Jehova Diosqa wiñay kawsaymanmi llaqtanta pusachkan

1, 2. (1) ¿Imanasqam achka runakuna mana wañurqakuchu? (Qaway qallariypi kaq dibujota). (2) ¿Imatam Jehova Diospas ruwan mana wañunanchik?

YAQA 100 wata ñawpaqmantaraqmi wakin nacionkunapi willakuyta churayta qallaykurqaku trenkunapa pasanan ñankunapi: “SAYAY, QAWAY, UYARIY”, niqta. Chayna willakuytaqa churaqku carrokuna chinpaspanku trenwan mana aparachikunankupaqmi. Chay willakuyraykum achka runakunaqa mana wañurqakuchu.

² Yaqa chaynatam Jehova Diospas ñuqanchikwan ruwan mana wañunanchikpaq. Quwanchikmi kamachikuykunata sasachakuykunapi mana tarikunanchikpaq, chaynapi wiñay kawsayman chayananchikpaq. Ovejankunata sumaqta michiq hinam Jehova Diosqa kuyakuywan serviqninkunata allin ñanninta pusawanchik (leey Isaias 30:20, 21).

DIOSQA SERVIQNINKUNATAM HAYKAPIPAS YANAPARQA

3. ¿Imaynanpim runakunaqa wañuyta qallaykurqanchik?

³ Jehova Diosqa qallariymantapacham serviqninkunamanqa kamachikuykunata qurqa. Eden huertapim Adanmanwan Evaman kamachikuykunata qurqa imata ruwaspanku wiñaypaq kusisqa kawsakunankupaq (Gen. 2:15-17). Paykunam ichaqa mana kasukurqakuchu. Diosta kasukunanmantaqa culebratam Evaqa kasurqa, Adanñataqmi Evata kasurqa. Chayraykum iskayninku ñakarirqaku hinaspa wañurqaku manaña suyakuyniyuq. Paykunapa mana kasukusqankuraykum lliw runakuna wañunchik.

4. (1) ¿Imanasqataq musuq kamachikuykunata sinchi para qipata Diosqa qurqa? (2) ¿Imatam yachachiwanchik chay musuq kamachikuyqa?

⁴ Chaymanta achka watakuna pasaytam, Jehova Diosqa Noeymanpas kamachikuykunata qurqa mana wañunanpaq. Sinchi para pasaytañataqmi Diosqa kamachirqa runakunaman mana yawarta mikunankupaq nitaq tomanankupaq. ¿Imanasqa? Chayraq chay tiempopi aychata mikunankupaq saqisqanraykum. Chaymi manaña ñawpaqpi hina kawsakusqankurayku Jehova Diosqa musuq kamachikuykunata qurqa. Diosmi kamachirqa: ‘Amam mikunkichikchu kawsachiqnin yawarniyuq aychataqa’, nispa (Gen. 9:1-4). Runapa ‘kawsayninqa’ yawarninpim tarikun. Kay kamachikuymi yanapawanchik Jehova Diosqa kawsayta ancha allinpaq qawasqanta entiendenapaq. Dios kawsayta quwasqanchikraykum niwanchik imam allin utaq mana allin kasqanta hinalla kawsananchikpaq. Chaymi runa wañuchiytaqa chiqnin. Diospaqa kawsaywan yawarqa ancha allinmi, chaymi pipas runa wañuchiqtaqa castiganqapuni (Gen. 9:5, 6).

5. (1) ¿Imamantam kay yachachikuypi yachasun? (2) ¿Imapaqmi kay yachachikuyqa yanapawasun?

⁵ Noeypa tiemponmanta qipatapas, Diosqa hinallam llaqtanmanqa kamachikuykunata qurqa. Kay yachachikuypim chaymanta yachasunchik. Chayqa yanapawasunmi kamachikuyninkunata kasukunapaq, chaynapi musuq pachaman chayanapaq.

JEHOVA DIOSMI MUSUQ KAMACHIYKUKUNATA ISRAEL LLAQTANMAN QURQA

6. (1) ¿Imanasqam musuq kamachikuykunata Diosqa Israel llaqtanman qurqa? (2) Israel runakuna bendecisqa kanankupaqqa, ¿imatam ruwananku karqa?

