Exodo
22 Diosqa nirqataqmi: “Pipas nakakunanpaq utaq rantikunanpaq* torota suwakuruspanqa, toropa rantinpim pichqa torota sayachipunan. Ovejata suwakuruspanñataqmi tawa ovejata sayachipunan.+
2 Wasiman tuta suwa+ yaykuchkaptin pipas tariruspan chay suwata wañurachiqqa mana huchayuqmi kanqa wañuchisqanmantaqa. 3 Punchaw wañurachispanmi ichaqa wañuchisqanmanta huchayuq kanqa.
Suwakuqqa suwakusqanmantam sayachipunan. Mana imanpas kaptinqa chay suwasqan runatam servinan suwakusqanta sayachinankama. 4 Suwapa makinpi torota, asnota utaq ovejata kawsaqllataraq tariruptinkuqa chay suwam huk chaynatawanraq qupunan.
5 Pipas chakranpi utaq uvas chakranpi animalninta michichkaspan hukpa chakranta dañorachispanqa uvas chakranpi allinnin kaqtam utaq tarpusqanmanta allinnintam sayachipunan.
6 Pipas kichkakunata kañachkaptin chay nina gamillakunata utaq sayachkaqraq kawsayta ruparuptinqa, kañaqmi chakrapa dueñonman sayachipunqa kañasqanmanta.
7 Sichu runamasinpa churachikusqan qullqinta utaq imantapas pipas suwakuchkaspan tarirachikuqqa, huk chaynatawanmi dueñonman sayachipunan.+ 8 Suwata mana tarispankuñataqmi wasipa dueñonta juezkunaman pusananku imam kaqta willakunanpaq,+ chaynapi suwasqanta utaq mana suwasqanta juezkuna ñuqa Diospa yanapakuyniywan yachanankupaq. 9 Sichu pipas torota, asnota, ovejata, pachata utaq imatapas tarikuspan ninman: ‘¡Kayqa ñuqapam!’, nispa. Hinaptinqa iskaynin runakunam juezkunaman rinanku chaynapi ñuqa Diospa yanapakuyniywan allichanankupaq,+ huchayuqñataqmi huk chaynatawan qupunqa.+
10 Pipas runamasinman asnonta, toronta, ovejanta utaq ima animalnintapas saqipakunman qawapunanpaq hinaptin chay animalñataq wañurunman, unquy hapirunman utaq mana pipapas rikusqan suwasqa karunman, hinaptinqa 11 ñuqa Jehova Diospa yachasqaytam imam kaqta willakuspa iskayninku sumaqllata allichananku. Chaynapim qawapuqninqa manaña imatapas sayachipunqachu.+ 12 Chay animalta suwarachikuspanñataqmi dueñonman sayachipunan. 13 Purun animal wañurachiptinñataqmi puchunta apamunan, chayna kaptinqa manañam sayachipunqachu purun animal wañurachisqanrayku.
14 Pipas runamasinpa animalninta prestakurunman hinaptin animalñataq dueñonpa mana rikusqan wañurunman utaq imanakurunmanpas, hinaptinqa dueñonmanmi sayachipunan. 15 Dueñon chaypi kaptinmi ichaqa manaña sayachipunanchu. Litasqa kaptinqa litasqallanmantañam qupunan.
16 Qariwan manaraq puñuq sipasta pipas sakrillawanña rimapayaspan paywan puñuruspanqa chay runam taytanpa hayka mañasqanta quspan sipaswan casarakunan.+ 17 Sipaspa taytan casarachiyta mana munaptinñataqmi chay runaqa casarachkanmanpas hina qunan imapas mañasqanta.
18 Layqa ruwaq warmitaqa wañuchinaykichikmi.+
19 Pipas animalwan kakuqqa wañunanmi.+
20 Ñuqa Jehova Diosllapaqmi animaltaqa nakaspa quwanaykichik, pipas taytachakunaman quqqa wañunanmi.+
21 Huklaw llaqtayuq runataqa amam ñakarichinkichikchu,+ qamkunapas Egipto nacionpiqa yachapakuqkunallam* karqankichik.+
22 Amam viudakunataqa nitaq mana taytayuqkunataqa ñakarichinkichikchu.+ 23 Ñakarichisqaykichikmanta paykuna qayakamuwaptinqa, ñuqaqa uyarisaqmi.+ 24 Ñakarichiptikichikqa llumpayta piñakuruspaymi wañurachisqaykichik. Warmikichikñataqmi viuda qipanqa, churikichikpas mana taytayuqmi qipanqa.
25 Sichu wakcha runaman qullqita prestaspaykiqa, amam wakin runakuna hinaqa mirayniyuqtaqa mañankichu.+
26 Prestasqaykirayku runamasikipa pachanta hapispaykiqa,+ manaraq inti siqaykuchkaptinmi kutichipunayki. 27 Wankukunanpaq pachan chaylla kasqanraykum kutichipunayki. Puñuspanqa, ¿imawantaq wankukunman?+ Pay qayakamuwaptinqa llakipayakuq kasqayraykum uyariykusaq.+
28 Amam ñuqa Diostaqa ñakawankichikchu+ nitaq llaqtaykichikpi kamachiqkunatapas.+
29 Ama iskayrayaspam quwankichik cosechaykichikmanta, vinoykichikmanta hinaspa aceitekichikmanta imam quwanaykichikta.+ Piwi* churikichiktapas ñuqapaqmi sapaqchanaykichik.+ 30 Quwankichiktaqmi vacaykichikkunapa chaynataq ovejaykichikkunapa punta naceq uñantapas.+ Nacesqanmantaqa qanchis punchawmi mamanwan kanan, pusaq kaq punchawpiñataqmi ñuqaman quwankichik.+
31 Qamkunaqa ñuqapa sapaqchasqay* runaykunam kankichik.+ Chayraykum pipa animalnintapas purun animal wañurachiptinqa chay animalpa aychantaqa ama mikunkichikchu,+ allqukunamanmi wischuykunkichik”, nispa.