2 Samuel
1 Saulpa wañukusqan qipatam Davidqa Amalec runakunata wañuchisqanmanta kutimurqa, hinaspam Ziclag llaqtapi+ iskay punchaw karqa. 2 Paqarintin punchawmi Saulpa soldadonkunapa kasqanmanta huk runa chayaramurqa llikipasqallaña pachayuq hinaspa allpallaña umayuq. Chay runaqa Davidman asuykuspanmi qunqurakuykuspan pampakama kumuykurqa.
3 Hinaptinmi chay runata David nirqa: “¿Maymantataq hamuchkanki?”, nispa. Chaymi payñataq nirqa: “Israel soldadokunapa kasqanmantam ayqikaramuni”, nispa. 4 Davidñataqmi nirqa: “¿Imataq pasakurun? Ama hina kaspayá willaykuway”, nispa. Hinaptinmi chay runañataq willarqa: “Soldadokunam peleasqankumanta ayqikuspanku achkallaña wañurunku. Saulwan churin Jonatanpas wañurunmi”, nispa.+ 5 Chay willaqnin musutam David nirqa: “¿Imaynatataq qamqa yachanki Saulwan Jonatan wañurusqankutaqa?”, nispa. 6 Chay musuñataqmi nirqa: “Guilboa muqupi+ kachkaspaymi Saulta rikururqani lanzanman tawnapakuchkaqta, rikururqanitaqmi peleanapaq carretakunata chaynataq caballopi silladakunata payman asuykuchkaqta.+ 7 Qipanta qawarimuspanmi Saulqa rikuramuwarqa. Pay qayamuwaptinmi nirqani: ‘¿Imapitaq yanapaykiman?’, nispay. 8 Saulñataqmi tapuwarqa: ‘¿Pitaq kanki?’, nispa. Ñuqañataqmi nirqani: ‘Amalec kastamantam kani’, nispay.+ 9 Hinaptinmi niwarqa: ‘Llumpaytam ñakarichkani. Ama hina kaspayá wañurachiway’, nispa. 10 Chaymi wañuy patanpiña kasqanta qawaykuspay wañurachirqani.+ Taytáy, umanpi coronata chaynataq brazonpi pulserata hurquramuspaymi apamurqayki”, nispa.
11 Chayta willaykuptinmi Davidqa pachanta llikikurqa. Paywan kaqkunapas pachankutam llikikurqaku. 12 Davidwan runankunaqa qaparispam waqarqaku Saulmanta, churin Jonatanmanta, Jehova Diospa runankunamanta hinaspa Israel runakunamanta.+ Chaymi tutaykuqkama ayunarqaku.+
13 Chay willaqnin musutam David nirqa: “¿Maymantam kanki?”, nispa. Musuñataqmi nirqa: “Ñuqaqa kani Amalec kasta forastero runapa churinmi”, nispa. 14 Hinaptinmi David nirqa: “¿Imanasqataq Jehova Diospa akllasqan runa wañuchiyta mana manchakurqankichu?”, nispa.+ 15 Hinaspam huknin runanta qayaykuspan Davidqa nirqa: “Kay runata wañuchiy”, nispa. Hinaptinmi chay runanqa wañurachirqa.+ 16 Manaraq wañuchichkaptinmi Davidqa nirqa: “Wañuchisqaykimantam huchayuq kanki. Kikikipunim nirqanki: ‘Jehova Diospa akllasqan runatam wañurachini’”, nispa.+
17 Davidqa Saulwan churin Jonatan wañukuptinmi aya takita takirqa.+ 18 Hinaspam nirqa Juda ayllu runakunaman chay takita yachachinankupaq. “Flecha” sutiyuq chay aya takiqa Jasar sutiyuq libropim qillqasqa kachkan. Chay takim nin:+
19 “¡Ay Israel! Kuyayllapaq runaykikunam urqukunapi wañurun.+
¡Imaynamá kallpasapakunaqa wañurunqa!
20 Amayá Gat llaqtapiqa willakuychikchu.+
Amayá Asquelon llaqtapiqa willakuychikchu,
chaynapi Filistea runakunapa warmi churinku ama kusikunankupaq.
Chaynapi chay warmikuna* kusikuymanta ama pawaykachanankupaq.
21 Guilboa muqukuna,+
amayá sullapas nitaq parapas hawaykichikmanqa chayamuchunchu.
Amataqyá Diosman qunapaq kawsaykunapas chakrakunapiqa qispichunchu.+
Chay muqupim kallpasapakunapa harkachikunan qachachasqa karqa,
chaypim Saulpa harkachikunan aceitewan manaña tallisqa karqa.
22 Jonatanpa flechanwan Saulpa espadanmi
chiqniqnin runakunapa yawarninman chapukurun, soldadokunapa wiranman chapukurun.+
Chaykunawanmi wañuchiqkupuni.+
24 Israelpa warmi churinkuna, Saulmanta waqaychik.
Paymi pukawan hinaspa kuyayllapaq pachakunawan pachachisurqankichik.
Paymi qurimanta alaqakunata pachaykichikman churarqa.
25 ¡Imaynamá kallpasapakunaqa peleasqankupi wañurunku!
¡Jonatanmi urquykikunapi wañurun!+
26 Wawqilláy Jonatan, qanmantam llumpay llakisqa kachkani.
Anchatam kuyarqayki.+
Warmikunapa kuyakuyninmantapas astawanraqmi kuyawarqanki.+
27 ¡Imaynamá kallpasapakunaqa wañurunku!
¡Imaynamá peleanapaq kaqkunapas chinkarunqa!”, nispa.