2 Cronicas
2 Salomonmi kamachirqa Jehova Diospaq wasita ruwanankupaq, chay wasiqa karqa Diospa sutin hatunchasqa kananpaqmi.+ Ruwachirqataqmi kamachinanpaq wasitapas.+ 2 Chaypaqmi Salomonqa llamkachinanpaq huñurachirqa 70.000 runakunata*, urqukunapi rumi pakiq 80.000 runakunata+ chaynataq paykunata qawaq 3.600 runakunatapas.+ 3 Chaymantapas Salomonqa Tiro llaqtata kamachiq Hiranmanmi+ willachimurqa: “Taytay David wasinta ruwananpaq cedromanta qirukunata* apachimusqaykiman hinayá ñuqamanpas apachimuway.+ 4 Jehova Diospa sutin hatunchasqa kananpaqmi wasita ruwapusaq. Chay wasiqa Diospaqmi kanqa, chaypim kanqa Diospaq sapaqchasqa tanta*.+ Chaypitaqmi miski asnaq inciensotawan*+ animalkunatapas kañapusaqku. Animalkunatam kañapusaqku sapa achikyaqta, inti siqaykuyta,+ samana punchawpi*,+ llullu killapi+ hinaspa Jehova Diospaq hatun huñunakuykunapi.+ Chaykunatam Israel runakunaqa ruwanaykupuni. 5 Diosllaykum pimantapas aswan atiyniyuqqa, chaymi ruwanay wasiqa suma-sumaq kanqa. 6 ¿Pitaq atinman paypaq wasi ruwapuyta? Hanaq pacha hatu-hatun kachkaptinpas payqa manam kamanmanchu.+ Chaynaqa, ¿pitaq ñuqaqa kani Diospaq wasita ruwapunaypaqqa? Ruwaspaqa-ruwayman paypaq animalkunata kañaspa qusnichinallapaqmi. 7 Chaynaqa kachamuwayá qurimanta, qullqimanta, broncemanta,+ fierromanta imapas ruway yachaqta chaynataq morado qaytuwan, puka llañu qaytuwan hinaspa azul llañu qaytuwan imapas ruway yachaqta. Paymi llamkanqa taytay Davidpa akllasqan runaykunawan, paykunaqa yachaywan imapas ruwaqkunam. Llamkanqaqa Juda lawpi kaq Jerusalen llaqtapim.+ 8 Apachimuway Libano lawpi+ cedromanta, cipresmanta+ chaynataq sandalo+ sachamanta qirukunata. Yachanim runaykikunaqa sachakuna kuchuy yachaq kasqankuta. Runaykunam qampa runaykikunawan llamkanqa,+ 9 llamkanqakuqa achka-achka qiru huñumuypim. Chaynapi Diospa wasinta hatunta hinaspa suma-sumaqta ruwanaypaq. 10 Ñuqam sachakuna kuchuq runaykikunapaq+ apachimusaq 6.400 taqi* trigota, 5.200 taqi* cebadata, 20.000 puyñu* vinota hinaspa 20.000 puyñu* aceiteta”, nispa.
11 Chaymi Tiro llaqtata kamachiq Hiramqa Salomonman qillqarqa: “Jehova Diosmi runankunata kuyasqanrayku kamachiqninku kanaykipaq churarusunki”, nispa. 12 Hiramqa nirqataqmi: “¡Kay pachatawan hanaq pachata unanchaq Israelpa yupaychasqan Jehova Diosyá hatunchasqa kachun! Paymi kamachiq Davidman quykun yachayniyuq+ hinaspa allin tantiuyuq churita,+ chaynapi Jehova Diospaq wasita hinaspa kamachinanpaq wasita ruwananpaq. 13 Hiram-abi sutiyuq runaytam kachamuchkayki, payqa tukuy ima ruway yachaqmi.+ 14 Mamanqa Dan ayllumantam, taytanñataqmi karqa Tiro llaqtayuq. Hiram-abiqa tukuytam ruwan qurimanta, qullqimanta, broncemanta, fierromanta, rumimanta, kullumanta chaynataq morado qaytuwan, azul llañu qaytuwan, linazamanta llañu qaytuwan hinaspa puka llañu qaytuwan.+ Payqa yachantaqmi imapas llaqllayta hinaspa dibujayta.+ Paymi imapas ruway yachaq runaykikunawan chaynataq taytayki Davidpa runankunawan llamkanqa. 15 Chaynaqa, nisqaykiman hinayá apachimuwayku trigota, cebadata, aceiteta, vinota.+ 16 Ñuqaykuñataqmi Libano lawpi+ sachakunata kuchumusaqku haykam munasqaykiman hina, hinaspam balsakunata hina ruwaspayku lamar quchanta Jope llaqtaman apamusaqku.+ Chaymantam qamña Jerusalenman apachinki”, nispa.+
17 Hinaptinmi Salomonqa taytan David hina+ Israel nacionpi huklaw llaqtayuq qarikunata yupachirqa.+ Yuparachiptinmi karqa 153.600 qarikuna. 18 Paykunamantam churarqa 70.000 qipiqkunata, urqukunapi rumi pakiq 80.000 runakunata.+ Churarqataqmi llamkaqkunata qawaq 3.600 runakunatapas.+