¿Enteron pachapi guerra qallaykunmanchu? | ¿Imatam biblia nin?

Kay kimsa chunka wata qipakunatam runakunaqa gobiernokunapa kamachisqanta allinpaq hapirqaku, watakuna risqanman hina allin kasqantam nirqaku. Kunanqa manañam chaynatañachu ninku, aswanqa kaykunam uyarikun noticiakunapi:

Noticiakunata huñuq hatun organizacionmi nin: “Gaza lawpi guerraqa huklawkunamanpas mirarunmanmi Israelwan Hizbula Libano nacionpa linderonpi guerrapi kasqankurayku”, nispa (Reuters, 6 de enero de 2024).
Riqsisqa periodicopas kaynatam nin: “Iran nacionmi kunanqa occidente lawpi nacionkunata manaña manchakunchu, chaymi kaqmanta guerra qallaykachiyta munachkan, kunanqa qarillañam kakuchkan Rusiawan China yanapaqninkuna kasqanrayku. Iranpa makinpi kaq achka grupo armasqa soldadokunam achka llaqtachakunata munaychakuchkanku guerrata ruwaspa, hinaspapas kay nacionqa yaqa qunqaymantam programa nuclear nisqanwan manchakuypaq bombakunata kaqmanta ruwayta qallaykun”, nispa (The New York Times, 7 de enero de 2024).
Riqsisqa organizacionpas ninmi: “Rusiam hinalla tukuy ima armankunawan Ucrania nacionpi achka runakunata wañuchichkan hinaspa llaqtakunata tuñichichkan”, nispa (UN News, 11 de enero de 2024).
Japon nacionpi riqsisqa periodicom nin: “China nacionpa achkallay-achka qullqi hapisqan hinaspa achkallay achka armankuna, Taiwan nacionpi runakuna nacionninrayku wañuytapas mana manchakusqanku astawanraq yapakusqan hinaspa Pekin llaqta Washington llaqtawan chiqninakuspa mana allin apanakusqankum qunqaymanta qallaykachinman guerrata”, nispa (The Japan Times, 9 de enero de 2024).

¿Bibliaqa imatapas ninchu guerrallapiña wakin nacionkuna kasqankumanta? ¿Chaynanakuchkaptinkuchu enteron pachapiña guerra qallaykunman?

Bibliaqa nirqañam kaykuna pasakunanmanta

Bibliapiqa manamá nirqachu kunan tiempopi ima nacionkuna guerrapi kanankumantaqa. Ichaqa nirqañam guerrakuna kasqanrayku ‘kay pachapi hawkayay chinkananmanta’ (Apocalipsis 6:4).

Bibliapi Daniel sutiyuq libropim nirqaña ‘tukupay punchawkunapiqa’ atiyniyuq nacionkuna chiqninakusqankurayku guerrapi ‘peleanankumanta’, utaq aswan munayniyuq kanankupaq imatapas ruwanankumanta. Chay guerrapiqa qawachinakunankum karqa tukuy imaymana armankuta, chaypaqqa achkallay-achka qullqinkutam gastananku karqa (Daniel 11:40, 42, 43).

Armagedon guerram chayamuchkanña

Bibliapiqa ninmi kay pachapi tukuy imaqa manaña allinqa kananmanta. Jesucristom kaynata nirqa: “Llumpa-llumpay ñakariy punchawkunam kanqa. Manam chaynaqa karqachu runakunapa qallariyninmantapacha kunankamapas”, nispa (Mateo 24:21). Chay llumpa-llumpay ñakariy punchawkunam tukunqa Armagedon guerra qallaykuptin, chayqa ‘tukuy atiyniyuq Diospa piñakuynin punchawpi guerram’ (Apocalipsis 16:14, 16).

Kay Armagedon guerraqa runakunatam salvanqa, manam chinkachinqachu. Kay guerrapitaqmi Diosqa llapallan kay pachapi gobiernokunata chinkachinqa, paykunaqa guerrakunata hatarichispankum runakunata llumpayta ñakarichichkanku. Armagedon guerra hawkaña kawsakunanchikpaq yanapawasqanchikmanta yachanaykipaq leeykuy: