2 Cronicas
11 Reoboanmi Jerusalen llaqtaman chayaramuspan Juda ayllumantawan Benjamin ayllumanta+ huñurachirqa 180.000 allin peleaq soldadokunata, chaynapi Israel runakunawan peleaspan munaychakusqan allpata kutichikunanpaq.+ 2 Hinaptinmi Jehova Diosñataq yupaychaqnin Semayata+ nirqa: 3 “Salomonpa churin kamachiq Reoboamta, Juda ayllu runakunata hinaspa Benjamin ayllu runakunatayá nimuy: 4 ‘Jehova Diosmi nin: “Amayá aylluykichik Israel runakunawan peleaqqa riychikchu. Sapakamayá wasikichikman kutikuychik. Ñuqam saqirqani tukuy chaykuna pasakunantaqa”’”, nispa.+ Chaymi Jehova Diospa nisqanta kasukuspanku mana rirqakuchu Jeroboanwan peleaqqa, hinaspankum wasinkuman kutikurqaku.
5 Reoboanmi Jerusalenpi yachachkaspanraq* Juda nacionpi llaqtakunata allichachirqa. 6 Allichachirqam Belen llaqtata,+ Etam llaqtata, Tekoa llaqtata,+ 7 Bet-zur llaqtata, Soco llaqtata,+ Adulam llaqtata,+ 8 Gat llaqtata,+ Maresa llaqtata, Zif llaqtata,+ 9 Adoraim llaqtata, Lakis llaqtata,+ Azeka llaqtata,+ 10 Zora llaqtata, Ayalon llaqtata+ hinaspa Hebron llaqtata.+ Chay allichachisqan llaqtakunaqa Juda ayllupawan Benjamin ayllupam karqa. 11 Chaymantapas chay llaqtakunapim churarqa soldadokunapa kamachiqninkunata, apachirqataqmi mikuykunata, aceiteta hinaspa vinota. 12 Chay llaqtakunapa pirqantaqa allintam ruwachirqa, apachirqataqmi harkachikuna kaqkunatawan lanzakunatapas. Juda ayllupawan Benjamin ayllupa allpanpim Reoboamqa hinalla kamachirqa.
13 Israel nacionpi sacerdotekunawan Leviy ayllukunam allpankuta saqispa Reboanmanña hukllawakurqaku. 14 Paykunaqa wasinkutawan allpankuta saqispam+ Jerusalen llaqtaman chaynataq Juda nacionpi kaq wakin llaqtakunamanña ripukurqaku. Ripukurqakuqa Jehova Diospa sacerdotenkuna kanankuta Jeroboanwan churinkuna mana munasqankuraykum.+ 15 Jeroboanmi akllasqan runakunata churarqa yupaychana patakunapi sacerdotekuna kanankupaq+ chaynataq cabraman rikchakuq demoniokunatawan+ malta torokunata yupaychanankupaq.+ 16 Sunqumanta Jehova Diosta yupaychay munaq Israel runakunañataqmi Jerusalenman rirqaku, rirqakuqa sacerdotekuna hina hinaspa wakin Leviy ayllukuna hina Jehova Diospaq animalkunata kañaqmi.+ 17 Chay runakunam Salomonpa churin Reoboamta kamachisqanpi kimsa wata yanaparqaku, paykunaqa Davidtawan Salomontam qatipakurqaku.
18 Reoboanmi Maalat sutiyuq warmiwan casarakururqa, Maalatqa karqa Jerimotpa churinmi hinaspa Abiailpa wawanmi. Jerimotqa karqa Davidpa churinmi, Abiailñataqmi Eliabpa churin, Eliabñataqmi karqa Jeseypa churin.+ 19 Reoboampa Maalatpi kaq churinkunam karqa: Jeus, Semarias hinaspa Zaham. 20 Chaymantam Reoboamqa Absalonpa willkan Maaca sutiyuq warmiwan casarakururqa.+ Paypim churinkuna karqa: Abias,+ Atai, Ziza, hinaspa Selomit. 21 Reoboampam karqa 18 warminkunawan 60 sapaq warminkuna.+ Chaywanpas warmin Maacatam astawan kuyaq. Qari churinkunam karqa 28, warmi churinkunañataqmi karqa 60. 22 Reoboanmi warmin Maacapi churin Abiasta churarurqa wawqinkunapi kamachiq kananpaq, churarurqaqa nacionta kamachiq kananta munaspanmi. 23 Chaykunataqa ruwarqa yachaywanmi, chaymi wakin churinkunata Juda ayllupawan Benjamin ayllupa allpanpi murallayuq llaqtakunapi yachanankupaq kamachirqa.+ Chaymantapas tukuy imatam qurqa, hinaspapas achka warmikunatam maskapurqa.