Jeremias
37 Josiaspa churin Sedequiasmi+ kamachiyta qallaykurqa Jeoyakimpa churin Coniaspa*+ rantinpi, Babiloniata kamachiq Nabucodonosormi Sedequiastaqa Juda allpapi kamachinanpaq churarurqa.+ 2 Ichaqa Sedequiaspas, runankunapas hinaspa kamachisqan llapallan runankunapas manam kasukurqakuchu Jeremiaswan Jehova Diospa willachisqantaqa.
3 Kamachiq Sedequiasmi Selemiaspa churin Jeucalta+ chaynataq sacerdote Maaseyapa churin Sofoniasta+ Diosmanta willakuq* Jeremiasman kacharqa, paykunam Jeremiasta nimurqaku: “Ama hina kaspayá yanapawananchikpaq Jehova Diosta mañakuy”, nispa. 4 Jeremiasqa manaraq presochasqa kasqanraykum runakunapa kasqanpi hawka purikurqa.+ 5 Chay punchawkunapim Caldea runakuna Jerusalenta muyuriruspanku kachkarqaku, hinaspam Egiptomanta kamachiqpa* soldadonkuna lluqsiramusqanta yacharuspanku+ Jerusalenmanta kutikurqaku.+ 6 Jehova Diosmi willakuq Jeremiasta rimapayaspan nirqa: 7 “Israelpa yupaychasqan ñuqa Jehova Diosmi nini: ‘Kachamusuqnikichik Judata kamachiq Sedequiastayá nimuychik: “Yanapasunaykichikpaq Egiptomanta hamuq soldadokunam llaqtankuman kutikunqaku.+ 8 Caldea runakunam kutimuspanku kay llaqtawan peleanqaku, yaykuruspankum kañaykunqaku”, nispa.+ 9 Ñuqa Jehova Diosmi nini: “Amayá niychikchu ‘Caldea runakunaqa manam kutimunqachu’ nispaqa, paykunaqa kutimunqakupunim. 10 Caldea soldadokunata yaqa llapallanta wañurachiptikichikpas puchuq runakunach wañuypa patanpiña kachkaspankupas carpankumanta lluqsiramuspanku kay llaqtataqa kañaykunmanku”’”, nispa.+
11 Egiptomanta soldadokuna hamusqanrayku Caldea soldadokuna Jerusalenmanta kutikuptinkum+ 12 Jeremiasqa Jerusalenmanta lluqsirurqa, hinaspam llaqtamasinkunapa kasqan Benjamin+ allpaman rirqa tupaqnin allpata chaskikamuq. 13 Benjamin sutiyuq punkuman chayaruspanñataqmi soldadokunapa kamachiqnin Iriyawan tuparurqa, Iriyaqa karqa Selemiaspa churinmi, Selemiasñataqmi karqa Hananiaspa churin. Iriyaqa Diosmanta willakuq Jeremiasta hapiruspanmi nirqa: “¡Qamqa Caldea runakunamanmi sayapakuchkanki ¿aw?!”, nispa. 14 Jeremiasñataqmi nirqa: “¡Manam chaynachu! Ñuqaqa manam Caldea runakunamanqa sayapakunichu”, nispa. Iriyam ichaqa mana kasuspan Jeremiastaqa kamachiqpa yanapaqninkunaman pusarurqa. 15 Hinaptinmi paykunaqa Jeremiaspaq piñakuspanku+ maqaparurqaku, hinaspam secretario Jeonatanpa wasinpi wichqarurqaku,+ paypa wasinqa carcel hinam karqa. 16 Jeremiastaqa allpa ukupi kaq huknin cuartopim wichqarurqaku, chaypim achka punchawkuna wichqarayarqa.
17 Kamachiq Sedequiasqa Jeremiasta pusarachimuspanmi mana pipapas rikusqallanta wasinpi tapupayarqa,+ paymi nirqa: “¿Icha imallatapas Jehova Dios nisurqanki?”, nispa. Jeremiasñataqmi nirqa: “¡Arí!, paymi nisunki: ‘Babiloniata kamachiqpa makinmanmi qusqayki’”, nispa.+
18 Jeremiasqa kamachiq Sedequiastaqa nirqataqmi: “Carcelpi wichqaruwanaykichikpaqqa ñuqaqa manam ima mana allintapas ruwarqanichu contraykipiqa, runaykikunapa contranpiqa nitaq kay llaqtapi runakunapa contranpiqa. 19 ¿Maypitaq kachkan ‘Babiloniata kamachiqqa manam hamunqachu qamkunawan peleaqqa nitaq kay nacionwan peleaqpas’ nispa nisuqnikichik willakuqkunaqa?+ 20 ¡Kamachiqlláy, ama hina kaspayá uyariykullaway! Yanapaykuwanaykipaqmi mañakuyki. Secretario Jeonatanpa wasinman ama kutichiwanaykipaqmi ruegakullayki,+ chayman kutispayqa wañurusaqmi”, nispa.+ 21 Chaymi kamachiq Sedequiasqa kamachirqa Guardia sutiyuq patiopiña+ Jeremiasta wichqamunankupaq, chaypim sapa punchaw ruyru tantata quqku tanta ruwaqkunapamanta apamuspanku.+ Chaytaqa ruwarqaku llaqtapi tanta tukunankamam,+ chaynapim Jeremiasqa Guardia sutiyuq patiopi qipakurqa.