⁶ Moisespa tiemponpiñataqmi Jehova Diosqa kamachikuykunata qurqa Israel llaqtanman imaynata kawsakunankupaq hinaspa imaynata yupaychanankupaqpas. ¿Imanasqa? Manaña ñawpaqpi hina kawsasqankuraykum. Israel runakunaqa 200 wata masninmi Egipto nacionpi yacharqaku. Egipto runakunaqa taytacha-mamachakunata hinaspa wañuqkunatam yupaychaqku, chaymantapas huk rikchaq mana allinkunatapas ruwaqkum. Chaymi Israel runakunamanqa Egiptomanta lluqsiruptinku Diosqa musuq kamachikuykunata qurqa. Chayraykum Moisesnintakama Diospa qusqan kamachikuykunata kasukunanku karqa. Wakiqnin yachayniyuq runakunapaqqa hebreo rimaypi “kamachikuy” ninanqa “punta apaq”, “pusaq” utaq “yachachiq” ninanmi. Moisesman Diospa qusqan kamachikuykunaqa Israel runakunatam waqaycharqa huchapakuykunamanta hinaspa taytacha-mamachata wakin nacionkuna hina mana yupaychanankupaq. Israel runakuna Dios bendecinanta munaspankuqa paytam kasukunanku karqa. Mana kasukuspankum ichaqa anchata ñakarinanku karqa (leey Deuteronomio 28:1, 2, 15).

7. (1) ¿Ima kamachikuykunatam Israel llaqtaman Jehova Diosqa qusqa? (2) ¿Imanasqataq bibliaqa nin Moisespa chaskisqan kamachikuyqa Cristoman pusasqanta?

⁷ Israel runakunaqa huk musuq kamachikuykunatapas chaskirqakum. Moisespa chaskisqan kamachikuykunam Israel runakunata yanaparqa Jesucristo chayamuptin chaskinankupaq, chayqa Diospa ancha allin munayninmi karqa. Chay kamachikuykunaqa yuyarichirqataqmi pantaq runakuna kasqankuta hinaspa huchankumanta wiñaypaq pampachasqa kanankupaq pipas librananmanta entiendenankupaq (Gal. 3:19; Heb. 10:1-10). Chaymantapas, chay kamachikuykunaqa waqaycharqam Cristopa ñawpaq ayllunta hinaspapas yanaparqam Cristota riqsinankupaq. Chaymi bibliaqa nin Moisespa chaskisqan kamachikuykunaqa Cristoman ‘pusasqanta’ (Gal. 3:23, 24).

8. ¿Imaynatam Moisespa chaskisqan kamachikuykunawan yanapachikuchwan?

⁸ Ñuqanchikpas yanapachikuchwanmi Moisespa chaskisqan kamachikuykunawanqa. ¿Imaynata? Kay yachachikuypa qallariyninpi qawamusqanchikman hinam, sayachkaq hina hinaspa allinta qawachkaq hina chay kamachikuykuna imakuna yachachiwasqanchikmanta yachananchik. Chay qusqan kamachikuykunata kasukunapaq mana kamachisqa kachkaspanchikpas, yanapachikuchwanmi allinta kawsakunanchikpaq hinaspa Diosta yupaychananchikpaqpas. Chaymi Jehova Diosqa saqirqa bibliapi kananpaq. Jesusmi ichaqa Moisesman Diospa qusqan kamachikuykunamantapas aswan allin kaqkunata yachachiwarqanchik. Uyariy Jesuspa kayna nisqanta, nirqam: ‘Uyarirqankichikmi “amam hukwanqa pierdekunkichu” niqta. Ñuqam ichaqa nikichik: Pipas warmita munapayaspan qawaqqa sunqunpim hukwan pierdekuy huchata ruwarunña’, nispa. Moisesman Diospa qusqan kamachikuyqa pierdekuytam mana allinpaq qawarqa. Jesusmi ichaqa yachachirqa sunqunchikpi pierdekuy munay utaq mana allin piensamiento rikuriruptinqa hurqunamanta (Mat. 5:27, 28).

9. ¿Imanasqam Diosqa musuq kamachikuykunata llaqtanman qurqa?

⁹ Diospa akllasqan Cristo rikuriramuptinmi, Jehova Diosqa kaqmanta musuq kamachikuykunata llaqtanman qurqa. ¿Imanasqa? Manaña ñawpaq hina kawsasqankuraykum. 33 kaq watapim, Jehova Diosqa Israel nacionta qipancharurqa hinaspam Jesucristopa qatiqninkunataña llaqtanpaq akllaykurqa.

JEHOVA DIOSQA MUSUQ KAMACHIKUYKUNATAM MUSUQ LLAQTANMAN QURQA

10. (1) ¿Imanasqataq Jehova Diosqa qurqa musuq kamachikuykunata Jesucristo kay pachaman hamuptinqa? (2) ¿Imanasqam mana chay musuq kamachikuykunaqa Moisespa Diosmanta chaskisqan kamachikuykuna hinachu karqa?

