2 Reyes
14 Israel nacionta kamachiq Jehoacazpa churin Jehoas+ iskay wataña kamachichkaptinmi Jehoaspa churin Amasias Juda nacionta kamachiyta qallaykurqa. 2 Amasiasqa 25 watanpim kamachiyta qallaykurqa, payqa Jerusalen llaqtamantam 29 wata kamachirqa. Mamanmi karqa Jerusalen llaqtayuq Joadin.+ 3 Amasiasqa Jehova Diospa munasqanman hinam allin kaqkunata ruwarqa, ichaqa manam ñawpaq abuelon David hinachu.+ Amasiasqa taytan Jehoaspa ruwasqantam qatipakurqa.+ 4 Yupaychanapaq ruwasqa muqukunatam ichaqa mana chinkachirqachu,+ chaymi runakunaqa chay muqukunapi hinalla animalkunata kañaspanku qusnichiqku.+ 5 Lliw Juda nacionta munaychakuruspanmi Amasiasqa taytan wañuchiq runankunata wañurachirqa.+ 6 Ichaqa Jehova Diospa kamachisqanman hinam mana wañuchirqachu wañuchiq runakunapa churinkunataqa. Moisespa qillqasqan kamachikuypim nirqa: “Amam churinkunapa huchanmantaqa taytantaqa wañuchinkichikchu, amataqmi taytanpa huchanmantapas churinkunataqa wañuchinkichikchu. Sapakamam huchankumantaqa wañunanku”, nispa.+ 7 Amasiasmi 10.000 Edom runakunata+ Kachi sutiyuq wayqupi+ wañurachirqa, peleaspantaqmi Sela llaqtata munaychakururqa.+ Hinaspanmi sutinta churarqa Jocteel nispaña, chaynam sutin kunankamapas.
8 Chaymantam Amasiasqa willakuqkunata kacharqa Israel nacionta kamachiq Jehoasman. Amasiasqa Jehoasmanmi willachimurqa: “Hamuyá peleananchikpaq”, nispa.+ Jehoasqa karqa Jehoacazpa churinmi, Jehoacazñataqmi karqa Jehupa churin. 9 Hinaptinmi kamachiq Jehoasqa kamachiq Amasiasman willachimurqa: “Libano lawpi kichkayuq quram cedro sachaman willachimurqa: ‘Warmi churikitayá qari churiywan casarachisun’, nispa. Ichaqa chay kichkayuq quratam purun animal saruparurqa. 10 Qamqa Edom runakunata wañurachispaykim+ hatuntukuchkanki, chaywan alabakuspaykiyá hawkalla wasikipi kakuy. ¿Imapaqtaq ñuqawan peleayta munanki qampas chaynataq Juda runakunapas llakipi tarikunaykichikpaq?”, nispa. 11 Chaywanpas Amasiasqa manam kasukurqachu.+
Chaymi Israel nacionta kamachiq Jehoasqa Juda nacionta kamachiq Amasiaswan pelearqa. Pelearqaqa Juda nacionpi+ Bet-semes llaqtapim.+ 12 Juda runakunata Israel runakuna venceruptinmi wasinkuman llapallanku lluptikurqaku. 13 Israel nacionta kamachiq Jehoasmi Juda nacionta kamachiq Amasiasta Bet-semes llaqtapi hapirurqa. Amasiasqa karqa Jehoaspa churinmi, Jehoasñataqmi karqa Ocoziaspa churin. Chaymantam Jerusalen llaqtaman rirqaku, chaypim Jehoasqa llaqtapa pirqanta 178 metrota* tuñirachirqa. Tuñirachirqaqa Efrain punkumanta+ Esquina sutiyuq punkukamam.+ 14 Jehoasqa apakurqam Jehova Diospa wasinpi chaynataq kamachiqpa wasinpi llapallan qurita, qullqita hinaspa tukuy imata. Chaymantapas Jehoasqa runakunatam presochasqata pusaspan Samaria llaqtaman kutikurqa.
