Maqasqa warmikunapaq yanapakuy

Organizacion Mundial de la Salud (OMS) nisqankum willakurqa enteron pachapi chunkamanta kimsa warmikuna qusankupa maqasqan utaq abusasqa kasqankumanta. ONU nisqanku organizacionpas willakurqam yaqa 137 warmikunata sapa punchaw qusanku utaq ayllunku wañuchisqankumanta.a

Chay willakuyqa maynatam llakichiwanchik. Maqasqa utaq abusasqa warmikunaqa aswan llakisqachá tarikunku.

¿Chayna sasachakuypichu tarikunki? ¿Pitapas riqsinkichu chayna sasachakuypi tarikuqta? Chayna kaptinqa qatiqninpi yachachikuymi yanapasunkiman, chayqa bibliamantam kachkan.

Manam qampa huchaykichu

Pimanpas willakuy yanapasunaykipaq

Diosqa yanapasunkim, manam sapallaykichu kachkanki

Runamasinta ñakarichiqqa manañam kanqañachu

¿Imaynatam yanapachwan qusanpa maqasqan warmita?

Manam qampa huchaykichu

Bibliapim nin: “Sapakamam kikinchikmanta Diosman cuentata qusunchik”, nispa (Romanos 14:12).

Kaypi yuyaymanay: Maqasuqniki runaqa Diosmanmi cuenta qunqa chay ruwasqanmanta.

Qusayki maqasuspayki “qanmi huchayuq kanki maqanaypaq” nispa nisusqaykiqa yanqam. Qariqa warmintam kuyanan hinaspa respetanan (Colosenses 3:19).

Wakinkuqa warmallaraq kaspankum taytanku maman maqaqta rikurqaku, chaymi warmiyuq kaspankuqa warminkuta maqanku. Wakinkuñataqmi tomakuyllapiña kasqankurayku warminkuta maqanku. Paykunaqa Jehova Diosmanmi cuentata qunqaku, chaymi kallpanchakunanku manaña maqakuq kanankupaq.

Pimanpas willakuy yanapasunaykipaq

Bibliapim nin: ‘Tapukacharikuspa ruwasqam ichaqa ima tantiasqanchikpas allin lluqsinqa’, nispa (Proverbios 15:22b).

Kaypi yuyaymanay: Qusayki maqasuptikiqa pipas yanapaykusunaykipaq willakuy.

Allinmi kanman imapaq tantiakunaykipaq hukkunapa nisusqaykiqa. Ichapas kaykunapi piensasqaykirayku willakuyta mana munawaqchu:

• Wañurachisunaykita manchakuspa

• Warmaykikunapi piensaspa

• Qullqiki mana kasqanrayku

• Qusaykita hinallaraq kuyasqaykirayku

• Rakinakuyta mana munasqaykirayku, utaq qusayki cambiananta suyasqaykirayku

Chaynaqa, ¿pitataq niwaq yanapasunaykipaq?

Aylluykimanpas utaq riqsinakusqaykimanpas willakuwaqmi. Paykunaqa yanapasunkimanmi imata ruwanaykipaq hinaspapas kallpanchasunkim anchata mana llakikunaykipaq. Sasachakuypi tarikusqaykimanta willakusqaykiqa allinnikipaqmi.

Qusanpa maqasqan warmikunata yanapaq organizaciontam telefonowan qayakuwaq. Paykunaqa chayllam yanapasunki, hinaspapas willasunkitaqmi imakunata ruwanaykipaq. Chaypiqa yanapanmankutaqmi qusaykitapas manaña maqakuq kananpaq.

Kantaqmi huk organizacionkunapas yanapasunaykipaq. Paykunam policiakunata utaq doctorkunata qayanmanku qusayki maqasuptikiqa yanapasunaykipaq.

Diosqa yanapasunkim, manam sapallaykichu kachkanki

Bibliapim nin: ‘Jehova Diosqa,c llakisqa sunquyuqkunapa hichpallanpim kachkan, payqa llakisqa sunquyuqkunatam salvaykun’, nispa (Salmos 34:18).

Kaypi yuyaymanay: Diosqa yanapasunkim.

Jehova Diosqa anchatam kuyasunki, payqa munanmi allinlla kanaykita (1 Pedro 5:7). Payqa yachanmi imawan sasachakusqaykita, imayna tarikusqaykita, hinaspa ima piensasqaykitapas. Diosqa bibliapa nisqanwanmi kallpanchaykusunki. Munanmi payta mañakunaykita, Diosqa yanapasunkim imata ruwanaykipaq hinaspa yachayniyuq kanaykipaqpas (Isaias 41:10).

Runamasinta ñakarichiqqa manañam kanqañachu

Bibliapim nin: “Sapakamam uvas plantankupa higos sachankupa llantunpi tiyakunqaku, manañam pipas paykunataqa manchachinqachu”, nispa (Miqueas 4:4).

Kaypi yuyaymanay: Bibliaqa nintaqmi hamuq tiempopi hawkaña kawsakunanchikmanta.

Jehova Diosllam sasachakuyninchikkunata chinkachinqa. Bibliapim nin: “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas”, nispa (Apocalipsis 21:4). Chay tiempopiqa manañam yuyarisunñachu imakunawan sasachakusqanchikmantaqa. Aswanqa kusisqañam kawsakusunchik (Isaias 65:17). Chayna sumaq kawsakunanchikmantam bibliaqa niwanchik.