Exodo
4 Moisesñataqmi Diosta nirqa: “¿Imatataq ruwasaq ‘Jehova Diosqa manam rikurisurqankichu’ nispa mana kasuwaptinkuqa?”, nispa.+ 2 Hinaptinmi Jehova Diosqa Moisesta nirqa: “¿Imatataq hapichkanki?”, nispa. Moisesñataqmi nirqa: “Tawnatam”, nispa. 3 Chaymi Diosqa nirqa: “Pampamanyá wischuykuy”, nispa. Hinaptinmi pampaman tawnanta Moises wischuykuptin tawnanqa culebraña rikurirurqa.+ Chayta qawaykuspanmi Moisesqa ayqikurqa. 4 Jehova Diosñataqmi Moisesta nirqa: “Chupanmantayá hapiruy”, nispa. Hinaptinmi chupanmanta culebrata Moises hapiruptin culebraqa tawnayarurqa. 5 Chaymi Diosqa nirqa: “Chayta ruwaptikim punta apaqkunaqa yachanqaku ñuqa Jehova Dios qanman rikurisqayta. Ñuqaqa kani ñawpaq abueloykichik Abrahanpa, Isaacpa hinaspa Jacobpa Diosninmi”, nispa.+
6 Chaymantapas Jehova Diosqa nirqam: “Ama hina kaspayá makikita uqllaynikiman hinaykuy”, nispa. Chaymi Moisesqa makinta uqllayninman hinaykurqa, makinta hurquykuptinñataqmi makinqa riti hina yuraq-yuraq lepra unquyniyuqña kachkasqa.+ 7 Hinaptinmi Diosqa nirqa: “Makikitayá uqllaynikiman kutiykachiy”, nispa. Chaymi Moisesqa makinta uqllayninman kutiykachirqa, kaqmanta hurquykuptinñataqmi makinqa sanoña kachkasqa. 8 Chaymi Diosqa nirqa: “Tawna culebrayarusqanta mana kaqpaqpas hapispankuqa leprawan makiki yuraqyasqanta qawaspankum kasusunki.+ 9 Chaykunawanpas mana kasusuptikiqa Nilo mayumantam yakuta wisinki, hinaspam chaki allpaman tallinki. Hinaptinmi Nilo mayumanta wisisqayki yakuqa pampapi yawaryarunqa”, nispa.+
10 Hinaptinmi Moisesqa Jehova Diosta nirqa: “¡Ay, Jehova Dioslláy! Manaraq ñuqawan rimachkaptikipas ñuqaqa manam rimayta atillarqanichu, manataqmi kunanpas atillanichu. Ñuqaqa allillamanta rimaqmi kallani, wata-watatataqmi rimallanipas”, nispa.+ 11 Jehova Diosñataqmi nirqa: “¿Pitaq runataqa simiyuqta unancharqa? ¿Pitaq runata upayarachinman utaq manaña rimaqta rikurirachinman? ¿Pitaq runapa ñawinta kichaykunman utaq ñawsayarachinman? ¿Manachu ñuqa Jehova Dios? 12 Chaynaqa riyá. Ñuqam imata rimanaykipaqpas yachachisqayki hinaspa yanapasqayki”, nispa.+ 13 Chaywanpas Moisesqa nirqam: “¡Ay, Jehova Dioslláy! Ama hina kaspaykiyá pitapas hukta kamachiy”, nispa. 14 Jehova Diosñataqmi llumpayta piñakuspan nirqa: “Chaynaqa, Leviy ayllumanta wawqiki Aaronyá+ yanapasunki, payqa rimayta mana manchakuqmi. Ñam hamuchkanña qanwan tupaykunanpaq, maynatachá kusikunqa rikuykususpaykiqa.+ 15 Tukuy nisqaytayá payman willay, payñataqyá qanman nisqayta hina rimachun.+ Ñuqam yachachisqaykichik imata rimanaykichikpaqpas+ chaynataq imata ruwanaykichikpaqpas. 16 Aaronmi qampa rantikipi nisqaykunata runakunaman willanqa, qamñataqmi Aaronman ñuqapa rantiypi imam nisqayta ninki.+ 17 Kay tawnatapas apankim yachachisqaykunata ruwanaykipaq”, nispa.+