15 Kamachiq Jehoaspa imayna kawsakusqanmanta, imakuna ruwasqanmanta hinaspa munayniyuq kasqanmantaqa Israel nacionta kamachiqkunamanta willakuq libropim qillqasqa kachkan. Chaypitaqmi qillqasqa kachkan Juda nacionta kamachiq Amasiaswan imayna peleasqanmantapas. 16 Jehoas wañukuptinmi pamparurqaku Israel nacionta kamachiqkunapa pampakusqan Samaria llaqtapi.+ Hinaptinmi churin Jeroboanña+ kamachirqa.
17 Israel nacionta kamachiq Jehoas wañukusqanmantam Juda nacionta kamachiq Amasiasqa+ 15 wataraq kawsakurqa. Jehoasqa+ karqa Jehoacazpa churinmi,+ Amasiasñataqmi Jehoaspa churin. 18 Amasiaspa imayna kawsakusqanmantaqa Juda nacionta kamachiqkunamanta willakuq libropim qillqasqa kachkan. 19 Jerusalenpi kaqkunam Amasiasta wañurachiyta munarqaku,+ hinaptinmi Amasiasqa Lakis llaqtaman ayqikurqa. Ichaqa wakin runakunam qatispanku Lakis llaqtapi wañurachirqaku. 20 Chaymantam Amasiastaqa caballowan Jerusalen llaqtaman aparqaku, hinaspankum pamparurqaku ñawpaq abuelonkunapa pampakusqan Davidpa llaqtan sutiyuq llaqtapi.+ 21 Hinaptinmi llapallan Juda runakuna Amasiaspa churin Azariastaña*+ kamachiq kananpaq churarqaku,+ Azariasqa karqa 16 watanpim.+ 22 Taytan Amasias wañukuptinmi+ Azariasqa Elat llaqtata+ kaqmanta hatarichirqa, hinaptinmi Elat llaqtaqa kaqmanta Juda nacionpaq karqa.
23 Juda nacionta Jehoaspa churin Amasias 15 wataña kamachichkaptinmi Jehoaspa churin Jeroboan+ Samaria llaqtamanta Israel nacionta kamachiyta qallaykurqa. Jeroboanqa kamachirqa 41 watam. 24 Jeroboanqa Jehova Diospa chiqnisqan kaqkunatam ruwarqa, hinaspapas Israel runakunata huchallichiq Nebatpa churin Jeroboan hinam mana allinkunata ruwarqa.+ 25 Jeroboanmi Israel nacionpa linderonta kutichikurqa Lebo-hamatmanta*+ Araba lawpi quchakama*.+ Chaynaqa karqa Israelpa yupaychasqan Jehova Diospa willachisqanman hinam, willachirqaqa Gat-hefer+ llaqtayuq Jonaswanmi.+ 26 Jehova Diosmi Israel runakunapa llumpay ñakarisqankuta qawarqa.+ Manam pipas Israel runakunataqa yanaparqachu, manataqmi wakchakunapas karqachu yanapananpaqqa. 27 Chaywanpas Jehova Diosqa willachirqañam Israel sutiqa mana chinkachisqa kananmanta.+ Chaymi Diosqa Israel runakunata Jehoaspa churin Jeroboanwan yanaparqa.+
28 Kamachiq Jeroboanpa imayna kawsakusqanmanta, tukuy ima ruwasqanmanta, munayniyuq kasqanmanta hinaspa imayna peleasqanmantaqa Israel nacionta kamachiqkunamanta willakuq libropim qillqasqa kachkan. Chaypitaqmi qillqasqa kachkan Damasco llaqtata+ chaynataq Hamat llaqtata Juda nacionman hinaspa Israel nacionman imayna kutichisqanmantapas.+ 29 Jeroboan wañukuptinmi pamparurqaku Israel nacionta kamachiqkunapa pampakusqanpi. Hinaptinmi churin Zacariasña+ kamachirqa.