Kawsasqaykiwan qawachiy musuq pachapi kawsay munasqaykita

1, 2. (1) ¿Imakuna ruwaytam musuq pachapi munawaq? (Qaway kay paginapi kaq dibujota). (2) ¿Ima ruwaykunataq astawan kusikunapaq kanqa?

APOSTOL Pablom nirqa wiñay kawsayta chaskinapaq anchata kallpanchakunamanta (leey 1 Timoteo 6:12, 19). Yaqa llapallan Diospa serviqninkunapaqqa chay wiñay kawsayqa kay pachapim kanqa. Sichu qampas chay suyakuyniyuq kanki, hinaspaqa anchatachá munachkanki chaypiña kawsakuyta. Yuyaymanay sapa punchaw achikyamuptin kusisqa, mana unquqña hinaspa hawkaña tarikusqaykipi (Is. 35:5, 6). Yuyaymanaytaq aylluykikunawan hinaspa amistadnikikunawan kusisqa kasqaykipi chaynataq kawsarimuqkunawanpas (Juan 5:28, 29; Hech. 24:15). Kanqataqmi tiempo tukuy imatapas ruwanaykipaq. Chaypiqa atinkim sumaq wasikuna hatarichiyta, animalkunamanta, plantakunamanta yachayta hinaspa arpata, guitarrata utaq chaykunaman rikchakuq kaqkuna waqachiytapas.

² Kanqataqmi astawan kusichiwananchikpaq huk ruwaykunapas. ¿Imataq chaykunaqa? Lliw runakunam Jehova Diospa chuya sutinta yupaychaspanku kamachikuyninkunata kasukunqaku (Mat. 6:9, 10). Chaymantapas, Diospa munasqanman hinam mana pantaq runakuna kay allpa pachapiqa kawsanqaku. Pisi-pisimanta mana pantaqña kaptinchikqa, Jehova Dioswan amistadninchikmi astawan wiñanqa (Sal. 73:28; Sant. 4:8).

3. ¿Imatam kunanmanta ruwananchik?

³ Manam iskayrayanchikchu lliw nisqankunata Jehova Dios cumplinanmantaqa. ¿Imanasqa? Bibliam nin ‘Diospaqqa tukuy imapas atinallan’ kasqanta (Mat. 19:25, 26). Apostol Pablom nirqa wiñay kawsayta haypanapaq anchata kallpanchakunamanta. Chaymi kawsayninchikwan qawachinanchik Diospa piñakuynin punchawqa hichpallapiña kasqanta. Musuq pachapi kawsayta munaspaqa, kunanmantapacham chaypaq hina kawsananchik. ¿Imaynatam chayta ruwachwan?

IMAKUNATAM RUWANANCHIK

4. Pipas huk law nacionman astakuyta munaspanqa, ¿imakunatam ruwanan?

⁴ ¿Imakunatam kunanmantapacha ruwananchik musuq pachapi kawsanapaq? Kaypi piensariy: Pipas huk law nacionman astakuyta munaspanqa, ¿imakunatam ruwanan? Chay nacionpa rimayninta hinaspa imayna kawsasqankuta yachananpaqmi kallpanchakunan. Ichapas chay nacionpa mikuyninta mallinman. Ñuqanchikpas yaqa chaynatam ruwananchik, musuq pachapipas kachkachwan hinam kawsananchik. Qawasun imakunata ruwananchikmanta.

5, 6. ¿Imanasqam kunanmanta Jehova Diospa llaqtanta kasukunanchik?

⁵ Kunanqa satanaspa munaychakusqan pachapim kawsanchik. Chaymi achka runakuna Diosta mana kasukuspanku munasqallankuta ruwanku. Chayraykum runakunaqa llumpayta ñakarichkanku (Jer. 10:23). Ñuqanchikmi ichaqa yachanchik Jehova Diosqa kuyapayakuq kamachiq kasqanta. Chaymi tukuy kamachiwasqanchikta kasukunchik. Musuq pachapiqa aswan kusisqaraqmi kawsasunchik lliw runakuna Jehova Diosta kasukuptinku.

⁶ Musuq pachapi kawsayta munaspaqa, kunanmantapacham Jehova Diosta kasukunanchik llaqtantakama tukuy ima niwasqanchikta. ¿Imanasqa? Musuq pachapiqa kamachikuykunatam chaskisunchik kay allpa pachata sumaq huertaman imayna tikrananchikpaq hinaspa kawsarimuq runakunata Diosmanta yachachinanchikpaq. Achka llamkaymá kanqa. Chaymi tapukunanchik: “Imapas mana ruway munasqayta Diospa llaqtanpi kamachiwaptinkuqa, ¿tukuy sunquywanchu kasukusaq?”, nispa.

7, 8. (1) ¿Imanasqam kunanmanta kusisqa kasukunanchik Diospa llaqtanpi imapas kamachiwasqanchikta? (2) ¿Imatam wakin iñiqmasinchikkunata nirqaku? (3) ¿Imaynam musuq pachapi tarikusunchik?