¹⁰ Jehova Diosqa Israel llaqtanmanmi kamachikuyninkunata qurqa allinta kawsakunankupaq hinaspa yupaychanankupaqpas. Jesucristo kay pachaman hamuptinñataqmi musuq kamachikuykunata qurqa. ¿Imanasqa? Yupaychaqninkunaqa tukuy nacionmantaña kananraykum, manam Israel nacionllamantañachu kananku karqa. Musuq llaqtanqa kanan karqa Jesuspa qatiqninkunañam, paykunawan musuq contratota Dios ruwasqanrayku. Chaywanmi Jehova Diosqa qawachirqa paypa qayllanpiqa llapallan runakuna hina chaynalla kasqankuta. Diosqa may nacionmanta kaqtapas chaskinmi kasukuspa allin ruwaq runataqa (Hech. 10:34, 35). Diospa musuq llaqtanqa ‘Cristopa kamachikuyninkunatam’ kasukuyta qallaykurqaku. Chayqa karqa manam Moisesman Diospa qusqan kamachikuykuna hinachu. ¿Imanasqa? Diosta sapa serviqninpa sunqunpi qillqasqa hina Jesuspa yachachikuyninkuna tarikusqanraykum. Kay musuq kamachikuykunam Diospa llapallan serviqninkunata yanapanan karqa allinta kawsakunanpaq maypiña tarikuptinpas (Gal. 6:2).

11. ¿Mayqankunataq Cristopa ancha allin ‘kamachikuyninkunaqa’?

¹¹ Diospa musuq llaqtanqa ‘Cristopa kamachikuyninkunawanmi’ allinta yanapachikurqaku. Jesuspa musuq contrato ruwasqan manaraq qallarichkaptinmi, Jesusqa iskay ancha allin kamachikuykunata qurqa qatiqninkunaman. Hukninmi karqa Diosmanta willakunankupaq, hukninñataqmi karqa iñiqmasinkuwan imayna kawsakunankupaq. Kay kamachikuykunataqa llapallanchikmi kasukunanchik hanaq pachapi utaq kay pachapi kawsakuyta suyaspanchikpas.

12. ¿Imanasqam nichwan Diosmanta willakuyqa musuq kamachikuy kasqanta?

¹² Israel nacionpa tiempopiqa, huk law llaqtayuqkunam Jehova Diosta yupaychayta munaspankuqa rinanku karqa Israel llaqtaman (1 Rey. 8:41-43). Jesusmi ichaqa qatiqninkunata kamachirqa rispanku runakunata maskamunankupaq (leey Mateo 28:19, 20). Pentecostes 33 kaq watapim, Jehova Diosqa sutillata qawachirqa llapallan runakunaman qatiqninkuna willakunankuta. Chay Pentecostes fiesta punchawmi yaqa 120 Jesuspa qatiqninkuna chuya espirituta chaskirqaku. Chaymi tukuy imaymana rimaypi Diosmanta willakuyta qallaykurqaku Judio runakunaman hinaspa huk law nacionniyuqkunamanpas (Hech. 2:4-11). Chaymantañataqmi Samaria llaqtapi runakunaman willakurqaku. 36 watapiñataqmi huk law nacionniyuqkunamanpas willakuytaña qallaykurqaku. Arí, Diosqa munarqam lliw runakunaman serviqninkuna willakunankuta.

13, 14. (1) ¿Ima ‘musuq kamachikuytam’ Jesusqa qatiqninkunaman qurqa? (2) ¿Imatam ñuqanchikpas Jesus hina ruwachwan iñiqmasinchikkunarayku?

¹³ Jesusqa huk ‘musuq kamachikuytam’ qatiqninkunaman qurqa kikinkupura kuyanakuspa kawsakunankupaq (leey Juan 13:34, 35). Chaymi sapa punchaw iñiqmasinchikkunawan kuyanakuspa kawsananchik. Wañunanchik kaptinqa wañunanchikmi iñiqmasinchikkunaraykuqa. Kay kamachikuyqa manam karqachu Diosmanta Moisespa chaskisqan kamachikuypiqa (Mat. 22:39; 1 Juan 3:16).

¹⁴ Jesusqa kikinmantapas astawanqa runamasintam kuyarqa. Chaymi qatiqninkunata anchata kuyasqanrayku paykunarayku wañurqa. Chayna ruwananchiktam Jesusqa ñuqanchikmantapas suyan. Chayraykum iñiqmasinchikkunarayku ñakarinanchik utaq wañunanchik kaptinqa mana manchakunanchikchu (1 Tes. 2:8).

