Exodo
10 Jehova Diosmi Moisesta nirqa: “Egipto nacionta kamachiqmanyá* riy. Ñuqaqa hinallam saqichkani paypas hinaspa runankunapas rumi sunqu kanankuta,+ chaynapi atiyniywan ruwasqaykunata qawananpaq+ 2 chaynataq qampas churikikunaman hinaspa willkaykikunaman chaykunamanta willanaykipaq, paykunamanqa willanaykim Egiptopi runakunata ñakarichisqaymanta hinaspa atiyniywan tukuy ima ruwasqaymanta.+ Chaynapim qamkunaqa yachankichik ñuqaqa Jehova Dios kasqayta”, nispa.
3 Chaymi Moiseswan Aaronqa Egipto nacionta kamachiqpa kasqanman rispanku nirqaku: “Hebreo runakunapa yupaychasqayku Jehova Diosmi nin: ‘¿Haykapikamataq mana kasukuwankichu?+ Runaykunatayá kachariy yupaychawaqniy rinankupaq. 4 Runaykunata mana kachariptikiqa paqarinmi aqarway urukunata nacionnikiman kachaykamusaq. 5 Chay urukunam pampapas mana rikuy atinakama allpaykita tapaykunqa. Chay urukunaqa runtu parapa puchusqankunatam tukunqa, tukunqataqmi llapallan sachakunatapas.+ 6 Huntanqataqmi wasikiman, wasikipi llamkaqkunapa wasinman hinaspa Egiptopi llapallan wasikunamanpas. Chaynataqa manam haykapipas rikurqachu taytaykipas nitaq abueloykikunapas’”, nispa.+ Chayta niruspankum Moiseswan Aaronqa Egiptota kamachiqpa ñawpaqninmanta pasakurqaku.
7 Chaymanta qipatam Egiptota kamachiqta runankuna nirqa: “¿Haykapikamataq wak runaqa ñakarichiwasun? Jehova Diosninkuta yupaychanankupaqyá chay runakunata kachaykuy. ¿Manachu qawanki Egiptoqa qalaypaqña kasqanta?”, nispa. 8 Chaymi Moisestawan Aarontaqa kaqmanta pusaramurqaku, hinaptinmi Egiptota kamachiqqa nirqa: “Riychikyá Jehova Diosnikichikta yupaychaq. Ichaqa niykuwaychik, ¿pikunataq qamkunawan rinqaku?”, nispa. 9 Hinaptinmi Moisesqa nirqa: “Jehova Diosta yupaychanaykupaqqa rinanmi+ musu-sipaskunapas, yuyaqkunapas, qari churiykupas chaynataq warmi churiykupas. Qatisaqkutaqmi ovejaykutawan vacaykutapas”,+ nispa. 10 Egiptota kamachiqñataqmi nirqa: “¿Qamkunaqa nichkankichikchu qamkunatawan warmaykichikta kachaykunayta? ¡Manam munanichu Jehova Dios yanapasusqaykichikta piensanaykichiktaqa!+ Qamkunaqa mana allin ruwaytam munachkankichik. 11 ¡Manam kacharisqaykichikchu! Niwasqaykichikman hina Jehova Diosta yupaychaq riyta munaspaqa qarikunallayá riychik”, nispa. Chaymantam Egiptota kamachiqpa runankunaqa Moisestawan Aaronta qarqururqaku.
12 Jehova Diosñataqmi Moisesta nirqa: “Egipto lawman tawnaykita haywariy, chaynapi Egiptoman aqarway urukuna hamuspa runtu parapa puchusqanta tukunanpaq”, nispa. 13 Chaymi Moisesqa Egipto lawman tawnanta haywarirqa. Hinaptinmi Jehova Diosqa intipa qispimunan lawmanta Egiptoman wayrata pukuchirqa tukuy punchaw hinaspa tukuy tuta. Paqarintinñataqmi chay wayraqa aqarway urukunata aparamurqa. 14 Chaymi aqarway urukunaqa llumpa-llumpayta Egiptoman huntarurqa.+ Chayna achkallay-achka+ aqarway urukunaqa manam haykapipas karqachu, nitaqmi haykapipas kanqachu. 15 Chay aqarway urukunaqa puyu hinañam Egiptota tapaykurqa. Tukururqataqmi Egiptopi tukuy imata chaynataq runtu parapa puchusqan sachakunapa ruruntapas. Egiptopiqa manam puchurqachu sachapa llaqinpas* nitaq purunpi qurakunapa llaqinpas.
16 Hinaptinmi Egiptota kamachiqqa chaylla Moisestawan Aaronta qayachimuspan nirqa: “Yupaychasqaykichik Jehova Diospaq hinaspa qamkunapaqmi mana allinta ruwaruni. 17 Kunanllañayá pampachaykullawaychik, hinaspayá yupaychasqaykichik Jehova Diosta mañapuwaychik aqarway urukunata chinkachinanpaq, chaynapi mana wañurunaypaq”, nispa. 18 Chaymi Egiptota kamachiqpa kasqanmanta lluqsirurqaku, hinaptinmi Moisesqa Jehova Diosta mañakurqa.+ 19 Jehova Diosñataqmi intipa siqaykunan lawmantaña nisyu wayrata pukuchimurqa. Hinaspam aqarway urukunata Puka lamar quchaman wischuykurqa, manam chullapas aqarway uruqa Egiptopiqa puchurqachu. 20 Jehova Diosqa hinallamá saqirqa Egiptota kamachiq rumi sunqu kananta.+ Chaymi kamachiqqa Israelpa mirayninkunataqa mana kacharirqachu.
21 Chaymantam Jehova Diosqa Moisesta nirqa: “Tawnaykitayá altoman haywariy, chaynapi yanay-yanay tutayay lliw Egiptopi kananpaq”, nispa. 22 Chaymi Moisesqa chaylla tawnanta altoman haywarirqa, hinaptinmi Egiptoqa kimsa punchawpuni yanay-yanay tutayaypi karqa.+ 23 Kimsa punchawpunim Egipto runakunaqa mana rikunakurqakuchu, nitaqmi mayman riytapas atirqakuchu. Israelpa mirayninkunapa yachasqanpim* ichaqa mana tutayarqachu.+ 24 Hinaptinmi Egiptota kamachiqqa Moisesta qayachispan nirqa: “Riychikyá Jehova Diosta yupaychaq.+ Churikichikpas qamkunawanyá richun. Ovejaykichikwan vacaykichikmi ichaqa hinapi qipanqa”, nispa. 25 Moisesñataqmi nirqa: “Animalniykutapas qatinaykum Jehova Diosniykupaq wañuchipunaykupaq hinaspa kañapunaykupaq.+ 26 Animalniykupas ñuqaykuwanmi rinan. Llapantam animalniykutaqa qatinayku, hinaspam Jehova Diosniykupaq wakinta wañuchipusaqku. Wakpiñachá mayqinta Jehova Diosniykupaq wañuchipunaykutaqa yachasaqku”, nispa. 27 Jehova Diosñataqmi hinallaraq saqirqa Egiptota kamachiq rumi sunqu kananta, chaymi Israelpa mirayninkuna ripukunankutaqa mana munarqachu.+ 28 Egiptota kamachiqñataqmi Moisesta nirqa: “¡Pasaway kaymanta! ¡Amam haykapipas rikurimuwankiñachu, kaqmanta kutimuptikiqa wañurachisqaykim!”, nispa. 29 Hinaptinmi Moisesqa nirqa: “Nisqaykiman hinayá kachun, manañam kaqmantaqa kutimusqaykiñachu”, nispa.