2 Reyes
5 Naamanmi karqa Siria nacionta kamachiqpa soldadonkunapa kamachiqnin. Naamanqa ancha riqsisqa hinaspa kamachiqpa kuyasqanmi karqa. Paywanmi Jehova Diosqa Siria runakunata peleaypi yanaparqa. Naamanqa allin peleaqmi karqa, ichaqa lepra unquymi hapirurqa. 2 Siria soldadokunam Israel runakunawan peleaspan warmi warmachata apakurqaku, hinaptinmi Naamanpa warminta servirqa. 3 Chay warmacham patronanta nirqa: “¡Amalaya patronniy rirunman Samaria llaqtapi Diosmanta willakuqman*!+ Payqa hampirunmanmi lepra unquyninmantaqa”, nispa.+ 4 Hinaptinmi payqa* kamachiqman willarqa chay warmachapa ima nisqanta.
5 Chaymi Siria nacionta kamachiqqa Naamanta nirqa: “¡Kunallanyá riruy! Israel nacionta kamachiqmanmi cartata apachisaq”, nispa. Chaymi Naamanqa rirqa 342 kilo* qullqita, 6.000 qurita* hinaspa chunka pachakunata aparikuspan. 6 Israelta kamachiqman apasqan cartapim nirqa: “Kay carta apamusuqnikim yanapaqniy Naaman, paytam kachamuyki lepra unquyninmanta allinyaykachinaykipaq”, nispa. 7 Cartata leeruspanmi Israelta kamachiqqa pachanta llikikuspan nirqa: “¿Ñuqaqa Dioschu kani pitapas wañuchinaypaq utaq kawsachinaypaq?+ Kachamuwachkanqa manam lepra unquyninmanta hampinaypaqchu, aswanqa ñuqawan peleayta munaspanmi”, nispa.
8 Ichaqa Diospa runan Eliseom yacharurqa Israelta kamachiqqa pachanta llikikurusqanta, hinaspanmi willachimurqa: “¿Imanasqataq pachaykita llikikurunki? Ama hina kaspayá chay runata niykuy ñuqaman hamunanpaq. Chaynapim yachanqa Israelpi Diosmanta willakuq kasqanta”, nispa.+ 9 Chaymi Naamanqa Eliseopata rirqa caballonkunawan hinaspa peleananpaq carretankunawan, hinaspanmi sayarurqa Eliseopa wasin punkupi. 10 Eliseom ichaqa willachirqa: “Jordan mayupiyá qanchis kutikama+ bañakaramuy.+ Chaynapim lepra unquynikimantaqa allinyarunki”, nispa. 11 Chaynata niykuptinmi lepra unquyniyuq Naamanqa piñakuspan kaynata nistin pasakurqa: “Ñuqaqa nirqani: ‘Lluqsiykamuspanchiki makinta haywarispan hampiykuwananpaq Jehova Diosninta qayakunqa’, nispaymi. 12 ¿Manachu Damasco+ llaqtapi Abana hinaspa Farpar mayukuna aswan allin Israelpi mayukunamantaqa? ¿Manachu chay mayukunapi bañakaramuspay allinyaruyman?”, nispa. Chaynata nispanmi piñasqa kutikurqa.
13 Chaymantam runankuna asuykuspanku Naamanta nirqaku: “Taytáy, sichu Diosmanta willakuq runa sasa ruwanata kamachisuptikiqa kasukuwaqmi karqa. Chaynaqa, ‘bañakaramuspaykim allinyarunki’ nichkaptillanqa kasukuyá”, nispa. 14 Chaymi Naamanqa Jordan mayuman rispan qanchis kutikama bañakururqa Eliseopa nisqanman hina.+ Hinaptinmi Naamanqa unquyninmanta allinyarurqa,+ cuerponpas wawapa hinaraqmi rikurirurqa.+
15 Chaymantam Naamanqa soldadonkunapiwan Eliseoman kutirqa,+ hinaspanmi nirqa: “Kunanmi yachani Israelpi Dios hinaqa mana maypipas kasqanta.+ Taytáy, ama hina kaspayá kay apamusqayta chaskiykullaway”, nispa. 16 Eliseoñataqmi nirqa: “Yupaychasqay Jehova Diospa sutinpim niki, manam chaskikimanchu”, nispa.+ Hikutaptinpas Eliseoqa manam chaskikurqachu. 17 Hinaptinmi Naamanqa Eliseota nirqa: “Chaynaqa, kaymanta allpata apakunaypaqyá iskay mulapa apananta quykuway. Ñuqaqa manañam taytachakunapaqqa imatapas kañapusaqñachu nitaq imatapas qusaqñachu, aswanqa Jehova Diosllapaqñam. 18 Ichaqa Jehova Diosyá pampachaykuwachun. Kamachiqniymi Rimon taytachapa wasinta rin. Chaypi qunqurakunanpaqmi makiyman tawnapakun, chaymi ñuqapas Rimon taytachapa wasinpi qunqurakunay. Chaynata ruwaptiyqa Jehova Diosyá pampachaykullawachun”, nispa. 19 Chaynata niptinmi Eliseoñataq nirqa: “Qamñayá allinlla”, nispa. Hinaptinmi Naamanqa pasakurqa. Karuniqtaña richkaptinmi 20 Eliseopa yanapaqnin+ Gueaziqa+ sunqunpi nirqa: “Eliseoqa yanqam mana chaskikunchu Naamanpa+ apamusqantaqa. Jehova Diospa sutinpim nini, kallpaylla* hayparuspaymi imallatapas mañakaramusaq”, nispa. 21 Chaymi Naamanta haypananpaq Gueaziqa kallparqa. Naamanqa kallpaqta rikuramuspanmi carretanmanta bajaykuspan taripamurqa, hinaspam nirqa: “¿Imam pasarun?”, nispa. 22 Gueaziñataqmi nirqa: “Manam imapas. Yanapasqay Eliseom kachamuwarqa: ‘Efrain ayllukunapa urqunmantam Diosmanta willakuq* iskay musukuna chayaramuwan. Ama hina kaspaykiyá 34 kilo masnin* qullqitawan iskay pachata quykapamuway’”, nispa.+ 23 Chaymi Naamanqa nirqa: “Kay 68 kilo masnin* qullqita apaspaykiyá kutiy”, nispa. Apananpaq hikutaspanmi+ Naamanqa iskay costalkunaman hinaykurqa iskay wayqa qullqitawan iskay pachata. Hinaptinmi iskay runankuna Gueazipa ñawpaqninta aparqaku.
24 Ofel muquman* chayaruspanmi Gueaziqa costalkunata chaskiykuspan wasi ukuman churaykurqa, hinaspam chay runakunata aviarurqa. Paykuna pasakuptinkum 25 Eliseopa kasqanman yaykururqa. Hinaptinmi Eliseoqa nirqa: “Gueazi, ¿maytataq rirqanki?”, nispa. Payñataqmi nirqa: “Manam maytapas rirqanichu”, nispa.+ 26 Eliseoñataqmi nirqa: “¿Manachu yacharqani chay runapa qipanta risqaykita hinaspa carretanmanta bajaykuspan taripamususqaykita? Manam qullqita, pachata, ovejakunata, vacakunata, llamkaqkunata hinaspa aceitunastawan uvas huertakunata chaskinapaq punchawchu.+ 27 Naamanpa+ lepra unquyninwanmi qampas chaynataq miraynikikunapas mana tukuyta unqunkichik”, nispa. Chaymi Gueaziqa Eliseopa ñawpaqninmanta riti hina yuraqllaña leprayuq lluqsirurqa.+