KUNANPAS HINASPA HAMUQ TIEMPOPIPAS DIOSQA YACHACHIWASUNMI

15, 16. (1) ¿Imaynatam Jehova Diosqa llaqtanta kunan tiempo yanapan? (2) ¿Ima tiempopim kunan kawsanchik?

¹⁵ Jesusmi ‘allin yuyayniyuq confianza sirvienteta’ churarun tiempollanpi qatiqninkunaman ‘mikuchichkaq hina’ yachachiwananchikpaq (Mat. 24:45-47). Yachachichkanmi Jehova Diospa llaqtanta ima tiempopi kawsasqanchikman hina. ¿Ima tiempopim kawsachkanchik?

¹⁶ Kunanqa ‘tukupay tiempokunapim’ kawsachkanchik. Manapas unay tiempomantam ‘llumpa-llumpay ñakariy’ punchawkunapi kawsasunchik (2 Tim. 3:1; Mar. 13:19). Chaymantapas, satanaswan demoniokunam hanaq pachamanta kay pachaman wischumusqa karqaku, chaymi tukuy mana allinta kay pachapi ruwachkanku (Apoc. 12:9, 12). Ñuqanchikmi ichaqa Diosmanta willakunapaq Jesuspa kamachiwasqanchikta ruwachkanchik. Kunanqa enteron pachapi hinaspa tukuy rikchaq rimaykunapim willakunchik.

17, 18. ¿Imatam ruwananchik kamachikuykunata chaskispanchikqa?

¹⁷ Diospa llaqtanqa achka yanapakuykunatam quwanchik Diosmanta willakunanchikpaq. ¿Allintachu yanapachikuchkanchik? Huñunakuykunapim yachachiwanchik allinta yanapachikunapaq. ¿Jehova Diosmanta hamusqanta hinachu qawanchik chay yanapakuykunata?

¹⁸ Jehova Dios yanapawananchikta munaspaqa sayachkaq hina hinaspa qawachkaq hinam uyarinanchik Diospa llaqtanpa kamachiwasqanchikkunata. Kunan kasukuq kaspanchikqa, manam sasachakusunchu ‘llumpa-llumpay ñakariy punchawkunapi’ satanaspa munaychakusqan chinkachisqa kaptin kasukunapaqqa (Mat. 24:21). Satanas manaña munaychakuptinqa, kanqam musuq kamachikuykuna musuq pachapi kawsanapaq.

19, 20. (1) ¿Imatam Jehova Diosqa wankusqa qillqapi quwasun? (2) ¿Imaynatam chay musuq kamachikuykuna yanapawasun?

¹⁹ Ñawpaq tiemponpim Jehova Diosqa Israel runakunaman kamachikuykunata qurqa. Chaymantapas Jesuspa qatiqninkunamanmi ‘Cristopa kamachikuyninta’ qurqa. Musuq pachapipas Jehova Diosqa wankusqa qillqapim musuq kamachikuykunata quwasunchik (leey Apocalipsis 20:12). Yaqachusmi kay wankusqa qillqakunapiqa musuq pachapi imayna kawsakunapaq kamachikuykuna kanqa. Chayta estudiaspanchikmi ñuqanchikpas hinaspa kawsarimuqkunapas yachasunchik Diospa munayninta. Chaynapim llapanchik allinta yachasunchik Jehova Diospa ima piensasqanta. Chaynataq bibliata allinta entiendesqanchikraykum kuyanakuspa hinaspa respetanakuspa kawsakusunchik (Is. 26:9). Jesucristo kay allpa pachata kamachimuptinqa anchatachá yachasunchik hinaspapas hukkunamanchá yachachisunchik.

²⁰ Wankusqa qillqapi kamachikuykunata kasukuptinchikqa hinaspa tukupaykama Diosman sunqu kaptinchikqa, Diosmi sutinchikta qillqanqa wiñay kawsaqkunapaq wankusqa qillqapi. Chaynaqa atichwanmi wiñaypaq kawsakuytaqa. Chayta haypanapaqqa, SAYACHKAQ hinam bibliata estudiananchik, QAWACHKAQ hinam allinta entiendenanchik ima niy munasqanta hinaspapas UYARIKUQ kasqanchiktam qawachinanchik Jehova Diospa kamachikuyninkunata kasukuspanchik. Tukuy kaykunata kasukuspanchikqa llumpa-llumpay ñakariy punchawpiqa manam wañusunchu hinaspapas hinallam Diosmanta wiñaypaq yachasunchik (Ecl. 3:11; Rom. 11:33).