2 Samuel
23 Davidqa kayllatañam takirqa:+
“Jeseypa churin Davidmi rimarillani,+
hatunchasqa runam rimarillani,+
Jacobpa Diosninpa akllasqanmi+
hinaspa Israel runakunapa takinkunata miskillataña takiqmi+ nillani.
‘Allinta ruwaspa kamachiqqa+
hinaspa Diosta manchakuspa kamachiqqa,+
4 inti lluqsimuptin kanchariq hinam,+
achikyamuptin mana puyuyuq punchaw hinam.
Para usyaruptin intipa kanchariynin
allpamanta pastokunata wiñarichimuq hinam’, nispa.+
5 Chaynam aylluykunapas Diospa qayllanpiqa.
Chaymi ñuqaqa imamantapas harkasqa hinaspa kusisqallaña tarikusaq,
¿manachu chayrayku Diosqa contrato ruwasqaykuta cumplinqa?+
6 Mana allin runakunam ichaqa kichka hina wischusqa kanku,+
kichkataqa manam pipas qala makinwanqa hapinmanchu.
7 Pipas huqariyta munaspanqa,
fierrowan utaq lanzapa kaspinwanmi huqarinan,
hinaspam maymi kasqanpi kañarunan”, nispa.
8 Davidpa kallpasapa soldadonkunam karqa:+ Joseb-basebet, payqa karqa Hacmoni kastamantam, hinaspapas paywan kaq iskay soldadokunapa kamachiqninmi karqa.+ Huk kutipim payqa 800 runakunata lanzanwan wañurachirqa. 9 Iskay kaqñataqmi karqa Eleazar,+ paypa taytanmi karqa Akokipa miraynin Dodo.+ Huk kutipim Filistea soldadokuna huñunakururqaku Israel soldadokunawan peleanankupaq. Chaypim Davidwan kallpasapa kimsa soldadonkuna Filistea soldadokunata piñachirqaku. Paykunamanta hukninmi karqa Eleazar. Chay kutipim Israel soldadokunaqa pasakurqaku. 10 Eleazarmi ichaqa mana suchurispan makinpas utinankama Filistea soldadokunata wañurachirqa. Chaymi makinpas espadaman laqakururqa.+ Jehova Diosmi chay punchaw yanaparqa Filistea soldadokunata wañuchinankupaq.+ Chaymantam soldadokunaqa Eleazarpa qipanta rirqaku wañuqkunapa tukuy imanta apakunankupaq.
11 Kimsa kaqñataqmi karqa Sama. Payqa karqa Harar lawmanta Aguepa churinmi. Huk kutipim Filistea soldadokuna Lei lawpi lenteja tarpusqa chakrapi huñunakururqaku, chay kutipipas Israel soldadokunaqa Filistea soldadokunamantam ayqikururqaku. 12 Samam ichaqa mana suchurispan chakrata mana hapikuykunankupaq Filistea soldadokunata wañurachirqa. Chaynatam Jehova Diosqa Israel runakunata yanaparqa.+
13 Davidmi Adulam machaypi kachkarqa,+ hinaptinmi kimsa soldadokuna cosecha tiempopi Davidta qawaq rirqaku, paykunaqa karqaku 30 kamachiqkunamanta wakinmi. Filistea soldadokunamanta wakiqnin tropam Refaim pampapi carpankuta sayarachirqaku.+ 14 Davidqa pakakusqanpim kachkarqa,+ wakin Filistea soldadokunañataqmi Belen llaqtapi kachkarqaku. 15 Davidqa Belenpi miski yakuta yuyariruspanmi nirqa: “¡Amalaya Belen llaqtapa punkunpi pozomanta yakuchata tomaykuyman!”, nispa. 16 Hinaptinmi kimsa kallpasapa soldadonkuna peleastin Filistea soldadokunapa kasqanman yaykururqaku. Paykunaqa Belen llaqtapa punkunpi pozomanta yakuta hurquruspankum Davidman aparqaku. Davidmi ichaqa mana munaspan Jehova Diospaq tallirurqa.+ 17 Paymi nirqa: “Jehova Dioslláy, ¡manam tomaymanchu wañuyman churakuspanku apamusqanku yakutaqa!+ Chayqa kanman yawarninkutapas tomay hinam. ¡Manamá chaytaqa haykapipas ruwaymanchu!”, nispa. Chaymi mana munarqachu. Davidpa chay kimsa kallpasapa soldadonkunamá tukuy chaykunata ruwarqaku.
