Ñawpaq tiempupiqa, ¿imaynatam niqku imay hora kasqanta?
¿IMATAM ruwanchik imay hora kasqanmanta yachanapaq? Chaypaqqa ichapas relojninchikta qawanchik. Ichaqa, ¿imatam ninchik pipas imay hora kasqanmanta tapuwaptinchik?
Chawpi punchawña kaptinqa ichapas kaynata ninchik: “Doceñam, intiqa chawpiramunñam, docenapaq horañam”, nispa.
Bibliata ñawinchaspanchikqa yaqapaschá kaynata tapukurqanchik: “Ñawpaq tiempupiqa, ¿imaynatam niqku imay hora kasqankuta?”, nispa. Genesismanta Malaquias qillqakamaqa kayna rimaykunatam tarinchik: ‘Tutapayta’, ‘chawpi punchawta’, ‘tardeykuqta’ hinaspa ‘tutaykamuqta’ (Gen. 8:11; 19:27; 43:16; Juec. 19:9). Wakinpim ichaqa astawan imay horapuni kasqanmanta willakun.
Ñawpaq tiempupiqa karqam ‘llaqtata waqaychaqkuna’, astawanraq tutakunapiqa. Jesus manaraq nacechkaptin achka watakuna ñawpaqtaqa, Israel runakunaqa tutatam kimsaman rakirqaku, chayqa tupaqmi llaqtata waqaychaqkunapa cambianakusqankuwan. Jueces 7:19 riman ‘chawpi tutamanta’. Chaynataq Exodo 14:24 versiculopas riman ‘achikyaqmanta’. Jesuspa tiempunpiñataqmi judio runakunaqa Grecia hinaspa Roma nacionniyuq runakuna hinaña tutata tawapi rakiqku.
Mateomanta Juan qillqakama ñawinchaspanchikqa tarisunmi tutata imaynata rakirusqankumanta. Mateo 14:25 nin “manaraq achikyachkaptin” Jesus qatiqninkunaman lamar quchapa hawanta purispan asuykusqanmanta. Huk kutipiñataqmi Jesusqa huk rikchanachiyta willaspan rimarqa ‘llumpay tutamanta’ hinaspa ‘chawpi tuta pasaymanta’ (Luc. 12:38).
Tutata imaynata rakirusqankumantam musyanchik qatiqninkunaman Jesuspa kayna nisqanpi: “Qawan-qawanllayá kaychik, qamkunaqa manam yachankichikchu wasiyuq haykapi chayamunantaqa, ichapas inti siqaykuyta, chawpi tutata, wallpa waqayta utaq tutapaytaraq chayaramunqa”, nispa (Mar. 13:35). ‘Inti siqaykuymi’ karqa inti chinkaykusqanmanta yaqa isqun hora tutakama. ‘Chawpi tutañataqmi’ isqun horamanta chawpi tutakama. ‘Wallpa waqayñataq’ chawpi tutamanta kimsa hora madrugawkama. Kay horakunapichusmi galloqa waqarqa Jesusta presocharusqanku tuta (Mar. 14:72). ‘Tutapayñataqmi’ karqa kimsa horamanta inti qispimunankama.
Kunan tiempupi hina ñawpaq tiempupi reloj mana kaptinpas runakunaqa yacharqakum imay hora kasqanta.