Jehova Diosta Josey kasukusqanmanta

Jacobqa churin Joseytam astawan kuyarqa, chaymi Jacobpa mayor churinkuna Joseyta chiqnirurqaku. Aswanraqmi Joseytaqa chiqnirurqaku sueñokusqanmanta willaykuptin. Paykunaqa piensarqakum chay sueñokusqanqa Joseypa qayllanpi huk punchaw kumuykunankuwan tupasqanta.

Huk punchawmi Joseypa wawqinkuna Sichem llaqtapa hichpanpi ovejata michichkarqaku, chaymi Jacobqa Joseyta kacharqa wawqinkunata qawamunanpaq. Wawqinkunañataqmi Joseyta karullamantaraq rikuruspanku nirqaku: “Waqaya sueñokuq maqtaqa hamuchkan. ¡Wañurachisun!”, nispa. Chaymi llapankumanta hapiruspa uchkuman wischuykurqaku. Juda sutiyuq wawqinkuñataqmi nirqa: “Ama wañuchisunchu, aswanqa sirviente kananpaq rantikurusun”, nispa. Chaynapim Joseytaqa Egipto nacionman riq negociante Madian kastakunaman 20 qullqillapaq rantikururqaku.

Hinaspam Joseypa pachanta chivopa yawarninwan chapuruspanku taytankuman apaspa nirqaku: “¿Manachum kayqa churikipa pachan?”, nispa. Churinta purun animal tisaparusqanta piensaspanmi Jacobqa llumpayta waqarqa, manam pipas sunqun tiyachiyta atirqachu.

Chay negociantekunam Egipto nacionman chayaruspanku soldadokunapa capitannin Potifarman Joseytaqa rantikururqaku, chaynapi paypa sirvientenña kananpaq. Joseytaqa Jehova Diosmi yanaparqa. Joseyqa allin llamkaq hinaspa confianapaqmi karqa, chaymi Potifarpas tukuy imankunamanta nanachikunanpaq churaykurqa.

Joseyqa karqa sumaq rikchayniyuq musuñam, chayraykum Potifarpa warminqa paywan puñunanpaq sapa kuti hikutaq. Joseyñataqmi mana munaspan nirqa: “Manam chaytaqa ruwaymanchu, qamqa kanki patronniypa warminmi, payqa allinpaqmi qawawan. Qanwan puñukuruspayqa Diostam qipancharuyman”, nispa.

Huk punchawmi Potifarpa warminqa pachanmanta hapiruspan Joseyta nirqa: “Puñukusunyá”, nispa. Joseyñataqmi chaylla lluptikurqa. Wasinman Potifar chayaruptinmi warminqa llullakuspan willakurqa Josey abusay munasqanmanta. Potifarñataqmi llumpayta piñakuruspan carcelman hinarachirqa, Jehova Diosmi ichaqa Joseyta yanaparqa.