¿Imanasqataq Jehova Diospa testigonkunaqa Jesuspa santa cenanta mana wakin runakuna hinachu yuyarinku?

Ñuqaykuqa bibliapi nisqanman hinam Jesuspa santa cenantaqa yuyariniku (1 Corintios 11:20). Huk religionpi kaqkunaqa costumbrenkuman hinam Jesuspa santa cenanta yuyarinku, manam bibliapi nisqanman hinachu.

¿Imanasqataq Jesuspa wañukusqanta yuyariniku?

Yuyarinikuqa ñuqanchikrayku Jesus wañukusqanmanta agradecekuspaykum (Mateo 20:28; 1 Corintios 11:24). Jesuspa santa cenantaqa yuyariniku manam runakunapa costumbrenman hinachu nitaq huchanchikmanta pampachawanallanchikpaqchu. Bibliaqa ninmi Jesuspi iñiptillanchik, Diosqa huchanchikmanta pampachawasqanchikta (Romanos 3:25; 1 Juan 2:1, 2).

¿Hayka kutitam Jesuspa wañukusqanta yuyariniku?

Jesusmi qatiqninkunaman kamachirqa wañukusqanta yuyarinankupaq, ichaqa manam nirqachu watapi hayka kutita yuyarinankumantaqa (Lucas 22:19). Wakin runakunam ninku Jesuspa santa cenanta sapa killa yuyarinamanta, wakinñataq sapa semana, hukkunañataq sapa punchaw, chaynataq punchawpi achka kutita. Hukkunapas ninkum munasqankuman hina hayta kutitapas yuyarinankumanta. Chaynata niptinkupas qatiqninpi yachachikuykunawanyá allinta yachaykusun hayka kutita yuyarinamanta.

Judiokunapa pascua ruwasqanku punchawpim Jesusqa santa cenata ruwarqa, hinaspanmi wañukurqa (Mateo 26:1, 2). Bibliapim tupachin pascuapi mikunankupaq nakasqanku carnerowan Jesuspa wañukusqanta (1 Corintios 5:7, 8). Pascuataqa watapim huk kutillata ruwaqku (Exodo 12:1-6; Levitico 23:5). Jesuspa wañukusqanta utaq santa cenatam ñawpaq tiempopipas qatiqninkunaqa watapi huk kutillata yuyarirqaku. Chaynallataqmi kunan tiempopipas, bibliapi yachachikuyman hina Jehova Diospa testigonkunaqa watapi huk kutillata Jesuspa wañukusqanta yuyariniku.a

¿Haykapi chaynataq imay horapim Jesuspa wañukusqanta yuyariniku?

Jesusmi santa cenata ruwarqa Judiokunapa calendarionkuman hina. 33 watapi nisan killapa 14 punchawninpi inti siqaykuyta (Mateo 26:18-20, 26). Chaymi Jehova Diospa testigonkunaqa Jesuspa wañukusqanta sapa wata imay punchawpi tupamusqanman hina yuyariniku.b

33 watapi nisan killapa 14 punchawninqa viernes punchawpim tuparqa, ichaqa manam sapa watachu chay punchawllapi tupan. Nisan killapa 14 punchawnin imay punchawpi tupamusqanta yachanaykupaqqa ñawpaq tiempopi judiokuna calendarionkupi yupasqankuman hinam ñuqaykupas yupaniku.c

Tantawan vino

Jesuspa qallariypi santa cenata ruwasqanpiqa mana levadurayuq tantatam mikurqaku hinaspa mana imawanpas yapasqa vinotam tomarqaku (Mateo 26:26-28). Chaymi ñuqaykupas Jesuspa wañukusqanta yuyarispaykuqa servichikuniku mana levadurayuq tantata hinaspa imawanpas mana yapasqa vinota.