18 Chaymantam Moisesqa suedron Jetropaman+ kutispan nirqa: “Egiptomanmi kutisaq wawqiykunapa imayna kasqanta yachaq, rirusaqyá”, nispa. Suedron Jetroñataqmi nirqa: “Qamllamá allinlla”, nispa. 19 Chaymantam Jehova Diosqa Madianpiraq kachkaptin Moisesta nirqa: “Egipto nacionmanyá kutiy. Wañuchisunaykipaq maskasuqniki runakunaqa wañurunñam”, nispa.+
20 Chaymi Moisesqa warminta asnoman sillaykachirqa hinaspa churinkunatapas churkuykurqa, aparqataqmi Diospa apachisqan tawnatapas. Hinaspanmi Egiptoman kutirqa. 21 Jehova Diosqa nirqataqmi: “Egiptoman kutispaykiqa amamá qunqarunkichu yachachisqaykunata Egipto nacionta kamachiqpa* qayllanpi ruwaytaqa.+ Payqa manam chayllaqa kacharisunkichikchu,+ chaymi ñuqaqa munasqanta ruwananpaq saqisaq.+ 22 Qamñataqmi Egipto kamachiqta ninki: ‘Jehova Diosmi nin: “Israelpa miraynin runakunaqa piwi* churiy hinam.+ 23 Chayraykum churiytaqa yupaychawaqniy rinanpaq kacharinayki. Manachayqa piwi churikitam wañurachisaq”’”, nispa.+
24 Chaymantam Moisesqa ayllunwan kuska Egiptoman risqanpi samana sitioman chayarurqa. Chaypim Jehova Dios rikuriykurqa+ hinaspam payta* wañurachiyta munarqa.+ 25 Hinaptinmi Moisespa warmin Ziporaqa+ ñawchi rumita hapiykuspan wawanpa qari kayninpa qarachanta kuchururqa. Hinaspam chay qarachanta paypa* chakinman churaykuspan nirqa: “Kaytaqa ruwachkani kay yawarwan qusayña kasqaykiraykum”, nispa. 26 Ziporaqa ‘yawarwan qusay’ nispanqa nirqa wawanpa qari kayninpa qarachanta kuchusqanraykum. Chayta ruwasqanraykum Diosqa manaña imanarqachu.
27 Aarontañataqmi Jehova Dios nirqa: “Moiseswan tupanaykipaqyá chunniq urquman riy”, nispa.+ Chaymi Aaronqa Diospa urqunman+ Moiseswan tupaq rirqa, hinaspam tupaykuspan muchaykurqa. 28 Moisesñataqmi kamachiqnin Jehova Diospa tukuy ima nisqanta Aaronman willarqa,+ willarqataqmi imakunata ruwananpaq Diospa kamachisqantapas.+ 29 Chaymantam Moiseswan Aaronqa Israelpa mirayninkunapi punta apaqkunawan huñunakuq rirqaku.+ 30 Chaymi Aaronqa Moisesman Jehova Diospa tukuy ima nisqankunata willarqa, hinaspam imam ruwananpaq Diospa kamachisqankunatapas+ Israelpa miraynin runakunapa qayllanpi ruwarqa. 31 Hinaptinmi paykunaqa mana iskayrayarqakuchu Moisesqa Diospa kachamusqan kasqanmanta.+ Israelpa miraynin runakunaqa ñakariypi kasqankumanta+ Jehova Dios yanapananta yachaykuspankum+ qunqurakuykuspa pampakama kumuykurqaku.