Llumpayta paramusqanraykum llaqtakunata yaku apachkan | ¿Imatam biblia nin?

Enteron pachapi runakunam sasachakuypi tarikuchkanku llumpa-llumpay para kasqanrayku. Qatiqninpim noticiakunapi ima nisqankumanta kachkan:

• Noticiakunata willakuq AP News nisqankum nirqa: “China nacionpa capitalnintam qayna punchawkuna llumpa-llumpayta para chayarurqa, manam chaynaqa chayarqachu 140 wataña [...]. Sabadomanta miercoleskama llumpa-llumpayta para chayaruptinmi yakupas achka-achka qucharayakurqa”a, nispa (2 de agosto de 2023).

• Noticiakunata willakuq Deutsche Welle (Toychevele) nisqankupas kaynatam nirqa: “Jueves punchawtam Japon nacionpa sur lawninpi llumpa-llumpay wayrantin para chayarurqa yaqa iskay punchaw. Chaypim iskay runakuna wañururqaku. [...] Yaqachusmi chay wayrantin paraqa Taiwan lawmanpas chayanqa”b, nispa (3 de agosto de 2023).

• Noticiakunata willakuq BBC News nisqankupas kaynatam nirqa: “[Nueva Escocia] lawpim kay pasaq semana tukuyta llumpa-llumpay para chayarusqanrayku wasikunata lluqlla aparurqa. Manam chaynaqa chayarqachu 50 wataña”, nispa (24 de julio de 2023).

¿Imatam biblia nin chaykuna pasakusqanmanta?

‘Tukupay punchawkunapi’ ima pasananmanta

Bibliapim niwanchik ‘tukupay punchawkunapi’ kawsasqanchikta (2 Timoteo 3:1). Jesusmi nirqaña kay tiemponchikpi ‘manchakuypaq kaqkunata’ rikunanchikmanta (Lucas 21:11). Llumpay rupay, llumpay chiri, llumpay wayra kasqanraykum qunqaymanta tukuy ima desastrekuna pasakuchkan.

¿Imatam qawachiwanchik kaykuna pasakusqan?

Bibliam willawanchik manchakuypaq tukuy pasakusqankuna ima qawachiwasqanchikmanta. Jesusmi nirqa: “Kaykuna pasakusqanta qawaspaykichikqa yachaychik Diospa gobiernon hichpamusqantaña”, nispa (Lucas 21:31; Mateo 24:3).

Tukuy pasakusqankunam qawachiwanchik Diospa gobiernon tukuy imakunata allichanantaña. Manañam kanqachu llumpay rupaypas, llumpay chiripas, llumpay parapas chaynataq tukuy ima desastrekunapas (Job 36:27, 28; Salmos 107:29).

Diospa gobiernon kay allpa pachata imayna allichananmanta astawan yachanaykipaq leey “¿Quién salvará el planeta?” niq yachachikuyta.