Wakin religionkunaqa Jesuspa wañukusqantam yuyarinku levadurayuq tantatawan. Ichaqa bibliapiqa levadurataqa huchawanmi tupachin (Lucas 12:1; 1 Corintios 5:6-8; Galatas 5:7-9). Chaymi mana levadurayuq tantaqa tupan Jesuspa mana huchayuq cuerponwan (1 Pedro 2:22). Wakin religionkunapiqa vinopa rantinpim uvaspa jugonta utaq zumonta tomanku. Chaynataqa ruwanku vino tomay hucha kasqanta piensaspankum (1 Timoteo 5:23).

Vinowan tantaqa Jesuspa cuerponwan chaynataq yawarninwan tupanachiyllam

Mana levadurayuq tantaqa chaynataq imawanpas mana yapasqa vinoqa Jesuspa cuerponwan hinaspa yanwarninwanmi tupan. Ichaqa wakin runakunam piensanku tantaqa Jesuspa cuerpon kasqanta, chaynataq vinopas yawarnin kasqanmanta. Qatiqninpi chayna mana kasqanmanta allinta yachaykusun.

• Diospa kamachikuyninpim nin yawarta mana mikunapaq. Yawarninta tomananpaq qatiqninkunaman kamachispanqa Diosta mana kasukunankupaqcha Jesusqa nichkanman karqa (Genesis 9:4; Hechos 15:28, 29). Chaytaqa Jesusqa manapunim kamachirqachu, payqa kasukurqam yawarta mana mikunapaq Jehova Diospa nisqanta (Juan 8:28, 29).

• Santa cenata ruwasqan tutapiqa Jesusqa manaraqmi wañukurqachu, chaywanmi ninchik apostolninkunaqa Jesuspa yawarninta mana tomasqankumanta (Mateo 26:28).

• Sichum tanta Jesuspa cuerponman tikrakuptinqa chaynataq vino yawarninman tikrakuptinqa, sapa watachiki Jesusta huchanchikrayku ñakarichichkachwan. Ichaqa Jesusqa huchanchikraykum “huk kutillata” wañukurqa (Hebreos 9:25, 26).

• Jesusqa nirqa santa cenata imayna ruwasqanta sapa wata yuyarinankutam manam imayna ñakarisqanta yuyarinankutachu (1 Corintios 11:24).

Wakin bibliakunapim Jesuspa nisqanta qillqarunku: “Kayqa yawarniymi”, nispa (Mateo 26:28). Chaywanmi wakin runakunaqa piensanku vinoqa Jesuspa cierto yawarnin kasqanmanta. Jesus chaynata nispanqa nichkarqam vinoqa yawarninwan tupasqanta, manam yawarnin kasqanmantachud (Mateo 13:34, 35).

¿Pikunam tantata mikunku hinaspa vinota tomanku?

Jesuspa wañukusqanta Jehova Diospa testigonkuna yuyariptinkuqa, wakillankum tantata mikunku hinaspa vinotapas tomanku. ¿Imanasqa?

Jesuspa yawarninta chaqchusqanwanmi, Jehova Diosqa kaqmanta ‘acuerdota ruwarqa’ (Hebreos 8:10-13). Chay musuq acuerdopi kaqkunallam Jesuspa wañukusqanta yuyariptinkuqa tantata mikunku hinaspa vinota tomanku (Hebreos 9:15; Lucas 22:20). Paykunam Jesuswan hanaq pachamanta kamachimunqaku. Bibliapim nin 144.000 kasqankumanta (Lucas 22:28-30; Apocalipsis 5:9, 10; 14:1, 3).

Jesuspa “achkallay-achka” wakin qatiqninkunañataqmi kay pachapi wiñaypaq kawsakusunchik (Lucas 12:32; Apocalipsis 7:9, 10). Chaymi Jesuspa wañukusqanta yuyarispaqa tantata mana mikunchikchu nitaq vinotapas tomanchikchu, ichaqa chay huñunakuymanmi rinchik huchanchikrayku Jesuspa wañukusqanmanta agradecekuspanchik (1 Juan 2:2).