2 Samuel

3 Saulpa ayllunkunata yanapaqkunaqa unaymi Davidpa ayllunkunata yanapaqkunawan wañuchinakuypi karqaku. Davidqa kamachiq kaspanmi aswan riqsisqa karqa.+ Saulpa runankunañataqmi mana chaynachu karqaku.+

2 Chay punchawkunapim Davidpa qari churinkuna Hebron llaqtapi nacerqa.+ Piwi* churinpa sutinmi karqa Amnon.+ Amnonpa mamanmi karqa Jezreel llaqtayuq Ainoam.+ 3 Iskay kaq churinñataqmi karqa Kileab. Kileabpa mamanmi karqa Abigail.+ Abigailqa karqa Carmelo llaqtayuq Nabalpa viudanmi. Kimsa kaq churinñataqmi karqa Absalon.+ Absalonpa mamanmi karqa Maaca. Maacaqa karqa Guesur llaqtata kamachiq Talmaipa+ churinmi. 4 Tawa kaq churinñataqmi karqa Adonias.+ Adoniaspa mamanmi karqa Aguit. Pichqa kaq churinñataqmi karqa Sefatias. Sefatiaspa mamanmi karqa Abital. 5 Suqta kaq churinñataqmi karqa Itream. Itreampa mamanmi karqa Egla. Paykunam karqaku Hebron llaqtapi naceq Davidpa churinkuna.

6 Saulpa runankunaqa Davidpa runankunawanmi wañuchinakuyllapi karqaku. Abnerñataqmi+ Saulpa ayllunpi aswan riqsisqa rikurirurqa. 7 Saulpam karqa Rizpa sutiyuq+ huknin warmin, payqa karqa Aya sutiyuq runapa churinmi. Huk kutipim Abnerta Is-boset+ nirqa: “¿Imanasqataq qamqa taytaypa huknin warminwan puñukurqanki?”, nispa.+ 8 Abnerñataqmi Is-bosetpa chayna nisqanwan llumpayta piñakuruspan nirqa: “¿Ñuqaqa Juda ayllumanta allquchu kani? Kunankamam taytayki Saulpa ayllunkunataqa hinaspa kuyasqan runakunataqa yanapachkani*. Qamtaqa manataqmi Davidpa makinmanqa quykurqaykichu. ¿Chaychu warmiwan puñusqaymantapas rimapayawachkanki? 9 Jehova Diospa nisqanman hina Davidta mana yanapaptiyqa Diosyá castigawachun.+ 10 Diosmi nirqa Saulpa mirayninkuna manaña kamachinankumanta. Payqa nirqam Davidña Juda aylluta hinaspa Israelpi wakin ayllukunata kamachinanmanta. Kamachinanqa karqa Dan llaqtamanta Beer-seba llaqtakamam”, nispa.+ 11 Hinaptinmi Is-bosetqa manaña imatapas nirqachu Abnerta manchakusqanrayku.+

12 Abnermi Davidman willachimurqa: “¿Pipataq kay llaqtaqa?”, nispa. Willachimurqataqmi: “Contratotayá* ruwasunchik. Ñuqaqa tukuytam ruwasaq Israel runakunata kamachinaykipaq”, nispa.+ 13 Hinaptinmi Davidñataq nirqa: “Allinmi, contratotayá ruwasunchik. Ichaqa Saulpa churin Micaltam+ pusamuwanki. Manachayqa amam hamunkipaschu”, nispa. 14 Davidqa Saulpa churin Is-bosetmanmi+ runankunata kacharqa “warmiy Micalta kutichipuway. Paywan casarakunaypaqqa 100 Filistea runakunata wañuchispaymi qari kayninpa qarachanta aparqani” nispa nimunankupaq.+ 15 Chaymi Is-bosetqa Micalta qusan Paltielmanta qichurachimurqa. Paltielqa+ karqa Laispa churinmi. 16 Paltielqa warmin Micaltam waqastin qatirqa Baurim llaqtakama.+ Hinaptinmi Abner nirqa: “¡Kutiy!”, nispa. Chaymi Paltielqa kutikurqa.

17 Abnerñataqmi Israel llaqtapi lliw punta apaqkunaman willachimurqa: “Unayñam qamkunaqa munachkankichik David kamachiqnikichik kananta. 18 Chaynaqa, kamachiqnikichik kananpaqyá churaychik. Jehova Diosmi yupaychaqnin Davidta+ nirqa: ‘Qanwanmi Israel runaykunataqa Filistea runakunapa hinaspa lliw chiqniqnin runakunapa makinmanta librasaq’”, nispa. 19 Chaymantam Abnerqa Benjamin ayllu+ runakunawan rimarqa. Hinaspanmi Hebron llaqtata rirqa Israel runakuna hinaspa Benjamin ayllumanta kaqkuna ima tantiasqankumanta Davidman willamunanpaq.

