Exodo
2 Chay punchawkunapim Leviy+ kasta runa kastamasin warmiwan casarakururqa. 2 Chay warmim wiksayakuruspan qari wawata wachakurqa. Hinaspanmi pakaspalla kimsa killa uywarqa, chay wawaqa kuyayllapaqmi karqa.+ 3 Manaña pakayta atispanñataqmi+ tuturamanta ruwasqa canastapi siriykachispan Nilo mayupi saqiykurqa. Ichaqa yaku mana yaykurunanpaqmi chay canastataqa breawan llusirurqa, hinaspanmi Nilo mayupa patanpi kaq tuturakunapa chawpinpi saqiykurqa. 4 Wawapa mayor panichanñataqmi+ karullamanta qawarqa wawata ima pasananta yachananpaq.
5 Hinaptillanmi Egipto nacionta kamachiqpa* warmi churin Nilo mayuman bañakuq rirqa. Serviqnin warmikunawan mayu patanpi purichkaspanmi rikururqa tuturakunapa chawpinpi canastata, hinaspam serviqnin sipaswan aparachimurqa.+ 6 Canastata kichaykuspa qawaykuptinñataqmi wawacha waqachkasqa. Chaymi wawachata llakipayarqa, hinaspam nirqa: “Hebreo wawacham kayqa”, nispa. 7 Hinaptinmi wawapa mayor panichanqa chaylla asuykuspan Egiptota kamachiqpa warmi churinta nirqa: “¿Maskarapamuykimanchu Hebreo warmita kay wawata ñuñupusunaykipaq?”, nispa. 8 Hinaptinmi kamachiqpa warmi churinqa nirqa: “Arí, maskarapamuwayá”, nispa. Chaymi sipaschaqa chaylla pasaspan wawapa mamanta qayaramurqa.+ 9 Paytam kamachiqpa warmi churin nirqa: “Kay wawatayá ñuñupamuway, pagapusqaykim”, nispa. Chaymi chay warmiqa wawata uywamunanpaq aparqa. 10 Wawa wiñaruptinñataqmi kamachiqpa warmi churinman kutichipurqa, hinaptinmi payña uywarqa.+ Hinaspam Moiseswan* suticharqa “yakumanta hurqusqaymi” nispan.+
11 Achka watakuna pasaruptinmi Moisesqa yuyayniyuq runaña karqa. Hinaspam huk kutipi qawaq rirqa Hebreo kastamasinkuna ñakarispa llamkasqankuta,+ chaypim rikururqa kastamasin Hebreo runata Egipto llaqtayuq runa maqasqanta. 12 Chaymi muyuriqninpi mana pipas kasqanta qawarispan Egipto runataqa wañurachirqa, hinaspam aqupi pamparurqa.+
13 Paqarinnintin punchawta lluqsispanñataqmi Hebreo kasta iskay runakuna maqanakuchkaqta rikururqa. Hinaspam chay maqaq runata nirqa: “¿Imanasqataq llaqtamasikitaqa maqachkanki?”, nispa.+ 14 Hinaptinmi maqaq runaqa nirqa: “¿Pitaq qamtaqa churasurqanki ñuqaykupa kamachiqniyku hinaspa juezniyku kanaykipaqqa? ¿Egipto runata hinachu ñuqatapas wañurachiwayta munachkanki?”, nispa.+ Hinaptinmi Moisesqa mancharikuspan sunqullanpi nirqa: “¡Runa wañurachisqaytaqa yacharusqakum!”, nispa.
15 Egipto nacionta kamachiqñataqmi chayta yacharuspan Moisesta wañurachiyta munarqa. Hinaptinmi Moisesqa ayqikurqa, hinaspam Madian lawman ripukurqa.+ Chayman chayaruspanñataqmi pozopa waqtanpi tiyaykurqa. 16 Chay Madian lawpim+ huk runa karqa qanchis warmi churiyuq, chay runaqa sacerdotem* karqa. Chay runapa churinkunam yaku wisinanku uchkuman chayarurqaku artesakunaman yakuta huntachiq, huntachirqakuqa taytankupa ovejankuna yakuta tomananpaqmi. 17 Ichaqa michiqkuna hamuruspanmi sapa kuti qarqusqankuman hina paykunata qarqururqa. Chayta qawaykuspanmi Moisesqa chay sipaskunata yanaparqa, hinaspam ovejankunamanpas yakuta tomachirqa. 18 Chay sipaskuna taytanku Reuelpa*+ kasqanman kutiruptinkuñataqmi taytanqa hukmanyasqallaña tapurqa: “¿Imanasqataq kay horallaqa kutiramunkichik?”, nispa. 19 Sipaskunañataqmi nirqaku: “Egiptomanta+ huk runam michiqkuna mana imanawanankupaq harkaykuwarqaku, yakutapas hurqupuwaspankum ovejanchikkunamanpas tomachirqa”, nispa. 20 Reuelñataqmi churinkunata nirqa: “¿Maypitaq chay runaqa kachkan? ¿Imanasqataq saqiramunkichikqa? Qayaramuychikyá ñuqanchikwan mikunanpaq”, nispa. 21 Chaynapim Moisesqa qipakurqa chaypiña yachananpaq*+ niptinku. Reuelqa Zipora sutiyuq warmi churinwanmi Moisesta casarachirqa. 22 Chaymanta qipatam Ziporaqa qari wawata wachakurqa, hinaptinmi Moisesqa suticharqa Guersonwan*,+ chaynataqa suticharqa: “Kaypiqa huklaw llaqtayuq runam kani”, nispam.+
23 Achka wata qipatañataqmi Egipto nacionta kamachiq wañururqa.+ Chaywanpas Israelpa mirayninkunaqa hinallam ñakarirqaku, chaymi sapa kuti rimapakuspa waqaqku hinaspa Diosta sapa punchaw qayakuqku.+ 24 Chaymanta qipakunatam Diosqa mañakusqankuta uyariykurqa,+ hinaspam yuyarirqa Abrahanwan, Isaacwan chaynataq Jacobwan contrato* ruwasqanta.+ 25 Chaynatamá Diosqa Israelpa mirayninkuna imayna tarikusqankuta qawarirqa hinaspa llakikurqa.