¿Religionpiraqchu kananchik Dios chaskiwananchikpaq?

¿Imatam bibliaqa yachachin?

Arí, Jehova Diosqa munanmi pay yupaychananchikpaq huñunakunanchikta. Bibliapim nin: “Sunqumanta kuyanakuspayá llapallanchik kallpanchanakusun kuyakuq hinaspa allin ruwaq kananchikpaq, wakinkunapa costumbrasqanman hinaqa amayá huñunakuyman riytaqa saqisunchu”, nispa (Hebreos 10:24, 25).

Jesuspa qatiqninkunapas huñunakuqkum. Chaytam yachanchik kayna nisqanwan: “Qamkuna kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:35). Iñiqmasinchikkunawan riqsinakuspanchikmi kuyanakunchik. Chayna kuyanakuptinchikmi runakunapas yachanku Jesuspa qatiqninkuna kasqanchikta. Iñiqmasinchikkunawanqa riqsinakunchik sapa kuti Diosta yupaychanapaq huñunakuspanchikmi (1 Corintios 16:19). Chaymi iñiqmasinchikkunawanqa llapallanchik huk sunqulla kanchik (1 Pedro 2:17).

Diospa chaskisqan kanapaqqa manam religionpi kayllamantachu

Bibliapim nin Diosta yupaychananchikpaq huñunakunanchikta ichaqa manam ninchu religionpi kaptinchik Diospa chaskisqanña kasqanchiktaqa. Chaskiwananchikpaqqa religionninchikpi bibliawan yachachiwasqanchiktam kasukunanchik. Chaytam bibliapas nin: “Dios taytapa munasqanman hina mana qanrachasqa religionqa kaymi: Mana tayta-mamayuqkunata hinaspa viudakunatapas llakinkunapi yanapaykuymi, chaynataq runakunapa mana allin ruwasqankunapi mana chapukuspa karunchakuymi”, nispa (Santiago 1:27, nota).