Aychata mana mikuqkunamanta | ¿Imatam biblia nin?

Kay tiempopi achka runakunam mana aychata mikuspanku frutakunallata hinaspa verdurakunallata mikunku. Paykunatam ninku vegano utaq vegana nispa.

• The Vegan Society nisqanmi nin: “Paykunaqa manam munankuchu pachakunankupaq, mikunankupaq utaq imapaqpas animalkunata wañuchiytaqa utaq ñakarichiytaqa”, nispa.

Achka runakunaqa manam animalkunata kuyasqankuraykullachu aychataqa mana mikunku, aswanqa kay pachata cuidayta munasqankuraykum, saludninkuraykum utaq religionninkuraykum.

• Britannica Academic nisqanmi nin: “Aychata mana mikuq runakunapaqqa creencianku hinam aychata mana mikuyninkuqa. Paykunaqa piensankum chayna kayqa kikinkupaqpas chaynataq hukkunapaqpas allin kasqanta. Ninkutaqmi sapakamapas imayna tantiakusqanchikwan kay pachata cambiay atinanchikta.

¿Aychata mana mikuspankuchu kay allpa pachanchikta cambiayta atinmanku? ¿Imatam biblia nin?

¿Imatam unanchawaqninchik nin runakunamantawan animalkunamanta?

Bibliapim nin Jehovaa Diospaqqa runakuna animalkunamantapas aswan atiyniyuq kasqankuta. Chaymi Diosqa runata ruwaruspanpas nirqa animalkuna makinpi kananpaq (Genesis 1:27, 28). Tiempopa risqanman hinam Diosqa nirqa animalkunapa aychanta runakuna mikunanpaq (Genesis 9:3). Chaywanqa manamá nichkarqa animalkunata ñakarichinatachu (Proverbios 12:10).

Bibliam qawachiwanchik aychata mikuy utaq mana mikuyqa sapakamamanta kasqanta.b Diospa qayllanpiqa manamá imata mikusqanchikwanchu utaq imata mana mikusqanchikwanchu allinqa kasun (1 Corintios 8:8). Manam pitapas juzgananchikchu imata mikusqanmantaqa utaq imata mana mikusqanmantaqa (Romanos 14:3).

¿Imam kay allpa pachanchikta cambianqa?

Bibliam niwanchik runakunaqa imata mikuspankupas utaq imata ruwaspankupas kay pachata mana cambianankumanta. Tukuy mana allinkunaqa rikurimun gobiernokunawanmi, runakunapa mana allin ruwasqankuwanmi hinaspa qullqiwan imakuna ruwasqankuwanmi. Chaykunataqa manamá pipas cambiayta atinmanchu. Bibliapim nin:

• “Qiwisqa kaqtaqa manam derechayta atichwanchu”, nispa (Eclesiastes 1:15).

Jehova Diosllam sasachakuykunataqa allichayta atinman. Chayna allichananmantam biblia nin:

• “Chaymantam rikurqani musuq cielotawan musuq allpa pachata, ñawpaq cielowan ñawpaq allpa pachaqa manañam kasqañachu, manañataqmi kasqañachu lamar quchapas”, nispa (Apocalipsis 21:1).

‘Ñawpaq cieloqa’ kay pachapi gobiernokunam. Chay gobiernokunatam Dios chinkachinqa, hinaspanmi churanqa ‘musuq cielotaña’ utaq Diospa gobiernontaña. Chay gobiernom ‘ñawpaq allpa pachata’ utaq mana allin runakunata chinkachinqa. Hinaspanmi ‘musuq allpa pachataña’ utaq Diosta kasukuq runakunataña gobiernanqa.

Hinaptinqa, Diospa gobiernon kamachiptinmi kusisqa hinaspa hawkaña animalkunawan kawsakusunchik (Isaias 11:6-9).