1 Cronicas

27 Israel runakunam rey Davidta yanapanankupaq achkaman rakisqa karqaku.+ Chaynapi watapi huk killanka tupachinakunankupaq. Sapa rakinasqapim karqaku 24.000 soldadokuna. Chay rakinasqa soldadokunapim karqa Israel ayllukunapi kamachiqkuna, 1.000 runakunapi kamachiqkuna chaynataq 100 runakunapi kamachiqkuna.+ Karqataqmi rakinasqa runakunamanta nanachikuqkunapas.

2 Punta kaq killapim tuparqa Jasobeampa+ runankunaman, payqa karqa Zabdielpa churinmi, runankunam karqa 24.000. 3 Jasobeamqa karqa Perezpa mirayninmi.+ Jasobeanmi karqa punta kaq killapi tupaqkunata kamachiqkunapa kamachiqnin. 4 Iskay kaq killapim tuparqa Dodaipa+ runankunaman, Dodaiqa karqa Akokipa+ mirayninmi. Paypa yanapaqninmi karqa Miklot. Runankunam karqa 24.000. 5 Kimsa kaq killapim tuparqa Benayapa+ runankunaman, payqa karqa ancha riqsisqa sacerdote Jeoyadapa+ churinmi. Runankunam karqa 24.000. 6 Benayaqa 30 kallpasapa soldadokunapa hukninmi karqa, hinaspapas paykunapa kamachiqninmi karqa. Churin Amisabadmi runankunamanta nanachikurqa. 7 Tawa kaq killapim tuparqa Asaelpa+ runankunaman, paypa wawqinmi karqa Joab.+ Asaelpa churin Zebadiasñataqmi karqa payman qatiq. Runankunam karqa 24.000. 8 Pichqa kaq killapim tuparqa Samutpa runankunaman, payqa karqa Izrapa mirayninmi. Runankunam karqa 24.000. 9 Suqta kaq killapim tuparqa Irapa+ runankunaman, payqa karqa Tekoa llaqtayuq+ Ikespa churinmi. Runankunam karqa 24.000. 10 Qanchis kaq killapim tuparqa Helezpa runankunaman,+ payqa karqa Efrain ayllumanta Pelon runam. Runankunam karqa 24.000. 11 Pusaq kaq killapim tuparqa Husa llaqtayuq Sibecaipa+ runankunaman, payqa karqa Zerapa mirayninmi.+ Runankunam karqa 24.000. 12 Isqun kaq killapim tuparqa Anatot llaqtayuq+ Abi-ezerpa+ runankunaman, payqa karqa Benjamin ayllumantam. Runankunam karqa 24.000. 13 Chunka kaq killapim tuparqa Netofa llaqtayuq Maaraipa+ runankunaman, payqa karqa Zerapa+ mirayninmi. Runankunam karqa 24.000. 14 11 kaq killapim tuparqa Piraton llaqtayuq Benayapa+ runankunaman, payqa karqa Efrainpa mirayninmi. Runankunam karqa 24.000. 15 12 kaq killapim tuparqa Netofa llaqtayuq Heldaipa runankunaman, payqa karqa Otnielpa mirayninmi. Runankunam karqa 24.000.

16 Israel ayllukunapi kamachiqkunam karqa kaykuna: Ruben ayllupi kamachiqmi karqa Eliezer, payqa karqa Zicripa churinmi. Simeon ayllupi kamachiqmi karqa Sefatias, payqa karqa Maacapa churinmi. 17 Leviy ayllupi kamachiqmi karqa Hasabias, payqa karqa Kemuelpa churinmi. Aaronpa mirayninkunapa kamachiqninmi karqa Sadoc. 18 Juda ayllupi kamachiqmi karqa Eliu,+ payqa karqa Davidpa wawqinmi. Isacar ayllupi kamachiqmi karqa Omri, payqa karqa Miguelpa churinmi. 19 Zabulon ayllupi kamachiqmi karqa Ismaya, payqa karqa Abdiaspa churinmi. Neftaliy ayllupi kamachiqmi karqa Jerimot, payqa karqa Azrielpa churinmi. 20 Efrain ayllupi kamachiqmi karqa Hosea, payqa karqa Azaziaspa churinmi. Manasespa wakin ayllunpi kamachiqmi karqa Joel, payqa karqa Pedayapa churinmi. 21 Galaad lawpi Manasespa wakin ayllunpi kamachiqmi karqa Ido, payqa karqa Zacariaspa churinmi. Benjamin ayllupi kamachiqmi karqa Jaasiel, payqa karqa Abnerpa churinmi.+ 22 Dan ayllupi kamachiqmi karqa Azarel, payqa karqa Jeroampa churinmi. Paykunam karqaku Israel ayllukunapi kamachiqkuna.

23 Jehova Diosmi nirqaña Israel runakunata lucerokunata hinaña mirachinanmanta, chaymi Davidqa hayka kasqanta mana yuparqachu 20 watayuqmanta uraymanqa.+ 24 Zeruyapa wawan Joabmi yupayta qallaykurqa, ichaqa manam tukurqachu. Chay yupasqanmantam Diosqa Israel runakunapaq llumpayta piñakururqa.+ Chayraykum Davidpa kamachisqan punchawkunamanta rimaq libropiqa haykam yupasqa kasqankupas mana qillqasqachu karqa.

25 Adielpa churin Azmavetmi nanachikurqa kamachiqpa quri-qullqinta churana cuartokunamanta.+ Uziaspa churin Jonatanñataqmi quri-qullqita churana wakin cuartokunamanta nanachikurqa, chay cuartokunam karqa llaqtakunapi, taksa llaqtachakunapi, llaqtamanta hawapi hinaspa torrekunapi. 26 Kelubpa churin Ezriñataqmi nanachikurqa chakrapi llamkaqkunamanta. 27 Rama llaqtayuq Simeiñataqmi nanachikurqa uvas huertakunamanta. Sefam* llaqtayuq Zabdiñataqmi nanachikurqa cuartokunapi churasqanku vinomanta. 28 Gueder llaqtayuq Baal-ananñataqmi nanachikurqa Sefela muqukunapi+ aceitunaskunamantawan higoskunamanta.+ Joasñataqmi nanachikurqa aceite churananku cuartokunamanta. 29 Saron llaqtayuq Sitraiñataqmi nanachikurqa Saron lawpi mikuq vacakunamanta.+ Adlaipa churin Safatñataqmi nanachikurqa pampapi vacakunamanta. 30 Ismael kasta Obilñataqmi nanachikurqa camellokunamanta. Meronot llaqtayuq Jedeyañataqmi nanachikurqa asnokunamanta*. 31 Agar kasta Jazizñataqmi nanachikurqa ovejakunamanta. Paykunam karqaku kamachiq Davidpa kapuqninkunamanta nanachikuqkuna.

32 Davidpa sobrinon Jonatanmi+ karqa qillqapuqnin hinaspa tantiaypi yanapaqnin. Hacmonipa churin Jeyelñataqmi karqa kamachiqpa churinkunata uywaq.+ 33 Imapas tantiaypi rey Davidta yanapaqñataqmi karqa Aitofel.+ Arki kasta Husaiñataqmi+ karqa rey Davidpa kuyasqan runa. 34 Aitofelpa rantinpiñataqmi karqa Abiatarwan+ Benayapa+ churin Jeoyada. Davidpa soldadonkunata kamachiqñataqmi karqa Joab.+