⁷ Musuq pachapi kawsananchikpaqqa, Diospa llaqtanpi imapas kamachiwasqanchiktam kusisqa hinaspa tukuy sunquwan ruwananchik. Kunanmanta kasukuspaqa, manam sasachakusunchu musuq pachapi Diospa lliw kamachikuyninkuna kasukuytaqa (leey Hebreos 13:17). Yuyarisun Israel runakuna prometesqa allpaman chayaruptinku ima pasasqanta. Paykunaqa manam akllarqakuchu maypi yachanankutaqa. Sapakamam chaskirqaku maypi yachanankupaq allpata (Num. 26:52-56; Jos. 14:1, 2). Yaqapaschá musuq pachapipas mana akllasunchu maypi yachananchiktaqa. Chaymi Diospa llaqtanpi imapas kamachiwasqanchikta sunqumanta kasukuspaqa, kusisqa tarikusun maypi yachananchikpaq tupawaptinchikqa.

⁸ Ancha kusikunapaqmá kanqa Diospa kamachikuyninpi payta serviyqa. Chaymi Diospa llaqtanta tukuy sunquwan yanapanapaq kallpanchakunanchik. Yaqapaschá wakinpiqa niwasun huk lawpiña Diosta servinanchikpaq. Estados Unidos betel wasipim wakin iñiqmasinchikkunata nirqaku manaña betelpi llamkanankupaq. Llaqtan-llaqtan watukuq punta apaqkunamanta wakintapas nirqakum precursor especial kanankupaq. Kay iñiqmasinchikkunaqa Jehova Diospa yanapakuyninwanmi kusisqa payta servichkanku. Ñuqanchikpas paykuna hina kusisqa kayta munaspaqa Jehova Diospa yanapakuynintam mañakunanchik, tukuy sunqunchikwanmi servinanchik hinaspam imapas kamachiwasqanchikta kusisqa ruwananchik (leey Proverbios 10:22). Yaqapaschá tanteachkanchikña musuq pachapi may lawpi yachay munasqanchikta. Ichaqa Diospa llaqtanpi cuentallikuqkuna huk lawpi yachananchikpaq kamachiwaptinchikqa, ¿kusisqachu tarikusun maypi tupawasqanchikwan? Maypiña yachananchik utaq imapiña llamkananchik kaptinpas, kusisqa hinaspa agradecesqam tarikusun musuq pachapi kawsananchikpaq Jehova Dios saqiwasqanchikmanta (Neh. 8:10).

9, 10. (1) ¿Imanasqam musuq pachapipas pacienciakunanchik kanqa? (2) ¿Imaynatam kunan pacienciakuq kasqanchikta qawachichwan?

⁹ Musuq pachapipas wakinpiqa yaqapaschá pacienciakunanchik kanqa. Kaypi piensariy: Yaqapaschá qawasunchik wakinkupa ayllunku hinaspa amistadninku kawsarimuptin kusisqa kasqankuta. Ichapas ñuqanchikñataq suyananchikraq kanqa ayllunchikkuna kawsarimunanta. Chayna kaptinqa, ¿kusikusunchu wakin iñiqmasinchikkunapa kusikusqankumanta? (Rom. 12:15). Jehova Diospa nisqankuna cumplikunanta kunan pacienciawan suyaspanchikqa, hamuq punchawkunapipas pacienciakusunmi (Ecl. 7:8).

¹⁰ Pacienciakuq kasqanchiktaqa qawachichwantaqmi bibliapi wakin yachachikuykunata entiendesqanchik cambiaptin. ¿Sapa kutichu sumaqta qillqanchikkunata estudianchik? ¿Pacienciakunchikchu lliwta mana entiendespanchik? Pacienciakuq kasqanchikta kunanmanta qawachispanchikqa, manam sasachakusunchu musuq pachapi Jehova Diospa musuq kamachikuyninkuna kasukuytaqa (Prov. 4:18; Juan 16:12).

11. ¿Imanasqam kunanmanta pampachakuq kananchik?

¹¹ Musuq pachapi kawsanapaqqa runamasinchiktam pampachananchik. Waranqa wata Jesucristo kamachimuptinqa pisi-pisimantam mana pantaqña kasunchik, chaynallataqmi kawsarimuqkunapas kanqaku (Hech. 24:15). ¿Kuyakuywanchu pampachanchik hukkuna pantaptinku? Kunanmanta pampachayta yachaspanchikqa, musuq pachapiqa manam sasachakusunchu hukkunata pampachaytaqa (leey Colosenses 3:12-14).

12. ¿Imanasqam Jehova Diospa yachachiwasqanchikman hina kunan kawsananchik?

¹² Sumaq kayniyuqkuna kanapaq kunan tiempopi Jehova Diospa yachachiwasqanchikman hinam musuq pachapipas kananchik kanqa. ¿Imanasqa? Ichapas musuq pachapiqa, mana tukuy ima munasqanchikchu kanqa. Yaqapaschá suyananchik kanqa imapas munasqanchik kananpaq. Imayna kaptinpas kusisqa hinaspa agradecesqa kasqanchiktam haykapipas qawachinanchik. Chayna kaspanchikqa, musuq pachapi kawsay munasqanchikta hinaspa Diospa lliw kamachikuyninkuna kasukuy munasqanchiktam qawachichkanchik (Heb. 2:5; 11:1).