20 Hebron llaqtaman Abner 20 runakunawan chayaruptinmi Davidqa achka mikuyta ruwachirqa paykunapaq. 21 Chaypim Abnerqa Davidta nirqa: “Taytáy, llapallan Israel runakunatayá huñuramusaq, chaynapi paykunawan contratota ruwaspayki kamachiqnin kanaykipaq”, nispa. Abnerta David aviaruptinmi hawkalla pasakurqa.

22 Abner pasakuptillanmi Joabqa Davidpa runankunapiwan chayaramurqa huk llaqtata yaykuspanku tukuy ima qichumusqankumanta. Abnerqa David aviaruptinmi Hebron llaqtamantaqa pasakurqaña. 23 Joabqa+ soldadokunapiwanmi Hebron llaqtaman chayaramurqaku, hinaptinmi willaykurqaku: “Nerpa+ churin Abnermi+ kamachiq Davidta watukuq hamururqa, hinaptinmi Davidqa hawkalla pasakunanpaq aviarurqa”, nispa. 24 Chaymi Joabqa Davidpa kasqanman yaykuspan nirqa: “¿Imatataq kayta ruwarunki? Abner hamuchkaptinqa, ¿imanasqataq hawkalla pasakunanpaq kachaykurqanki? 25 ¡Qamqa yachankim Abner imayna runa kasqantaqa! Chay runaqa sakrillañam, payqa hamurqa mayman risqaykitapas hinaspa ima ruwasqaykitapas qawaqmi”, nispa.

26 Davidpa kasqanmanta lluqsiruspanmi Joabqa Abnerta maskamunankupaq kamachirqa. Hinaptinmi Sira sutiyuq pozomantaña Abnerta kutirachimurqaku. Davidqa manamá imatapas yacharqachu. 27 Abnerta kutirachimuptinkum+ Joabqa sapallankupi rimanankupaq pusarurqa llaqtapa punkunpa uku lawninman. Chaypi kachkaptinkum Abnertaqa wiksanpi tuksirurqa, hinaptinmi wañururqa.+ Chaytaqa ruwarurqa wawqin Asaelta wañurachisqanraykum.+ 28 Chayta yacharuspanmi Davidqa nirqa: “Jehova Diospaqqa ñuqapas chaynataq kamachisqay runakunapas Abner wañusqanmantaqa mana huchayuqmi wiñaypaq kaniku.+ 29 Huchayuqqa kachun kikin Joabwan+ taytanpa wasinpi lliw kaqkunayá. ¡Joabpa miraynin qarikunayá qiya ispaywan+ utaq leprawan+ ñakarichunku, puchkaspayá llamkachunku*, espadawan wañuchisqa kachunku utaq yarqaymanta kachunku!”, nispa.+ 30 Joabwan wawqin Abisaimi+ Abnerta+ wañurachirqaku wawqinku Asaelta wañurachisqanrayku, Abnerqa Asaeltaqa wañurachirqa Gabaon llaqtapi peleasqankupim.+

31 Chaymantam Davidqa Joabta hinaspa chaypi kaq llapallan runakunata nirqa: “Pachaykichiktayá llikikuychik, qachqa pachawan hinakuspayá Abnermanta waqaychik”, nispa. Kamachiq Davidpas wañuqta apaptinkum qipanta rirqa. 32 Abnertaqa pamparurqaku Hebron llaqtapim. Davidqa qaparispanmi waqakurqa Abnerta pampasqankupa waqtanpi. Llapallan runakunapas waqakurqakum. 33 Davidmi Abner wañukusqanmanta takirqa:

“¿Imanasqataq Abnerqa wañurun mana yuyayniyuq hinaqa?

Mana allin runakunapa wañuchisqan hinam wañurunki”, nispa.+

Hinaptinmi llapallan runakuna kaqmanta waqakurqaku.

35 Chaymantam llapallan runakuna hamuspanku Davidta ruegarqaku manaraq tutaykuchkaptin mikunanpaq. Davidmi ichaqa nirqa: “¡Diosyá castigawachun manaraq inti siqaykuchkaptin tantata utaq imatapas mikuruptiyqa!”, nispa.+ 36 Llapallan runakunapaqmi chayqa allin rikchakurqa. Davidpa lliw ruwasqankunamá llapallan runakunapaq allin rikchakurqa. 37 Chaynapim Juda aylluwan Israel ayllukunaqa allinta yacharurqaku Abnerpa wañusqanmanta David mana huchayuq kasqanta.+ 38 Hinaptinmi kamachiq Davidqa runankunata nirqa: “Yachasqaykichikman hinam Israelpi kunan wañurun atiyniyuq hinaspa ancha riqsisqa runa.+ 39 Kamachiq kanaypaq akllasqa kaspaypas+ mana kallpayuq hinam kachkani. Zeruyapa+ wawankunaqa llumpay mana allin runakunam.+ Mana allin ruwaqmanqa Jehova Diosyá mana allin ruwasqanman hina kutichipuchun”, nispa.+