2 Reyes
22 Josiasqa+ pusaq watachayuqllam kamachiyta qallaykurqa, Jerusalen llaqtamantam Juda nacionta kamachirqa 31 wata.+ Mamanpa sutinmi karqa Jedida. Jedidaqa karqa Bozkat+ llaqtayuq Adayapa churinmi. 2 Josiasqa ñawpaq abuelon David hinam Jehova Diospa munasqanman hina kawsakurqa.+ Diospa kamachikuyninkunataqa lliwtam kasukurqa.
3 Josias 18 wataña kamachichkaspanmi secretarion Safanta kamachirqa Jehova Diospa wasinta rinanpaq.+ Safanqa karqa Azaliaspa churinmi, Azaliasñataqmi karqa Mesulampa churin. Safantam Josias nirqa: 4 “Sacerdotekunapa kamachiqnin Hilkiaspata+ riy, payyá huqarichun Jehova Diospa wasinman apasqanku lliw qullqita,+ chay qullqiqa runakunamanta punkupi kaqkunapa chaskisqankum.+ 5 Chay qullqitam chaskinqa Jehova Diospa wasinta allichachiqkuna,+ paykunañataqmi Jehova Diospa wasinpi llamkaqkunaman* qunqa. 6 Chay llamkaqkunaqa rumita llaqllaqkunam, carpinterokunam hinaspa pirqaqkunam. Chay qullqiwanmi rantinqaku Diospa wasinta allichanankupaq tablakunata hinaspa llaqllasqa rumikunata.+ 7 Qullqi chaskiqkunaqa confianza runakunam,+ amam tapunkichikñachu chay qullqiwan ima ruwasqankumantaqa”, nispa.
8 Chaymantam sacerdotekunapa kamachiqnin Hilkiasqa secretario Safanta+ nirqa: “Jehova Diospa wasinpim tariruni kamachikuykunamanta rimaq librota”, nispa.+ Hinaspanmi chay librota Safanman quykurqa, payñataqmi leerqa.+ 9 Chaymantam Safanqa kamachiq Josiaspata rispan nirqa: “Runaykikunaqa Diospa wasinmanta qullqitaqa huqarirunkuñam, hinaspankum Jehova Diospa wasinta allichachiqkunaman quykunku”, nispa.+ 10 Secretarion Safanqa nirqataqmi: “Sacerdote Hilkiasmi librota+ quykuwan”, nispa. Chaynata nispanmi kamachiq Josiaspaq chay librota leepurqa.
11 Kamachikuykunamanta rimaq libropa ima nisqanta leeykapuptinmi Josiasqa pachanta llikchikururqa.+ 12 Hinaspanmi sacerdote Hilkiasta, Safanpa churin Aicamta,+ Micayapa churin Acborta, secretarion Safanta hinaspa yanapaqnin Asayata kamachirqa: 13 “Rispaykichikyá Jehova Diosta tapumuychik kay tarisqaykichik libropa ima nisqanmanta. Tapumuychiktaqyá ñuqamantapas, runakunamantapas chaynataq Juda nacionmantapas. Ñawpaq abuelonchikkunaqa manam kay libropa nisqantaqa kasukurqakuchu. Manamá llaqtanchikpaq qillqasqa kamachikuykunataqa kasukurqakuchu, chaymi Jehova Diosqa ñuqanchikpaq llumpay piñasqa kachkan”, nispa.+
14 Chaymi sacerdote Hilkiasqa, Aicamqa, Acborqa, Safanqa hinaspa Asayaqa Diosmanta willakuq+ Hulda sutiyuq warmipata rirqaku. Payqa karqa pachakunata waqaychaq Salumpa warminmi. Salumqa karqa Tikvapa churinmi, Tikvañataqmi karqa Haraspa churin. Huldaqa yacharqa* Jerusalen llaqtapa musuq barrionpim, chaypim paywan rimarqaku.+ 15 Huldam tapukuq riqkunata nirqa: “Israelpa yupaychasqan Jehova Diosmi nin: ‘Kamachimusuqnikichik runatayá nimuychik: 16 “Jehova Diosmi nin: ‘Juda nacionta kamachiq librota leesqanman hinam+ kay llaqtaman hinaspa kay llaqtapi yachaqkunaman ñakariyta chayachimusaq. 17 Saqiwasqankurayku hinaspa ñuqata piñachiwanankupaq+ taytacha-mamachakunapaq kañaspa qusnichisqankuraykum+ kay llaqtapaq piñasqalla kasaq’”, nispa.+ 18 Ñuqa Jehova Diosta tapuwanaykichikpaq kamachimusuqnikichik Josiastayá nimuychik: “Israelpa yupaychasqan Jehova Diosmi nin: ‘Leepususqaykitam qamqa uyarirqanki. 19 Chaymantapas kay llaqtamanta hinaspa kay llaqtapi yachaqkunamanta libropi ñuqa Jehova Diospa ima nisqayta uyariykuspaykim sunquykipi llakikurqanki, hinaspapas humillakuykurqankim.+ Chay libropim nirqani llaqtapi runakuna ñakarispanku manchakuywan kanankumanta. Chayta uyariykuspaykim qamqa pachaykita llikchikuspa+ waqarqanki, chaymi mañakusqaykita uyariykuyki. Ñuqa Jehova Diosmi chaynata nini. 20 Chaymi wañukunaykikamaqa kay llaqtaman ñakariykuna apamusqaytaqa mana rikunkichu, hawka punchawkunapim pampakunkipas’”’”, nispa. Chaytam kamachiq Josiasman willamurqaku.