Jeremias
34 Babiloniata kamachiq Nabucodonosormi Jerusalenpawan llaqtachankunapa contranpi peleaq rirqa, rirqaqa llapallan soldadonkunawanmi, munaychakusqan llapallan kamachiqkunawanmi hinaspa llapallan runankunawanmi. Chay kutipim Jehova Diosqa Jeremiasta rimapayaspan nirqa:+
2 “Israelpa yupaychasqan ñuqa Jehova Diosmi nini: ‘Juda nacionta kamachiq Sedequiastayá+ nimuy: “Jehova Diosmi nisunki: ‘Kay llaqtataqa Babiloniata kamachiqpa makinmanmi churaykusaq, hinaptinmi payqa kañaykunqa.+ 3 Hapirususpaykim payman quykusunki, paypa makinmantaqa manam lluptinkichu.+ Babiloniata kamachiqwanqa tupaspaykim kikinwanpuni rimanki, hinaspañam Babiloniaman rinki’, nispa.+ 4 Chayna kaptinpas Judata kamachiq Sedequias, ñuqa Jehova Diospa nisqaytayá uyariy: ‘Ñuqa Jehova Diosmi niki: “Manam espadawanchu wañunki, 5 hawkallam wañukunki,+ ñawpaq taytaykikunapaq hinam wañukuptikipas miski asnaq qurata kañapusunki. Paykunapas qam hinam kamachiqkuna karqa, wañukuptikim ninqaku: ‘¡Kamachiqllayku, kunanqa imapitaq rikukullaniku!’, nispa. Kikiymi chaykunataqa nini, ñuqa Jehova Diosmi chaynata nini”’”’”, nispa.
6 Tukuy chaykunatam Diosmanta willakuq* Jeremiasqa Juda nacionta kamachiq Sedequiasman Jerusalenpi willaykurqa. 7 Willaykurqaqa Babiloniata kamachiq tropankunapiwan Jerusalenpa contranpi peleachkaptinmi,+ pelearqakutaqmi Juda nacionpi Lakis+ llaqtapawan Azeka+ llaqtapa contranpipas.
8 Kamachiq Sedequias kacharinanpaq Jerusalenpi llapallan runakunawan contrato* ruwasqanku qipatañam Jehova Diosqa Jeremiasta rimapayarqa.+ 9 Sedequiasmi nirqa Hebreo kasta serviqninkuta qaritapas warmitapas kacharinankupaq, chaynapi kastamasinku judiokuna manaña sirvientenku kananpaq. 10 Hinaptinmi rimanakusqankuman hina kamachiqkunawan llapallan runakunaqa kasukurqaku, chaymi rimasqankuman hina qaritapas warmitapas serviqninkutaqa kacharirqaku. Chaynapi sirvientenku hina manaña kananpaq. 11 Chaymanta qipatam kacharisqanku serviqninkutaqa llamkachinankupaq kaqmanta kutichimurqaku, hinaspam hinalla llamkachikurqaku. 12 Chaymi Jehova Diosqa Jeremiasta rimapayarqa, Jehova Diosmi nirqa:
13 “Israelpa yupaychasqan ñuqa Jehova Diosmi nini: ‘Ñawpaq abueloykichiktam Egipto runakunapa sirvienten kasqankumanta hurqumurqani,+ paykunawan contratota ruwaspaymi+ nirqani: 14 “Sapa qanchis watam kacharinkichik servisunaykichikpaq rantisqaykichik Hebreo kastamasikichikta, kacharinkichikqa suqta wata llamkapusuptikichikmi”, nispa.+ Ñawpaq abueloykichikkunam ichaqa mana kasuwarqachu nitaq uyariwarqachu. 15 Qaynakunallam qamkunaqa kastamasikichikkunata kacharispaykichik munasqayman hinaña ruwarqankichik, chayta ruwanaykichikpaqmi ñuqapa qayllaypi sutiy apaq wasipi contratota ruwarqankichik. 16 Qamkunam ichaqa mana kasukuspaykichik sutiyta pinqayman churarqankichik,+ qamkunaqa serviqnikichikkunata pasakunankupaq kachaykuchkaspaykichikmi kaqmanta kutichimurqankichik, hinaspam kaqmanta servichikuchkankichik’, nispa.
17 Chaymi ñuqa Jehova Dios nikichik: ‘Qamkunaqa mana kasukuwaspaykichikmi kastamasikichikkunatawan runamasikichikkunata hinalla llamkachirqankichik,+ chaymi qamkunata saqisqaykichik peleaspa wañunaykichikpaq, unquywan wañunaykichikpaq hinaspa yarqaymanta wañunaykichikpaq.+ Hinaptinmi allpa pachapi llapallan kamachiqkuna manchakuymanta katkatatanqaku. Ñuqa Jehova Diosmi chaynata nini.+ 18 Nisqankuman hina mana cumpliq runakunataqa chiqniqnin runakunapa makinmanmi churaykusaq, qamkunaqa qayllaypi rimanakusqaykichiktam mana kasukurqankichikchu, qamkunaqa rimanakurqankichik malta torota iskayman kuchuruspam, hinaspam chimpa-chimpata churaruspa chawpinta pasarqankichik.+ 19 Chaytaqa ruwarqankichik Juda nacionpi kamachiqpa yanapaqninkunam, Jerusalenpi kamachiqpa yanapaqninkunam, soldadokunapa kamachiqninkunam, sacerdotekunam hinaspa iskayman kuchusqa malta toropa chawpinta pasaq lliw runakunam. 20 Qamkunatam chiqnisuqnikichik runakunapa makinman chaynataq wañuchiyta munasuqnikichik runakunapa makinman churaykusqaykichik, hinaptinmi qamkunapa aychaykichiktaqa alton pawaqkunawan purun animalkuna mikunqa.+ 21 Juda nacionta kamachiq Sedequiastawan yanapaqninkunatam chiqniqnin runakunapa makinman churaykusaq, wañuchiyta munaqnin runakunapa makinman churaykusaq hinaspa Babiloniata kamachiqpa soldadonkunapa makinman churaykusaq.+ Paykunaqa kutikuchkankum’, nispa.+
22 Ñuqa Jehova Diosmi nini: ‘Ñuqa kamachiptiymi chay soldadokunaqa kay llaqtaman kutimuspanku peleanqaku, llaqtaman yaykumuspankum kañaykunqaku.+ Chaynatam Juda nacionpi llaqtakunataqa chunnichisaq, mana runayuqmi qipanqa’”, nispa.+