku. Chaymantapas iskayniykumantam consejanakuniku”, nispa.

16. ¿Imanasqataq yuyaq iñiqmasinchikkunata doctorman riysiyqa ancha allin?

¹⁶ Doctormanmi riysichwan. Hospitalta pusaspapas allintaqmi kanman doctor atiendenankama utaq imapas necesitasqanta qunankama compañayninchik (Is. 1:17). Anotachwantaqmi doctorpa ima nisqantapas. Rutmi nin: “Doctorman sapallay riptiyqa manam allintachu atiendewanku. Ichapas niwanmanku: ‘Allinllam kachkanki, yanqallam piensanki unqusqaykita’, nispa. Piwanpas riptiymi ichaqa allinta atiendewanku. Iñiqmasiykunatam anchata agradecekuni riysiwananpaq tiempochakusqankumanta”, nispa.

17. ¿Imaynatam yuyaq iñiqmasinchikkunawan Diosmanta willakuchwan?

¹⁷ Paykunawanmi Diosmanta willakuchwan. Yuyaq iñiqmasinchikkunaqa manañam atinkuchu wasin-wasin Diosmanta willakuytaqa. Paykunatam nichwan ñuqanchikwan kuska carretachawan willakunankupaq. Apachwantaqmi bancachatapas tiyanankupaq. Nichwantaqmi bibliamanta yachachiq riysiwananchikpaqpas. Utaqmi bibliamanta estudiachisqanchikta nichwan chay yuyaq iñiqmasinchikpa wasinpi yachachinapaq. Chaymantapas, punta apaqkunam tantianmanku Diosmanta willakuq lluqsinapaq huñunakuy yuyaqkunapa wasinpi kananpaq, chaynapi paykunapas lluqsinankupaq. Yuyaq iñiqmasinchikkunata yanapanapaq tukuy ima ruwasqanchikwanmi Jehova Diosqa anchata kusikunqa (Prov. 3:27; Rom. 12:10).

18. ¿Imamantam qatiqninpi yachasun?

¹⁸ Kay yachachikuypim yacharunchik Jehova Diospas chaynataq ñuqanchikpas yuyaqkunata kuyasqanchikmantawan valorasqanchikmanta. Yuyaqyay sasa kaptinpas Jehova Diospa yanapakuyninwanqa hinallam kusisqa kayta atichwan (Sal. 37:25). ¡Anchatamá kusikunchik ñawpaqta musu-sipas kasqanchikmantapas hamuq tiempopiqa aswan sano, aswan kallpayuq hinaspa aswan sumaq rikchayniyuq kananchikmanta yachaspa! Ichaqa, mana yuyaq kaspanchikpas wakiqninchikqa yuyaq familianchikta, unquq warmanchikta utaq amistadninchiktam cuidanchik. Chayna kaptinqa, ¿imam yanapawasun hinalla kusisqa kanapaq? Chaymantam qatiqninpi yachasun.