Jeremias
28 Tawa kaq watapa pichqa kaq killanpim, Juda nacionta Sedequias+ kamachiyta qallaykuptin Jehova Diospa wasinpi sacerdotekunapa hinaspa llapallan runakunapa qayllanpi Gabaon+ llaqtayuq Azurpa churin willakuq* Hananias niwarqa: 2 “Angelkunata kamachiq Jehova Diosmi nin, Israelpa Diosninmi nin: ‘Babiloniata kamachiqpa yuguntam pakisaq.+ 3 Iskay watamantam kutichimusaq Jehova Diospa wasinmanta apakusqan serviciokunata, apakurqaqa Babiloniata kamachiq Nabucodonosormi’”, nispan.+ 4 “Jehova Diosmi nin: ‘Judata kamachiq Jeoyakimpa+ churin Jeconiastam+ kutichimusaq, Babiloniaman+ apasqa llapallan Juda runakunatam kutichimusaq. Ñuqaqa Babiloniata kamachiqpa yuguntam pakisaq’”, nispa.
5 Jehova Diospa wasinpim sacerdotekunapa hinaspa llapallan runakunapa qayllanpi Diosmanta willakuq Jeremiasñataq Hananiasta rimapayarqa. 6 Diosmanta willakuq Jeremiasmi nirqa: “¡Chaynayá kachun*! ¡Jehova Diosyá chaynatapuni ruwachun! ¡Willakusqaykiman hinayá Jehova Diosqa ruwachun! ¡Jehova Diosqa wasinpi serviciokunatayá Babiloniamanta kutichimuchun! ¡Apasqa runakunatayá Babiloniamanta kutichimuchun! 7 Ichaqa ama hina kaspayá, qanmanwan llapallan runakunaman nisqayta uyariway. 8 Ñawpaq watakunapi kamachiqkunapas, qampas chaynataq ñuqapas manaraq kachkaptinchikmi willakurqaku achka nacionkunawan kamachiqkuna wañuchinakunankumanta, ñakariypi kanankumanta hinaspa unquywan wañunankumanta. 9 Pipas hawkayaymanta willakuptinqa, Jehova Diospa kachamusqan kasqantaqa yachankichik chay willakusqan nisqanman hina kaptillanmi”, nispa.
10 Willakuq Hananiasñataqmi Diosmanta willakuq Jeremiaspa matankanpi* yuguta hapiykuspan pakirurqa.+ 11 Hinaspam llaqtapi runakunapa qayllanpi nirqa: “Jehova Diosmi nin: ‘Chaynatam pakisaq Babiloniata kamachiq Nabucodonosorpa yuguntapas kaymanta iskay wataman. Llapallan nacionkunapa matankanpi yugutam paskasaq’”, nispa.+ Hinaptinmi Diosmanta willakuq Jeremiasqa pasakurqa.
12 Diosmanta willakuq Jeremiaspa matankanpi yuguta willakuq Hananias pakirusqanmanta qipatam Jehova Diosqa Jeremiasta nirqa: 13 “Rispaykiyá Hananiasta nimuy: ‘Jehova Diosmi nin: “Kullumanta yugutam pakirunki,+ ichaqa chaypa rantinpim fierromantaña ruwanki”, nispa. 14 Angelkunata kamachiq Jehova Diosmi nin, Israelpa Diosninmi nin: “Kay nacionkunapa matankanmanmi fierromanta yuguta churasaq, chaynapi Babiloniata kamachiq Nabucodonosorpa runankuna kananpaq hinaspa payta servinanpaq.+ Purun animalkunatapas munaychakunanpaqmi payman qusaq”’”, nispa.+
15 Hinaptinmi Jeremiasqa willakuq Hananiasta+ nirqa: “¡Hananias, uyariykullawayá! Qamtaqa manam Jehova Dioschu kachamusurqanki, qanmi tukuyta ruwarunki kay runakuna llullallapi hapipakunankupaq.+ 16 Chayraykum Jehova Dios nisunki: ‘Kay allpa pachamantam chinkachisqayki. Ñuqa Jehova Diosta mana kasukuwanankupaq runakunata umachasqaykiraykum kay wata wañunki’”, nispa.+
17 Hananiasqa chay watapa qanchis kaq killanpim wañukurqa.