JEHOVA DIOSTA SERVINAPAQ KALLPANCHAKUSUN

13. ¿Imatam musuq pachapiqa imamantapas puntapi churasunchik?

¹³ Musuq pachapiqa kusisqa kawsananchikpaqmi tukuy ima kapuwasun. Ichaqa astawanraqmi kusichiwasun Jehova Diospa amistadnin kasqanchik (Mat. 5:3). Jehova Dios yupaychayninchikqa imamantapas puntapim ñuqanchikpaqqa kanqa chayta ruwasqanchikwanmi kusisqa kasunchik (Sal. 37:4). Chaymi, musuq pachapi kawsayta munaspanchikqa kunanmantapacha puntapi churananchik Jehova Dios serviyninchikta (leey Mateo 6:19-21).

14. ¿Diospa llaqtanpi imata ruwanankupaqmi mozo-sipaskuna tanteanmanku?

¹⁴ ¿Imaynatam aswan kusisqa Jehova Diosta servichwan? Diospa llaqtanpi astawan yanapakunapaq tanteaspam. Mozo-sipas kaspaykiqa, ichapas tanteawaq tukuy tiempoykiwan Diosta servinaykipaq. Qillqanchikkunapim tarinki chayta imayna ruwanamanta.a Rimawaqtaqmi achka watakunaña Diosta astawan servinankupaq kallpanchakuq iñiqmasinchikkunawan. Jehova Diosta tukuy tiempoykiwan servinaykipaq tanteasqaykiqa, musuq pachapi kawsanaykipaqmi yanapasunki.

15. ¿Imakunatawanraqmi ruwachwan Diosta astawan servinanchikpaq?

¹⁵ Llapanchikmi atichwan Diosta servinanchikpaq astawan kallpanchakuytaqa. ¿Atichwanchu Diosmanta aswan sumaqta willakuyta? ¿Atichwanchu bibliapa nisqankunata astawan yachaspa chayman hina kawsakuyta? ¿Atichwanchu huñunakuypi leenapaq, rimarinapaq hinaspa yachachinapaq astawan kallpanchakuyta? Kaykuna ruwaymi yanapawasunchik Diosta aswan kusisqa servinapaq hinaspa musuq pachapi kawsananchikpaqpas.

DIOSTA SERVISPAQA KUSISQAM KAWSASUN

16. ¿Imanasqam yachanchik Jehova Diosta servispalla kusisqa kawsananchikmanta?

¹⁶ Yaqapaschá pipas tapukunman: “Musuq pachapi kawsanaypaq kunanmanta kallpanchakuspayqa, ¿yaqachu tiempoyta usuchichkani?”, nispa. Ichaqa manamá chaynachu. Jehova Diosta servispaqa kusisqam kawsakusunchik. Paytaqa servinchik manam pipas hikutawaptillanchikchu utaq Diospa piñakuyninpi mana wañuyta munaspallanchikchu. Dioswan amistadninchikqa imamantapas aswan allinmi, chaymi kusichiwanchik. Chayna kanapaqmi Jehova Dios unanchawarqanchik. Kuyakuyninwan yachachikuyninkunam imamantapas aswan allinqa (leey Salmo 63:1-3). Jehova Diosta tukuy sunqunchikwan yupaychaspanchikqa kusisqam kasunchik. Chayna kasqantam ninku achka watakunaña Jehova Diosta serviq iñiqmasinchikkuna (Sal. 1:1-3; Is. 58:13, 14).

17. ¿Atisunchu musuq pachapi kusirikuyta hinaspa samariyta?

¹⁷ ¿Atisunchu musuq pachapi kusirikuyta hinaspa samariyta? Arí. Jehova Diosqa kusisqa kawsananchikpaqmi unanchawarqanchik. Payqa munasqanchiktam quwasun (Sal. 145:16; Ecl. 2:24). Chaynaqa, musuq pachapiqa atisunmi kusirikuyta hinaspa samariytapas. Ichaqa Jehova Dioswan amistadninchikta hinaspa payta serviyta imamantapas puntapi churaspanchikqa haykapipas kusisqam kasunchik. Chaymi Diosta servisqanchikrayku tukuy imakuna quwasqanchikpi yuyaymanananchik (Mat. 6:33).

18. ¿Imaynatam qawachinanchik musuq pachapi kawsakuy munasqanchikta?

¹⁸ Musuq pachapi kawsakuyqa piensasqanchikmantapas aswan sumaqraqmi kanqa. Chaymi kunanmanta qawachinanchik chaypi kawsakuy munasqanchikta. ¿Imaynata? Jehova Diospa yachachiwasqanchikman hina kawsakuspa hinaspa tukuy sunquwan Diosmanta willakuspam. Tukuy kallpanchikwanyá Jehova Diosta servisunchik. Manam iskayrayanchikchu lliw nisqankunata Jehova Dios musuq pachapi cumplinanmantaqa. Chaynaqa, chaypi kachkachwanpas hinayá kunanmanta kawsakusunchik.