2 Reyes
21 Manasesqa+ 12 watanpi kachkaspam kamachiyta qallaykurqa, Jerusalenmantam Juda nacionta kamachirqa 55 wata.+ Mamanpa sutinmi karqa Epziba. 2 Manasesqa Israel runakunapa qayllanmanta Jehova Diospa qarqusqan runakunata qatipakuspanmi+ Jehova Diospa chiqnisqan kaqkunata ruwarqa.+ 3 Taytan Ezequiaspa chinkachisqan yupaychana patakunatam kaqmanta ruwarachirqa.+ Baal taytachapaq altarkunatapas ruwarurqam. Chaymantapas Israel nacionta kamachiq Acab hinam+ yupaychanapaq kulluta sayarachirqa.+ Manasesqa hanaq pachapi intita, killata hinaspa lucerokunatam qunqurakuspan yupaycharqa.+ 4 “Jerusalen llaqtapim sutiyta riqsichisaq” nispa Jehova Dios nichkaptinpas,+ Manasesqa Jehova Diospa wasinpim altarkunata ruwarurqa.+ 5 Jehova Diospa wasinpa iskaynin pationpipas+ ruwarurqam hanaq pachapi kaqkunapaq altarkunata.+ 6 Manasesqa churintapas kañarqam. Chaymantapas layqa ruwaq chaynataq imatapas yachaqtukuqmi karqa,+ hinaspapas qayaqkunatawan qawaqkunatam churarurqa.+ Payqa Jehova Diospa chiqnisqan kaqkunata llumpayta ruwaspanmi piñachirqa.
7 Yupaychanapaq llaqllachisqan kullutapas+ Jehova Diospa wasinpim churarurqa. Chay wasinmantam Diosqa Davidmanwan churin Salomonman nirqa: “Kay wasipi hinaspa Jerusalen llaqtapim wiñaypaq sutiyta riqsichisaq.+ Israel ayllupi lliw llaqtakunamantam Jerusalen llaqtata akllakurqani. 8 Israel runaykunaqa ñawpaq abuelonkuman qusqay allpamantaqa manam haykapipas qarqusqachu kanqaku.+ Chaynam kanqa yupaychawaqniy Moisesman qusqay lliw kamachikuykunata kasukuptinkuqa”, nispa.+ 9 Ichaqa manam kasukurqakuchu. Manasesqa paykunataqa astawanraqmi pantachirqa. Israel runakunapa qayllanmanta Jehova Diospa chinkachisqan runakunamantapas aswan mana allintaraqmi ruwachirqa.+
10 Chaymi Jehova Diosqa willakuqninkunawan*+ runakunaman willachirqa: 11 “Juda nacionta kamachiq Manasesqa millakuypaq kaqkunatam ruwarun. Ñawpaq Amorreo runakunamantapas aswan mana allintaraqmi payqa ruwarun,+ hinaspapas millakuypaq taytacha-mamachakuna ruwachisqanwanmi Juda nacionniyuq runakunata huchallirachin. 12 Chayraykum Israel runakunapa yupaychasqan ñuqa Jehova Dios nini: ‘Juda nacionman hinaspa chaypi kaq Jerusalen llaqtamanmi ñakariyta apamusaq,+ pipas chaymanta uyariqqa mancharikunqaraqmi.+ 13 Samaria+ llaqtatawan Acabpa mirayninkunata castigasqayman hinam+ Jerusalen llaqtatapas castigasaq.+ Jerusalen llaqtataqa tazonta sumaqta mayllaspa pakchachkaq hinam mana imayuqta saqirusaq.+ 14 Israel runaykunamanta+ puchuq Juda naciontam chiqniqnin runakunaman quykusaq, hinaptinmi tukuy imankuta qichuspa apakunqaku.+ 15 Paykunaqa piñachiwanankupaqmi chiqnisqay kaqkunata ruwachkanku. Chaytaqa ruwachkanku Egipto nacionmanta ñawpaq abuelonkupa lluqsimusqan punchawmanta kunankamam’”, nispa.+
16 Manasesqa mana huchayuq achka runakunatam wañurachirqa Jerusalen llaqtapa cantonmanta cantonkama.+ Chaymantapas Jehova Diospa chiqnisqan kaqkunatam Juda nacionniyuq runakunata ruwachirqa. 17 Manasespa imayna kawsakusqanmanta, tukuy ima ruwasqanmanta hinaspa mana allinkuna ruwasqanmantaqa Juda nacionta kamachiqkunamanta willakuq libropim qillqasqa kachkan. 18 Chaymantam Manasesqa wañukurqa, hinaptinmi pamparurqaku wasinpi kaq huertapi, chay huertaqa karqa Uza sutiyuq runapam.+ Chaymi churin Amonña kamachirqa.
19 Amonqa+ 22 watanpi kachkaspam kamachiyta qallaykurqa, Jerusalen llaqtamantam Juda nacionta iskay wata kamachirqa.+ Mamanpa sutinmi karqa Mesulemet, payqa karqa Jotba llaqtayuq Haruzpa churinmi. 20 Amonqa taytan Manases hinam+ Jehova Diospa chiqnisqan kaqkunata ruwarqa. 21 Taytan hinam mana allinkunata ruwarqa. Taytanpa yupaychasqan millakuypaq taytacha-mamachakunatam paypas yupaycharqa, hinaspapas chaykunapa ñawpaqninpim qunqurakurqa.+ 22 Ñawpaq abuelonkunapa yupaychasqan Jehova Diostam saqirurqa, manam Jehova Diospa munasqanman hinachu kawsarqa.+ 23 Kamachiq Amontam runankuna qipancharuspanku wasinpi wañurachirqaku. 24 Llapallan runakunañataqmi kamachiq Amonta qipanchaqkunata wañurachirqaku. Hinaspankum churin Josiastaña kamachiq kananpaq churarurqaku.+ 25 Amonpa imayna kawsakusqanmanta hinaspa imakuna ruwasqanmantaqa Juda nacionta kamachiqkunamanta willakuq libropim qillqasqa kachkan. 26 Kamachiq Amontam pamparurqaku Uza sutiyuq runapa huertanpi,+ hinaptinmi churin Josiasña+ kamachirqa.