18 Abisaipas+ sapaq iskay kallpasapa soldadokunapa kamachiqninmi karqa. Abisaiqa karqa Joabpa wawqinmi, iskayninkum karqaku Zeruyapa+ wawankuna. Abisaiqa 300 runakunatam lanzanwan wañurachirqa. Paypas chay kimsa kallpasapa soldadokuna hinam riqsisqa karqa.+ 19 Abisaiqa paywan kaq iskay soldadokunamantaqa aswan riqsisqam karqa, hinaspapas paykunapa kamachiqninmi karqa. Chaywanpas Abisaiqa manam punta kaq kallpasapa kimsa soldadokuna hinachu tukuyta ruwarqa.
20 Benayaqa+ mana manchakuqmi karqa, payqa karqa Jeoyadapa churinmi. Benayaqa Kabzeel llaqtapim+ tukuyta ruwarqa. Moab llaqtayuq Arielpa iskay churinkunatam wañurachirqa. Huk kutipiñataqmi lastamuchkaptin pozoman yaykuruspan leonta wañurachirqa.+ 21 Benayaqa wañurachirqataqmi Egipto nacionniyuq hatunkaray runatapas. Payqa kaspiyuqllam karqa, Egipto runañataqmi lanzayuq. Chaywanpas lanzanta qichuruspanmi wañurachirqa. 22 Tukuy chaykunatam Jeoyadapa churin Benaya ruwarqa. Payqa kimsa kallpasapa soldadokuna hinam riqsisqa karqa. 23 Benayaqa 30 soldadokunamanta aswan allin kachkaspanpas, manam kimsa kallpasapa soldadokuna hinachu tukuyta ruwarqa. Chaywanpas Davidqa kikinta waqaychaq soldadokunapa kamachiqnin kananpaqmi Benayataqa churarurqa.
24 Joabpa wawqin Asaelpas+ 30 soldadokunamanta hukninmi karqa. Karqakum Belen llaqtayuq Dodopa churin Elanan,+ 25 Harod lawmanta Sama, Harod lawmanta Elica, 26 Bet-pelet llaqtayuq Helez,+ Tekoa llaqtayuq Ikespa churin Ira,+ 27 Anatot llaqtayuq+ Abi-ezer,+ Husa llaqtayuq* Mebunai, 28 Zalmon sutiyuq Akoki runa, Netofa llaqtayuq Maarai,+ 29 Netofa llaqtayuq Baanapa churin Heleb, Ribaipa churin Itai. Ribaiqa karqa Benjamin ayllupi Guibea llaqtamantam. 30 Piraton llaqtayuq Benaya,+ Gaas wayqupi+ yachaq* Hidai, 31 Bet-araba llaqtayuq Abi-albon, Baurim llaqtayuq Azmavet, 32 Saalbim runakunamanta Eliaba, Jasenpa churinkuna, Jonatan, 33 Harar lawmanta Sama, Harar lawmanta Sararpa churin Ayam, 34 Aasbaipa churin Elifelet. Aasbaiqa karqa Maacat lawmanta runapa churinmi. Guilo llaqtayuq Aitofelpa+ churin Eliam, 35 Carmelo llaqtayuq Hezro, Arab llaqtayuq Paarai, 36 Zoba lawmanta Natanpa churin Igal, Gad llaqtayuq Bani, 37 Ammon kasta Zelec, Beerot llaqtayuq Naqarai, payqa karqa Zeruyapa wawan Joabpa harkachikunanta apaq runam, 38 Ira sutiyuq Itri runa, Gareb sutiyuq Itri runa+ 39 hinaspa Het kasta Urias.+ Llapankum karqaku 37 soldadokuna.