1 Cronicas
13 Davidmi rimarqa 1.000 runakunata kamachiqkunawan, 100 runakunata kamachiqkunawan chaynataq wakin kamachiqkunawanpas.+ 2 Hinaspanmi Israel runakunata nirqa: “Qamkunapaq allin rikchakusuptikichikqa, Jehova Diospaqpas allin kaptinqa ñuqanchikman hukllawakamunankupaqyá Israel nacionpi lliw ayllukunaman willachimusunchik. Willachimusunchiktaqyá sacerdotekunamanpas, pastosapa llaqtakunapi yachaq* Leviy ayllukunamanpas.+ 3 Chaynapi Diospa baulninta+ kutichimunanchikpaq”, nispa. Chay baultaqa Saulpa kawsasqan punchawkunapiqa manam waqaycharqakuchu.+ 4 Davidpa nisqanta allinpaq hapispankum Israel runakunaqa “allinmi” nirqaku. 5 Chaymi Davidqa Egipto mayumanta Lebo-hamat llaqtakama*+ yachaq Israel runakunata huñururqa. Chaynapi Kiryat-jearim llaqtamanta Diospa baulninta apamunankupaq.+
6 Davidwan llapallan Israel runakunam Juda ayllupi Kiryat-jearim utaq Baala llaqtaman rirqaku.+ Chaynapi querubin angelkunapa hawanpi* tiyaq Jehova Diospa baulninta chay llaqtamanta apamunankupaq.+ Chay baulmanmi runakuna asuykuqku Diosta mañakunankupaq. 7 Diospa baulnintaqa musuq carretapim+ Abinadabpa wasinmantaqa apamurqaku. Chay carretataqa apamurqaku Uzawan Aiom.+ 8 Davidwan Israel runakunaqa Diosta hatunchastinmi hamurqaku. Hamurqakuqa arpakunapa, panderetakunapa,+ platillokunapa,+ cornetillakunapa,+ cuerdayuq kaqkunapa waqasqanwan takispa tusustinmi. 9 Kidon sutiyuq iraman chayaramuptinkum Diospa baulninta aysaq torokuna urmarurqa, Uza sutiyuq runañataqmi baulta hapirurqa. 10 Baulta hapirusqanraykum Jehova Diosqa Uzapaq llumpayta piñakuruspan wañurachirqa.+ Hinaptinmi Uzaqa Diospa qayllanpi wañururqa.+ 11 Llumpayta piñakuspan Uzata Jehova Dios wañurachiptinmi Davidqa hukmanyarurqa. Chayraykum chay sitiota sutichanku “Perez-uza*” nispa.
12 Diosta manchakuspanmi Davidqa chay punchaw nirqa: “¿Imaynatataq Diospa baulnintaqa apayman?”, nispa.+ 13 Davidqa manam Diospa baulnintaqa yachasqan llaqtamanchu apamurqa. Chaymi Gat llaqtayuq Obed-edompa wasinman aparachirqa. 14 Hinaptinmi Jehova Diospa baulninqa Obed-edompa wasinpi kimsa killa karqa. Chaymi Diosqa Obed-edompa ayllunta tukuypi yanaparqa, manam imankupas pisirqachu.+